Tabangan an Iba na Makanompong nin Karangahan
1 An dakol na tawo sawa na sa pagdangog dapit sa mga kalamidad, guerra, krimen, asin pagdusa. An karangahan, dawa ngani sa pankagabsan mayo sa mga bareta ngonyan, sarong bagay na talagang kaipuhan nin katawohan. An pagranga nangangahulogan na “magtao nin kosog asin paglaom sa” asin “pagianon an kamondoan o kapurisawan nin” saro. Bilang Mga Saksi ni Jehova, sinangkapan kita tangani na tabangan an mga tawo sa paaging ini. (2 Cor. 1:3, 4) An satong mga brosyur na basado sa Biblia na iaalok niato ngonyan na Hulyo asin sa Agosto igwa nin nakararangang mga mensahe nin katotoohan. (Roma 15:4) Uya an nagkapirang suhestion sa pag-atubang kaiyan sa laen-laen na kamugtakan:
2 An sarong makaturotristeng bareta puedeng makagibo nin oportunidad na magpatotoo asin magtaong karangahan sa iba, tibaad paagi sa pagsabi nindo nin siring kaini:
◼ “Kun nangyayari an mga bagay na iyan, nag-iisip an nagkapira kun baga talagang nag-eeksister an Dios asin, kun iyo, kun baga nagmamakolog sia sa sato. Ano sa paghona nindo? [Pasimbagon.] An sarong paagi na madeterminaran kun baga igwang Dios iyo na iaplikar an sarong napatunayan nang marhay na prinsipyo.” Basahon an Hebreo 3:4. Itokdo an iba pang mga bagay sa palibot niato na malinaw na nagkakaipo nin kaggibo. Dangan magpadagos: “May brosyur ako na aram kong manonompongan nindong nakararanga. Ini may temang An Dios daw Talagang May Pagmakolog sa Sato? [Basahon an mga hapot sa tutob.] Igwa iyan nin nakakokombensir na prueba na bako sanang talagang nag-eeksister an Dios kundi na sa dai na mahahaloy tataposon nia an gabos na bakong makatanosan na mga kamugtakan na inaatubang niato ngonyan. Boot daw nindong basahon iyan?” Iareglong madalaw liwat.
3 Sa pagdalaw liwat, puede nindong sabihon:
◼ “Pinag-oolayan niato an manongod sa prueba kan pag-eksister nin Dios kan iwalat ko an brosyur na An Dios daw Talagang May Pagmakolog sa Sato? Tibaad narisa nindo an puntong ini sa pahina 7. [Ipaheling an retrato asin sumaryohon an parapo 15.] Saro sana ining halimbawa na nagpapaheling na talagang nag-eeksister an sarong may pagmakolog na Dios. [Basahon an parapo 27 sa pahina 9.] An personal na pag-adal sa Biblia nakatabang sa sako na makapanggana sa pan-aroaldaw na mga problema sa buhay huli ta itinatao kaiyan an punto de vista nin Dios manongod sa mga bagay.” Alokon na idemonstrar an pag-adal.
4 An pagpapatotoo paagi sa telepono puedeng magibo na ginagamit an brosyur na “What Is the Purpose of Life—How Can You Find It?” Puede kamong magpamidbid asin magsabi:
◼ “Inaapodan ko kamo na may sarong importanteng mensahe huli ta dai ako makakadian tanganing personal kamong makaolay.” Basahon an enot na parapo sa pahina 4 kan brosyur, na ginigibo iyan sa natural na paagi, na garo baga kinakaolay nindo nin personal an indibiduwal. Hapoton sia kun ano an paghona nia, asin pasimbagon. “Nakabukas an Biblia ko sa Isaias 45:18. Ipinaheheling kan bersikulong ini na an daga linalang na kita an nasa isip. Gusto daw nindong basahon ko ini sa saindo?” Pakatapos kaiyan, ipaliwanag an katuyohan kan brosyur, asin hapoton kun paano nindo puedeng ihatod an sarong kopya.
5 Sa pagsongko liwat, puede nindong probaran an pagdolok na ini tangani na makapoon nin pag-adal:
◼ “Boot kong ipadagos an satong huring pag-orolay paagi sa pagpaheling kun siisay an makasasabi sa sato kan katuyohan nin buhay. [Itao an kahulogan kan parapo 1 asin 2 na nasa pahina 6 kan brosyur na Purpose of Life.] Ipinaliliwanag kan Kapahayagan 4:11 na si Jehova Dios an satong Kaglalang. [Basahon.] Siertong may dahelan sia sa paglalang sa sato. An mga tawo na boot na maaraman kun ano an dahelan na iyan nag-adal kan nasusurat na Tataramon nin Dios, an Biblia. Boot kong ialok sa saindo an oportunidad na iyan.” Ipaliwanag kun paano kinokonduktahan an satong mayong bayad na pag-adal sa Biblia sa harong asin gumibo nin mga areglo na ponan an pag-adal.
6 An positibong pagdolok na ini puedeng makaranga sa mga nakaeksperyensia nang magadanan nin namomotan:
◼ “Naglilingkod ako sa publiko sa kapakanan nin gabos na nagadanan na nin namomotan. Mantang saro ini sa tibaad pinakamasakit na bagay kasuarin man na aatubangon nin siisay man sa sato, iinandam an brosyur na ini na Kun Magadan an Sarong Namomotan. Natabangan kaiyan an minilyon na tawo. Gusto kong ipaheling sa saindo an sinasabi kaiyan dapit sa makaoogmang panuga ni Jesu-Cristo. [Basahon an ikalimang parapo sa pahina 26, kaiba an Juan 5:21, 28, 29.] Mangnoha an retratong ini sa pahina 29 na ipinaheheling an pagkasaysay kan Ebanghelyo sa aktuwal na pagbuhay liwat ni Jesus ki Lazaro hale sa mga gadan. Kun gusto nindong basahon an nakararangang brosyur na ini, naoogma akong iwalat iyan sa saindo.”
7 Sa pagdalaw liwat nindo, puede giraray nindong ipaheling an retrato sa pahina 29 kan brosyur na “Kun Magadan an Sarong Namomotan” asin magsabi:
◼ “Girumdoma an satong pag-oolay dapit sa pagbuhay liwat ni Cristo ki Lazaro. [Basahon an kapsion sa pahina 28, asin pag-olayan an materyal sa irarom kan subtemang “Talaga daw na Nangyari Iyan?”] Kun an saindong puso naghihimuyawot na maniwala na maheheling nindo liwat an sarong nagadan na namomotan, togotan nindo akong tabangan kamo na magkaigwa nin pagtubod sa paglaom na pagkabuhay liwat.” Ialok an pag-adal sa Biblia sa harong.
8 Gibohon logod niato an satong pinakamakakaya sa maabot na mga bulan na arogon si Jesus paagi sa “pagranga kan gabos na nagtatangis.”—Isa. 61:2.