Gamiton nin Marahay an mga Handbill

¹ An mga handbill kan kongregasyon kapakipakinabang sa pagpaisi sa mga tawo sa komunidad kan adres kan Kingdom Hall asin kan tamang oras nin mga pagtiripon. Marahay na magwalat nin sarong kopya sa lambang tawo na nakakaolay nindo. Sa katuyohan na iyan, maninigo na an kada kongregasyon mag-istak nin bastanteng suplay nin mga handbill. Kun an mga kongregasyon magliwat nin oras nin mga pagtiripon, maninigong pumedido nin bagong mga handbill tangani na pirmeng may makukuang suplay kan bagong oras nin mga pagtiripon. Gagamiton an pormang Handbill Request sa katuyohan na ini. Oras na maresibi nindo iyan, paano magagamit an mga handbill sa pinakakapakipakinabang na paagi?

² Nanonompongan nin dakol na parahayag na an pagtao nin sarong kopya sa sarong tawo epektibong paagi na iintrodusir an saindang sadiri asin makapoon nin mga pag-orolay. An pagtokdo kan iskedyul nin pagtiripon o kan mensahe na nasa likod puedeng magbukas kan dalan pasiring sa orolay dapit sa satong gibohon asin katuyohan kaiyan. Puedeng ilabot kan mga magurang an saindang mga aki sa ministeryo paagi sa pagpaalok sa sainda nin handbill sa pinto. An mga parahayag na nakikikabtang sa pagpapatotoo paagi sa pagsurat maninigong magsaliot nin sarong handbill sa saindang surat asin imbitaran an tawo na umatender sa mga pagtiripon. Puedeng iwalat an mga handbill sa mga harong na mayong tawo, basta mag-ingat na ibugtak iyan sa irarom kan pinto tangani na iyan dai nanggad maheling.

³ Nagin instrumento an mga handbill sa pagdirehir sa mga sadiosan an puso pasiring sa katotoohan. An sarong eksperyensia nagsasabi manongod sa sarong babae na, sa tabang nin sarong handbill, naotob an saiyang haloy nang pagmawot na masabotan an Biblia. Pakapamibi nia nin magdamlag sa Dios, nagtimbre sa saiyang pinto pagkaaga an sarong mag-agom na Saksi. Nagsisirip sa labot, nagkurahaw sia na bakong kombenyente na buksan an pinto. Isinurok kan mga Saksi an sarong handbill sa pinto. Iyan nagsasabi: “Know Your Bible” (sa Bicol, “Aramon sa Saindong Biblia”). Naheling nia iyan asin binuksan an pinto. Naponan tolos-tolos an pag-adal, asin dai nahaloy nabautismohan sia. Nungkang minemenus an puersa kan espiritu nin Dios, regular logod na gamiton niato nin marahay an mga handbill mantang lubos niatong ginigibo an satong ministeryo.​—Helingon man an Pebrero 1994 An Satong Ministeryo sa Kahadean, pahina 1.