Pambilog na Kinaban na Kampanya Tanganing Ipaisi an “Harani na an Kaligtasan!” na Pandistritong Kombension
Ididistribwir kan mga Parahayag sa Kada Kongregasyon an Espesyal na Imbitasyon
1 Sa taon na ini, sa 2006-2007 serye nin mga pandistritong kombension na ginigibo sa mga 155 nasyon, pinonan na an sarong kampanya tanganing ipaisi an mga kombension na ini paagi sa sarong espesyal na imbitasyon.
2 Huli ta nabubuhay na kita sa pinal na kabtang kan panahon na ini nin katapusan, an mga kombension, na nagtatampok kan ipinanugang pagliligtas nin Dios gikan sa marigsok na sistemang ini, maninigong magkaigwa nin mapuersang pan-akit sa mga tawong may tamang tendensia. An mensahe maninigong magmotibar sa sainda na pag-isipan kun ano an nakatagama sa ngapit. Tanganing tawan nin oportunidad an minilyon na tawo na madangog an mensahe nin karangahan asin paglaom, labing 98,000 na kongregasyon nin Mga Saksi ni Jehova sa bilog na kinaban an sinasadol na entusiastikong makikabtang sa pagpaisi kan kombension na dian inimbitaran sinda.
3 Tatawan an mga kongregasyon nin supisyenteng mga imbitasyon tanganing magin posible para sa kada parahayag na magkaigwa nin sagkod sa 20 imbitasyon. An ano man na sobra puedeng gamiton kan mga payunir sa kongregasyon. Sa kada kongregasyon, an kampanya mapoon tolong semana bago an kapinonan na petsa kan kombension na dian inasignar an kongregasyon.
4 Irinerekomendar na dalawon asin tawan nin imbitasyon sa pandistritong kombension an gabos na inaadalan sa Biblia asin an saindang mga pamilya, saka an iba pang interesadong tawo sa teritoryo. Siring man, sagkod na may suplay kamo, an mga imbitasyon maninigong ialok sa harong-harong sa saindong asignadong teritoryo. Maninigong gumibo nin paghihingoa tanganing ikadistribwir an gabos na imbitasyon durante kan tolong semana.
5 Kompiado kita na ikakatao an sarong dakulaon na patotoo bilang resulta kan durungan na lakop sa globong paghihingoang ini na ipaisi an “Harani Na an Kaligtasan!” na Pandistritong Kombension. Ipinapamibi niamo an nagsosopay na bendisyon ni Jehova sa saindong personal na mga paghihingoa mantang nakikikabtang kamo sa pambilog na kinaban na kampanyang ini.