Iribang Paghihingoa sa Bilog na Kinaban Tanganing Ipaisi an “Sunodon an Cristo!” na Pandistritong Kombension
Madistribwir Giraray an mga Parahayag nin Espesyal na Imbitasyon
1 Kan nakaaging taon an pambilog na kinaban na kampanya na ipaisi an “Harani Na an Kaligtasan!” na Pandistritong Kombension nagkaigwa nin mapuersang epekto sa mga interesado. An mga nag-ako kan espesyal na imbitasyon asin nag-atender nakaeksperyensia sa kaenot-enote kan abunda nanggad na espirituwal na bangkete sa tahaw kan Mga Saksi ni Jehova. (Isa. 65:13) Ikinaogma ninda an pakikiasosyar sa satong mamomoton asin borogkos na kasararoan nin Kristianong magturugang. (Sal. 133:1) Tanganing matabangan an pinakadakol na mapupuede na umatender sa “Sunodon an Cristo!” na Pandistritong Kombension, sa giraray makikikabtang kita sa pagdistribwir sa bilog na kinaban nin espesyal na imbitasyon.
2 Mga Resulta kan Nakaaging Taon: Basado sa mga report na naresibi hale sa gabos na parte kan kinaban, marahayon an mga resulta nin pagpaisi kan “Harani Na an Kaligtasan!” na Pandistritong Kombension. Halimbawa, sa sarong siudad, ipinublikar sa sarong diaryo an sarong artikulong may anom na column manongod sa kampanya, na sinasabi: “Tanganing matawan nin imbitasyon an gabos bago an kombension, an mga Saksi naggigibo nin espesyal asin maigot na paghihingoa sa pagtaraed—na naggigibo kaiyan nin mas halawig na mga oras, naglalakaw nin mas hararayong distansia, asin nagtataram nin mas marikas.” Sa saro pang siudad kisuerra tolong diaryo an paborableng nagbareta dapit sa satong aktibidad bago an kombension. Nagsurat an sarong reporter nin nagkapirang detalyadong artikulo na nakapano sa labing duwang pahina sa Domingong edisyon nin sarong diaryo. Detalyadong tinokar kaiyan an satong mga paniniwala, an satong kasararoan nin magturugang, an pagdistribwir nin imbitasyon, asin an kombension. Kan ipresentar nin sarong parahayag an imbitasyon mantang nasa may pinto, nagsaliot an kagharong, na sinasabi: “Iyo. Nabasa ko pa sana sa diaryo an manongod dian!” An saro pang kagharong nagkagsing: “Katatapos ko pa sanang basahon an manongod sa saindo, asin ngonyan uya na kamo! Iyan daw an sakong imbitasyon?” Dangan sinabi pa nia, “Kaomaw-omaw na marhay an ginigibong ini kan Mga Saksi ni Jehova.”
3 Dakol na interesadong indibiduwal an naheling na nagduruman sa mga lugar nin kombension na kapot an saindang imbitasyon. An nagkapirang interesado nagbiahe hale sa hararayong lugar tanganing umatender sa mga sesyon. An satong maigot na paghihingoa na imbitaran an iba nagresulta sa mas dakol na nag-atender, na sa sarong nasyon mas dakol nin 27 porsiento an mga nag-atender sa kombension kisa kan nakaaging taon. Digdi sa Pilipinas, sarong bagong pinakahalangkaw na bilang na 340,215 an nag-atender sa satong mga kombension kan nakaaging taon.
4 Pagdistribwir sa Bilog na Teritoryo: Puede kamong pumoon na magdistribwir kan imbitasyon tolong semana bago pumoon an saindong kombension. Maninigong gibohon an gabos na paghihingoa tanganing makapagdistribwir sa bilog na teritoryo kan kongregasyon. Sa mga kongregasyon na may dakulang teritoryo, puedeng mapagmansay na iwalat nin mga parahayag an imbitasyon sa mga harong na mayo nin tawo durante kan huring semana bago an kombension. Maninigong hingoahon nin mga kongregasyon na idistribwir an gabos na itinaong imbitasyon asin magibo an pinakadakol na teritoryo sagkod sa mapupuede. An ano man na sobra puedeng gamiton nin mga payunir sa kongregasyon.
5 Kun Ano an Sasabihon: Puede nindong sabihon an arog kaini: “Idinidistribwir mi sa bilog na kinaban an imbitasyon na ini para sa nagdadangadang na mahalagang okasyon. Ini an saindong kopya. May maheheling kamo na iba pang detalye na yaon sa imbitasyon.” An pagpapadanay na halipot an presentasyon magtatao nin lugar para sa mas mahiwas na pagdistribwir. Siempre, kun may mga hapot an kagharong, magtao nin panahon na simbagon iyan. Kun may ipinaheling na interes, irekord iyan asin dalawon liwat an indibiduwal sa pinakamadaling panahon na mapupuede.
6 Mahalagang marhay nanggad na magmaigot kitang sunodon an Cristo! (Juan 3:36) An nagdadangadang na pandistritong kombension niato makakatabang sa gabos na maatender na gibohon nanggad iyan. Siertong maaantisipar niato na ikakatao giraray an dakulaon na patotoo bilang resulta kan iribang paghihingoang ini tanganing ipaisi an “Sunodon an Cristo!” na Pandistritong Kombension. Kun siring, magin maigot sa pag-imbitar na umatender an pinakadakol na mapupuede. Mapasaimo logod an nagsosopay na bendisyon ni Jehova sa personal na paghihingoa mo na makikabtang sa sararong kampanyang ini sa bilog na kinaban.