“Andam Nanggad Para sa Lambang Marahay na Gibo”
1 An banwaan ni Jehova ngonyan binebendisyonan nin abundang mayaman na espirituwal na kakanon. (Isa. 25:6) Kadakol kan makukuang Makakasuratan na materyal paagi sa personal asin pampamilyang pag-adal patin sa mga pagtiripon kan kongregasyon, asamblea, saka kombension. Alagad lubos daw niatong inaaprobetsaran an gabos na ini na may katuyohan na magin “lubos na may kakayahan, andam nanggad para sa lambang marahay na gibo”?—2 Tim. 3:17.
2 Isip-isipa sana an espirituwal na menu para sa taon nin 1998, na nangangabangaan na! Paagi sa semanal na mga pagtiripon kan kongregasyon, pinag-oolayan niato an nagkapira sa tampok na mga kabtang kan 23 na libro kan Kristianong Griegong Kasuratan, rinerepaso an impormasyon na yaon sa Insight on the Scriptures manongod sa buhay kan 49 personahe sa Biblia, asin ineestudyaran an 138 pahina sa librong Proclaimers. Rinerepaso man niato an un-tersio kan librong Kaaraman, haros bilog na librong Kaogmahan nin Pamilya, asin an bilog na librong God’s Word. Saro pa, pinakokosog kita nin 12 luwas kan An Satong Ministeryo sa Kahadean, 52 na artikulong pinag-aadalan sa Torrengbantayan, asin kadakol na pahayag-publiko manongod sa manlaenlaen na tema sa Biblia. Dagdag pa sa gabos na ini an mayaman na mga programa sa kombension asin asamblea. Kanigoan kabastanteng espirituwal na mararahay na bagay an itinatao sa sato!
3 Apresyaron an mga Probisyon ni Jehova: Tanganing lubos na makinabang, kaipuhan niatong masabotan kun taano si Jehova ta nagtatao nin siring na abundansia sa espirituwal. An pagpakabasog sa mararahay na bagay na ini nagpaparigon sa satong pagtubod asin nagpapakosog sa satong relasyon sa saiya. (1 Tim. 4:6) Minsan siring, dai itinatao an espirituwal na kakanon para sana sa pagtokdo sa sato. Minomotibar kita kaiyan na ihiras sa iba an katotoohan asin sinasangkapan kita na magin epektibo sa paggibo kaiyan bilang mga ministro kan maogmang bareta.—2 Tim. 4:5.
4 Dai niato pag-ignorohon an satong espirituwal na mga pangangaipo, kundi pirmeng kultibaron an pagmawot sa mayaman asin nakakokontento sa espirituwal na mga probisyon hale sa lamesa ni Jehova. (Mat. 5:3; 1 Ped. 2:2) An lubos na pakikinabang nagkakaipo nin pagtagama nin supisyenteng panahon para sa importanteng mga bagay siring baga kan regular na personal asin pampamilyang pag-adal sa Biblia patin pag-atender sa mga pagtiripon. (Efe. 5:15, 16) An nakaoogmang mga balos sa paggibo kaiyan magigin kaoyon sa ipinasabong na pamparigon sa boot na isinurat ni Pablo sa fiel na Hebreong mga Kristiano, siring kan nakasurat sa Hebreo 13:20, 21.