Kaipuhan na Madangog kan Satong mga Kataed an Maogmang Bareta
1 Kabotan nin Dios “na an gabos na klase nin tawo makaligtas asin makaabot sa tamang kaaraman kan katotoohan.” (1 Tim. 2:4) Kabale sa “gabos na klase nin tawo” an gabos niatong kataed. An pagpaabot sa sainda kan maogmang bareta nagkakaipo nin pagigin maabilidad sa satong mga pag-atubang asin mapag-isip dapit sa kun ano an puedeng magin interesante para sa kada tawo na nanonompongan niato. (1 Cor. 9:19-23) An organisasyon ni Jehova nagtao nin mga kasangkapan na puedeng makatabang sa sato na maabot an puso kan mga “may tamang tendensia sa buhay na daing katapusan.” (Gibo 13:48) Helingon niato kun paano niato magagamit an manlaenlaen na brosyur ngonyan na Hulyo asin sa Agosto tangani na ikatao an espirituwal na mga pangangaipo kan satong mga kataed.
2 Tampok na mga Brosyur: Maheheling nindo sa lista sa ibaba an mga suhestion na puedeng magin kapakipakinabang kun iinaatubang an nagkapirang brosyur. An kada suhestion may (1) sarong nakapupukaw sa isip na hapot para sa pagpoon nin pag-orolay, (2) sarong reperensia na makukuanan nin mapag-oolayan na mga punto sa brosyur, asin (3) sarong angay na teksto na puedeng basahon durante kan pag-orolay. Puede nindong panoan an ibang kabtang kan pag-atubang sa saindong sadiring mga tataramon, sono sa reaksion kan tawo. Sa kadaklan na brosyur, sinisitar an nakaaging luwas kan An Satong Ministeryo sa Kahadean kun saen manonompongan nindo an mas detalyadong pag-atubang sa brosyur.
An Dios daw Talagang May Pagmakolog sa Sato?
Anong paglaom an sa paghona nindo makatatabang sa mga tawo na nag-agi nin pag-abuso?—Pahina 27-8, parapo 23-7; Isa. 65:17, 18; km 7/97 p. 4.
What Is the Purpose of Life—How Can You Find It?
Taano ta kadakol na tawo ngonyan an garo baga bakong kontento sa saindang buhay?—Pahina 29-30, parapo 2, 25-6; Sal. 145:16; km 7/96 p. 4.
Enjoy Life on Earth Forever!
Napag-isip-isip na daw nindo kun ano an ginigibo ngonyan ni Jesu-Cristo?—Mga retrato 41-2; Kap. 11:15; km 8/96 p. 8.
The Government That Will Bring Paradise.
Boot daw nindong maaraman an manongod sa Kahadean na itinokdo sa sato ni Jesus na ipamibi?—Pahina 3; Mat. 6:9, 10; km 8/96 p. 8.
Kun Magadan an Sarong Namomotan.
Napaghorophorop na daw nindo kun paano rarangahon an saro na nagadanan nin namomotan?—Pahina 26, parapo 2-5; Juan 5:28, 29; km 7/97 p. 4.
Should You Believe in the Trinity?
An sato daw na pakasabot sa tunay na naturalesa nin Dios importante para sa satong ngapit?—Pahina 3, parapo 3, 7-8; Juan 17:3.
3 Brosyur na Nagpaparigon sa Pagtubod sa Biblia: Sa “Pagtubod sa Tataramon nin Dios” na Pandistritong mga Kombension kan nakaaging Disyembre asin Enero, naresibi niato an bagong brosyur na may titulong Sarong Libro Para sa Gabos na Tawo. Huling dai pa niato iinaalok an brosyur na ini sa langtad poon kan iyan iluwas, an kampanya ngonyan na Hulyo asin sa Agosto magigin ekselenteng oportunidad na mahiwas na ikadistribwir an bagong brosyur na ini sa langtad. Mantang iyan bago, maninigo iyan na makaakit sa mga nakabasa na kan satong naenot na mga brosyur asin boot na kumua kan gabos niatong pinakahuring mga publikasyon.
4 An bagong brosyur na ini iinandam tangani na tabangan an mga tawo na tibaad halangkaw an edukasyon alagad dikit an aram sa Biblia. Dinisenyo iyan tanganing motibaron sinda na magustong siyasaton an Tataramon nin Dios. Kun iinaalok an brosyur na ini, tibaad boot nindong gamiton an minasunod na suhestion:
Sarong Libro Para sa Gabos na Tawo.
Maoyon daw kamo na kabale sa pagkaigwa nin kompletong edukasyon an pagkua nin kaaraman sa mga laog kan Biblia?—Pahina 3, parapo 1-3 asin pahina 30, parapo 2; Ecl. 12:9, 10.
5 Brosyur Para sa Pag-adal sa Biblia: An satong katuyohan sa ministeryo maninigo na pirmeng makapoon nin pag-adal sa Biblia, magsalang sa enot na pagsongko o sa masunod na pagdalaw liwat. Sa katuyohan na iyan, igwa kita kan minasunod na pasil gamiton na brosyur para sa pagpoon asin pagkondukta nin mga pag-adal sa Biblia sa harong:
Ano an Kahagadan sa Sato nin Dios?
Aram daw nindo na sa laog nin 30 minutos o dai pa kada semana sa laog nin 16 na semana, puede kamong magkaigwa nin pundamental na pakasabot manongod sa Biblia?—Leksion 2, parapo 6; 2 Tim. 3:16, 17; km 3/97 p. 4.
6 Sa ilustrasyon manongod sa tataong makipagkapwa-tawong Samaritano, ipinaheling ni Jesus na an tunay na kataed iyo an naggigibo nin pagkamoot asin kabootan sa pagtabang sa saro na nasasakitan. (Luc. 10:27-37) An satong mga kataed nasa espirituwal na kasakitan. Kaipuhan nindang madangog an maogmang bareta. Isaabaga niato an paninimbagan na ihiras iyan sa sainda, sa siring pinatutunayan niato na kita tunay na mga disipulo ni Jesu-Cristo.—Mat. 24:14; Gal. 5:14.