Hapot

◼ Anong mga publikasyon an maninigo niatong ipakipag-adal sa mga bagohan bago an saindang bautismo?

Bago ikadusay nin saro an saiyang buhay ki Jehova asin makapabautismo, kaipuhan na ilaog nia sa isip an tamang kaaraman. (Juan 17:3) Makukua nia an impormasyon na kaipuhan nia paagi sa pag-adal kan brosyur na Ano an Kahagadan sa Sato nin Dios? sagkod kan librong Kaaraman na Minagiya Pasiring sa Buhay na Daing Katapusan. Sa kadaklan na kamugtakan an brosyur na Kahagadan an enot na pag-aadalan. Minsan siring, kun naponan an pag-adal sa librong Kaaraman, an brosyur na Kahagadan maninigong pag-adalan pakatapos kan libro. Taano ta kaipuhan ini?

An brosyur na Kahagadan nagtatao nin sumaryo kan pundamental na mga katokdoan sa Biblia. Kun enot na pag-aadalan, tatawan kaiyan an inaadalan nin pundamental na pakasabot manongod sa mga kahagadan sa pagpanigo ki Jehova. Kun sa huri pag-aadalan, iyan magseserbing marahay na repaso kan kinobrehan sa librong Kaaraman. Arin man digdi, enkaminaron an inaadalan na basahon an nagsusuportar na mga teksto asin horophoropon iyan. Seguradohon na tawan nin pagdodoon an mga retrato, huling iyan epektibong marhay na mga pantabang sa pagtotokdo.​​—Helingon an Enero 15, 1997 Torrengbantayan, pahina 16-​17.

Oras na matapos kan inaadalan sa Biblia an pag-adal sa duwang publikasyon, tibaad kaya na niang simbagon an gabos na hapot na rerepasohon sa saiya kan kamagurangan bilang pag-andam para sa bautismo. Kun iyo, tibaad dai na kaipuhan na konduktahan sia nin pormal na pag-adal sa arin man na iba pang publikasyon, minsan ngani maninigong magpadagos an konduktor na magkaigwa nin aktibong interes sa saiyang pag-oswag.​​—Helingon an Enero 15, 1996 na Torrengbantayan, pahina 14, 17.