Siisay an Puedeng Mag-ako nin Pag-adal sa Biblia?
1 Ipinahayag ni propeta Amos na magkakaigwa nin gutom sa daga nin Israel, “sarong gutom, bakong sa tinapay, asin pagkapaha, bakong sa tubig, kundi sa pagdangog kan mga tataramon ni Jehova.” (Amos 8:11) Para sa kapakinabangan kan mga nagugutom asin napapaha sa espirituwal, an organisasyon ni Jehova nagdidistribwir nin dakolon na babasahon sa Biblia sa bilog na kinaban.
2 Sagkod ngonyan, nakaimprenta na kita nin 70 milyones na librong Kaaraman asin 91 milyones na brosyur na Kahagadan. Sa pagtokdo kan katotoohan, inaapresyar niato an pagigin simple asin pagigin epektibo kan mga publikasyon na ini. Minsan siring, sa aktuwal kadakoldakol na nag-ako kan satong babasahon an dai pa nakikipag-adal sa sato sa Biblia. Ano an magigibo niato dapit kaini?
3 An Kada Napasakamotan Nangangahulogan nin Sarong Potensial na Inaadalan! Estudyare an eksperyensia nin sarong parahayag na nag-alok nin pag-adal sa sarong babae kan enot niang makaolay sia sa pinto. Sia tolos-tolos na nag-ako. Paghaloyhaloy sia nagsabi saiya, “Ika an kaenot-enote kasuarin man na nag-alok sa sako na makipag-adal sa Biblia.” Sa saindong teritoryo, pira na igwa na kan satong babasahon an puedeng magsabi man kaiyan? An kada pakapagpasakamot nagtatao nin oportunidad para sa mga pagdalaw liwat asin pag-adal sa Biblia sa harong.
4 Huling parate kitang nakanunupar nin mga tawong igwa na kan satong mga publikasyon, paano niato mapupukaw an saindang interes na manodan an laog kan satong babasahon? An sarong Saksi direktang hinapot an sarong kagharong kun igwa sia nin mga hapot sa Biblia, alagad ta sia nagsabing “Mayo.” Nagpadagos an tugang na babae, “Seguradong igwa.” Naghapot an babae, asin naponan an sarong pag-adal. Taano ta dai hapoton an kagharong kun boot niang manodan an punto de vista kan Biblia manongod sa sarong hapot o bagay na may labot sa saiya? Magin andam na magpalataw nin interesanteng hapot kun sia mayong maisip. An siring na mga pakikipag-olay puedeng buksan an dalan para sa regular na pag-adal kan pundamental na mga katotoohan sa Biblia.
5 An gibohon na pag-adal sa Biblia iyo an pinakasentro kan satong ministeryo. Huling dai niato noarin man aram kun siisay an puedeng mag-ako nin pag-adal, dai magduwaduwang mag-alok sa gabos na nanunuparan nindo. Sabihon an bagay na iyan sa pamibi ki Jehova, asin maghingoa kaoyon kan saindong mga pamibi. Sa dai mahahaloy puede nindong manompongan na an saro na inaalokan nindo nin pag-adal maako kaiyan!—1 Juan 5:14, 15.