‘Binalo Kun Baga Angay’—Paano?
1 Huli sa padagos na pag-oswag sa organisasyon ni Jehova, igwa nin nagpapadagos na pangangaipo para sa kualipikadong mga lalaki na maglingkod bilang ministeryal na mga lingkod. An kadaklan na tugang na lalaki na dai pa nombrado, kabale an mga tinedyer, may pagmawot na maglingkod sa kongregasyon. Kun sinda inaasignaran nin dagdag na gibohon, sinda nakakamate na sinda may pakinabang asin may nahaman. An saindang dugang pang pag-oswag depende sa saindang pagigin ‘binalo kun baga angay.’ (1 Tim. 3:10) Paano daw ini ginigibo?
2 An Kabtang kan Kamagurangan: Bilang kabtang nin pag-ebalwar sa sarong tugang na lalaki paagi sa mga kualipikasyon sono sa Kasuratan para sa ministeryal na mga lingkod na yaon sa 1 Timoteo 3:8-13, babaloon kan kamagurangan an pagigin angay nin sarong tugang na lalaki sa pagsaabaga nin paninimbagan. Tibaad iasignar ninda sia na gumibo nin nakatatabang na mga paglilingkod may koneksion sa pagtao nin mga magasin asin literatura, pag-asikaso nin mga mikropono, pagmantener kan Kingdom Hall, asin iba pa. Oobserbaran kan kamagurangan kun paano nia inaako asin inaasikaso an mga asignasyon sa saiya. Hahanapon ninda an mga kualidad na pagigin masasarigan, pagigin nasa oras, kahigosan, kababaan nin boot, gikan sa boot na aktitud, asin kakayahan na makibagay sa iba. (Fil. 2:20) Sia daw arogan sa saiyang paggubing asin pag-alinyar? Igwa daw sia nin pakamate nin paninimbagan? Gusto nindang maheling sa “saiyang marahay na gawe an saiyang mga gibo na may kahoyoan na gikan sa kadonongan.” (Sant. 3:13) Sia daw talagang naghihingoa na makatabang sa kongregasyon? Ginigibo daw nia an pagboot ni Jesus na ‘gumibo nin mga disipulo sa mga tawo’ paagi sa maigot na pakikikabtang sa ministeryo sa langtad?—Mat. 28:19; helingon an Torrengbantayan na Setyembre 1, 1990, pahina 13-23 (w90-E 9/1 p. 18-28).
3 Minsan ngani mayo nin itinaong pinakahababang edad tangani na an saro nombrahan bilang ministeryal na lingkod, inaapod kan Biblia an siring na mga tugang na lalaki na “mga lalaki na naglilingkod.” Dai nanggad niato sinda lalaoman na bago pa sana sa o nasa katahawan nin pagkatinedyer, nangorogna huli ta nasasambitan an posibilidad na pagkaigwa nin agom asin mga aki. (1 Tim. 3:12, 13) An siring na mga lalaki dai maninigong nagpapadaog sa “mga mawot na konektado sa pagkabarobata” kundi maninigong minagawe nin seryoso, na igwa nin marahay na kamugtakan asin malinig na konsensia sa atubangan nin Dios asin mga tawo.—2 Tim. 2:22.
4 Minsan ngani kapakipakinabang an natural na abilidad, an aktitud asin espiritu nin saro iyo an talagang mahalaga. Mapakumbaba daw na nagmamawot an sarong tugang na lalaki na omawon an Dios asin makapaglingkod sa saiyang mga tugang? Kun iyo, bebendisyonan ni Jehova an saiyang mga paghihingoa na umoswag sa kongregasyon.