Pamurawayon si Jehova Paagi sa Marahay na mga Gibo
1 Kun kamo inabotan nin makosogon na bagyo, kanigoan na kaginhawahan an pakakua nin masisirongan! Kun mainit asin ligtas sa laog saka kun mapag-istimar an mga residente, maoogma kamong magdanay dian. An paghuhulit kan Kahadean ginigiyahan an mga tawo pasiring sa sirongan na iyan hale sa sistema ni Satanas. An aroaldaw na gawe-gawe daw niato makatatabang na maheling kan iba kun gurano kanakaeenganyar an ligtas na sirongan na ini? Iyo, huli ta si Jesus nagsabi na ‘maheheling nin mga tawo an satong marahay na mga gibo asin pamumurawayon an satong Ama na nasa kalangitan.’—Mat. 5:16.
2 Paano kita magawe tanganing paagi sa satong mga gibo an iba maatraer ki Jehova asin sa saiyang organisasyon? Paagi sa pagtogot sa mga tataramon ni Jesus na nakasurat sa Lucas 6:31 asin 10:27 na moldehon an satong buhay kada aldaw. Momotibaron kita kaini na ipaheling an mamomoton na pagmalasakit sa mga kapwa, na ipinalalaen kita sa malipot asin mayong pagmakolog na kinaban na ini.
3 An sarong tugang na babae na sakay sa nagbibiaheng baroto naobserbaran an sarong hoben na babae na nalululang marhay kaya dai na kaini mahimong maasikaso an saiyang sadit na aki. Nag-alok an tugang na babae na asikasohon an aki. Kan maghapot an babae kun paano nia ikapaheheling an pasasalamat nia, an tugang na babae nagsabi: ‘Maghinanyog ka tabi sa mga Saksi ni Jehova sa sunod na pagsongko ninda.’ Ginibo iyan kan babae, asin ngonyan sindang mag-agom mga Saksi na. An marahay na mga gibo an nagdeterminar sa kun ano an nagin reaksion ninda sa mensahe kan Kahadean.
4 Kalabot an Bilog na Buhay Niato: Paagi sa satong gawe-gawe sa pagtaraed, mientras na nasa trabaho o nasa eskuelahan, asin durante kan mga panahon nin pag-aling-aling an iba nagbibilog nin opinyon manongod sa sato asin sa satong relihion. Huli kaini, maninigong hapoton ta an satong sadiri: ‘Ano an pagmansay sa sako asin sa sakong pamilya kan mga nagmamasid? Ibinibilang daw kan mga kataed an satong harong asin natad na malinig asin inaasikasong marhay? Kita daw minamansay kan satong mga katrabaho asin kaeskuela na nasa oras asin mahigos? Mabini asin kagalanggalang daw para sa iba an satong itsura?’ Paagi sa satong marahay na mga gibo an pagsamba ki Jehova puedeng magin orog na nakaaatraer sa iba.
5 Nagpatanid si Pedro na an mga Kristiano pag-oolog-ologon. (1 Ped. 4:4) Dapat niatong seguradohon na an satong gawe-gawe dai magin dahelan nin negatibong pag-orolay. (1 Ped. 2:12) Kun an satong aroaldaw na mga gibo nagpapamuraway sa Dios na satong sinasamba, dangan kita magigin siring kan mga lampara na iiniitaas, na pinapaypay an iba pasiring sa ligtas na sirongan na itinatao ni Jehova.—Mat. 5:14-16.