“Saen daw Ako Makakukua nin Panahon?”
1 Iyan an agrangay nin dakol sa sato, huli ta an satong buhay pano nin mga aktibidad. Sinasabi na an panahon an pinakamahalaga sagkod pinakatemporaryo sa satong mga kayamanan. Kaya saen daw kita makakukua nin panahon para sa mga bagay na talagang importante, arog baga nin pagbasa asin pag-adal sa Tataramon nin Dios?—Fil. 1:10.
2 An liabe, bakong paghanap nin dugang na panahon, kundi pagdesisyon kun ano an gusto niatong gibohon sa panahon na yaon sa sato. Kita gabos igwa nin 168 oras kada semana, na mga 100 kaiyan an tibaad ginagamit sa pagtorog asin sa pagtrabaho. Kaya paano niato magagamit sa pinakamarahay an natatada pang mga oras? Irinerekomendar kan Efeso 5:15-17 na kita maglakaw “bakong siring sa mga mangmang kundi siring sa mga madonong, na tinutubos an angay na panahon . . . , na saboton kun ano an kabotan ni Jehova.” Ipinaheheling kaini an pangangaipo na lubos na gamiton an lambang oportunidad na gibohon an mga bagay na sinasabi ni Jehova na mahalagang marhay.
3 Ikinomparar ni Jesus an satong kaaldawan sa kaaldawan ni Noe. (Luc. 17:26, 27) An mga tawo kaidto sibot sa aroaldaw na mga aktibidad sa buhay. Minsan siring, si Noe nakakua nin panahon sa pagtogdok nin sarong grabe kadakulang dahong asin sa paghulit. (Heb. 11:7; 2 Ped. 2:5) Paano? Paagi sa pag-enot kan kabotan nin Dios asin pagkuyog sa saiya paagi sa paggibo kan mga bagay nin “siring nanggad.”—Gen. 6:22.
4 Ano an Maninigong Enoton? Si Jesus nagsabi: “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mat. 4:4) Serosemana, nag-aako kita nin espirituwal na “kakanon sa igong panahon.” (Luc. 12:42) Ini nagkakaipo nin iskedyul para sa regular, personal na pagbasa asin pag-adal tangani na masabotan gabos iyan kun gusto niato na talagang makinabang. Huli sa pagpasalamat sa espirituwal na kakanon, dai niato iyan minamansay na arog sa fast food, na kinakakan nin madali sana siring kan tibaad pagkakan nin materyal na kakanon na naghihidali. Imbes, an tamang pag-apresyar pinahihiro kita na tawan nin panahon na pag-adalan an asin masiraman sa espirituwal na mga bagay.
5 An pagkakan nin espirituwal na kakanon puedeng magbunga nin buhay na daing katapusan. (Juan 17:3) Iyan maninigong nasa pangenot na lugar sa satong aroaldaw na iskedyul. Puede daw kitang makakua nin panahon tangani na matawan nin lugar an aroaldaw na pagbasa sa Biblia asin pag-andam para sa Kristianong mga pagtiripon? Iyo, makakukua kita. Kun siring, aakoon niato an “dakulang balos” na naggigikan sa pakaaram asin paggibo kan kabotan nin Dios.—Sal. 19:7-11.