Dakula daw an Teritoryo kan Kongregasyon Nindo?
1 Poon sa mga siudad sa Judea sagkod sa puerang mga lugar nin Galilea, si Jesus nagtao nin sigidong patotoo sa bilog na dakulang teritoryo kan suanoy na Israel. (Mar. 1:38, 39; Luc. 23:5) Dapat man na paabotan niato kan maogmang bareta an pinakadakol na tawong mapupuede. (Mar. 13:10) Minsan siring, ini puedeng magin angat. Taano?
2 An dakol na kongregasyon sa Pilipinas igwa nin teritoryo na suruwaysuway sa darakulang lugar, na an kadaklan bulod asin masakit madumanan. Ano daw an magigibo niato tangani na matabangan an mga tawong nag-iistar sa siring kahiwas na mga teritoryo na makanood kan katotoohan manongod ki Jehova, ki Jesus, asin sa Kahadean?
3 Maingat na Magplano: An paraataman sa paglilingkod asin an nag-aasikaso sa teritoryo kaipuhan na koordinaron an paghihingoa kan kongregasyon na magibo an pinakamarahay. Tibaad puedeng mag-iskedyul nin espesyal na mga Sabado na sa panahon na iyan an kadaklan makahihimong gamiton an bilog na aldaw sa paghuhulit. Kun naghuhulit sa hararayong teritoryo, magplano na gumamit nin mas halawig na mga aldaw sa paglilingkod sa langtad kun posible, na nagbabalon nin pangodtohan. Puede kamong magtiripon bago lumuwas sa paglilingkod nin mas amay kisa sa dati tangani na matawan nin panahon an pagbiahe pasiring sa teritoryo o gibohon an pagtiripon bago lumuwas sa paglilingkod sa langtad sa lugar na harani sa teritoryong huhulitan. Iareglo na maghulit sa puerang mga lugar sa mga panahon na marahay an kamugtakan nin panahon asin tinampo.
4 Kun an kamagurangan may aram na sarong kaharaning kongregasyon na natatapos nin parate an teritoryo kaiyan, tibaad booton kan kamagurangan na imbitaran sinda na umiba sa saindong kongregasyon sa paghuhulit sa hararayong teritoryo, nangorogna kun mga bulan nin tig-init. An siring na kooperasyon puedeng magin nakagagayagaya asin mabunga.
5 Seguradohon na magdara nin supisyenteng mga babasahon. Kun bihirang mahulitan an teritoryo, tibaad angay na magwalat nin pulyeto o haloy nang magasin sa mga harong na mayong tawo. Ialok an pulyetong Ano Gusto Nindong Makaaram Pa nin Orog Manongod sa Biblia? sa gabos na nanonompongan nindo.
6 Lubos na Makikooperar: An paghuhulit sa sarong dakulang teritoryo nagkakaipo nin kooperasyon kan gabos na nasa kongregasyon. Kun kaipuhan an kadakol na pagbiahe, an iribang nagbibiahe puedeng magtarabangan sa gastos sa gasolina. Maninigong gamiton an marahay na paghusgar kun nakanonompong kamo nin mga kagharong na andam na makipag-olay. Magin pirmeng mapagrisa sa pangangaipo na madumanan an gabos sa teritoryo, asin magin makonsiderasyon sa mga naghahalat sa saindong grupo. Kun gusto nindong ipagpadagos an pakikipag-olay sa sarong interesado sa halawig na oras, puede daw gumibo nin mga areglo tangani na an iba sa grupo dai maatraso?
7 Gumibo nin depinidong mga areglo na balikan an gabos na interesado. Isurat an adres sa koreo tanganing padagos kamong makapatotoo paagi sa koreo. Kun mayong ngaran an mga tinampo sa puerang mga lugar o mayong numero an mga harong, maingat na magdrowing nin sarong mapa o isurat an deskripsion kun paano makukua an interesado sa pagdalaw liwat.
8 Kanigoan na pribilehio niato na gibohon an mga instruksion ni Jesus: “Sa ano man na siudad o baryo kamo lumaog, hanapon nindo kun siisay dian an maninigo”! (Mat. 10:11) Seguradong bebendisyonan ni Jehova an saindong mga paghihingoa mantang boluntad na itinatao nindo an panahon asin kosog para sa iba sa pinakamahalagang gibohon na ini!