An Tataramon nin Dios Katotoohan
1. Anong importanteng impormasyon an yaon sa Biblia?
1 “An sustansia kan saimong tataramon katotoohan,” an isinurat kan salmista. (Sal. 119:160) Paagi sa saiyang ipinasabong na Tataramon, si Jehova nagtatao nin nakakokontentong simbag sa pinakaimportanteng mga hapot sa buhay. Sia nagtatao nin karangahan asin paglaom sa mga may problema. Asin ipinaheheling nia sa sato kun paano kita makararani sa saiya. “An pakanood kan katotoohan hale sa Biblia kapareho nin paghale sa sarong madiklomon saka mamondoon na lugar asin paglaog sa sarong maliwanag, maogma, saka nakagagayagayang kuarto,” an sabi nin sarong mapag-apresyar na babae. Hinihingoa daw nindong ipaabot an katotoohan hale sa Tataramon nin Dios sa gabos na oportunidad?
2. Paano pinararahay kan Biblia an buhay nin mga tawo?
2 Nakapababagong Puersa Asin Unibersal na Pan-akit: An katotoohan sa Biblia may puersa na pahiroon an puso asin bagohon an mga buhay. (Heb. 4:12) An sarong hoben na babae na an ngaran Rosa napalabot sa prostitusyon, saka sa pag-abuso sa inomon na de alkohol asin pagdodroga. “Sarong aldaw, kan grabe an pagkadesesperar ko,” an sabi nia, “an sarong mag-agom na Saksi nakipag-olay sa sako manongod sa kun paano kita matatabangan kan Biblia na resolberan an satong mga problema. Nagpoon akong mag-adal kan Tataramon nin Dios, na nanompongan kong kawiliwili. Bago matapos an sarong bulan nagkaigwa ako kan kosog na magkaigwa nin malinig asin bagong pamumuhay. Ngonyan na igwa na ako nin katuyohan sa buhay, dai ko na kaipuhan an tabang nin inomon na de alkohol o droga. Asin huling gusto kong marhay na magin katood ni Jehova, determinado akong mamuhay oyon sa mga pamantayan nia. Kun bakong huli sa praktikal na kadonongan kan Tataramon nin Dios, segurado ako na ngonyan tinapos ko na kutana an sakong buhay.”—Sal. 119:92.
3. Taano ta dai kita maninigong magpogol sa pagpaabot sa iba kan mensahe kan Biblia?
3 Bakong arog kan kadaklan na libro ngonyan, an Biblia nakakaakit sa mga tawo sa ‘gabos na nasyon, tribo, banwaan, patin tataramon.’ (Kap. 7:9) An kabotan nin Dios iyo “na an gabos na klase nin tawo makaligtas asin makaabot sa tamang kaaraman sa katotoohan.” (1 Tim. 2:4) Kun siring, dai niato noarin man ipamugtak na an saro dai mahimate sa maogmang bareta huli sana sa saiyang klase nin buhay. Imbes, ipaabot sa gabos an mensahe kan Kahadean, na ginigibo iyan direktamente hale sa Biblia kun posible.
4. Paano niato magagamit an Biblia kun naghuhulit?
4 Itampok an mga Teksto: Dakol nin oportunidad na magagamit an Biblia sa ministeryo. Kun iinaatubang an mga magasin, pagmaigotan na iiba an teksto na yaon sa isinuherir na pag-atubang. Kun ginagamit an alok na babasahon para sa bulan, nanompongan nin nagkapira na epektibo na iiba an pagbasa nin sarong maingat na piniling teksto sa pambukas na introduksion kaiyan. Kun nagdadalaw liwat, ihiras an saro o labi pang teksto sa Biblia kada pagdalaw tanganing tabangan an kagharong na progresibong makakua nin tamang kaaraman. Kun namamayo nin pag-adal sa Biblia, isentro an pag-orolay sa mayor na mga teksto. Kun dai nakikikabtang sa pormal na ministeryo, magdara nin Biblia na madaling magagamit kun magkaigwa nin mga oportunidad na maghulit nin impormal.—2 Tim. 2:15.
5. Taano ta maninigo niatong hingoahon na gamiton an Biblia sa satong ministeryo?
5 Logod na tabangan niato an iba na makinabang sa nakamomotibar na puersa kan Tataramon nin Dios na katotoohan paagi sa paggamit kan Biblia sa gabos na angay na oportunidad sa satong ministeryo.—1 Tes. 2:13.