Bagong Programa sa Aldaw nin Espesyal na Asamblea
Kun kita nakakaheling o nakakadangog nin sarong patanid alagad dai minahiro oyon dian, an resulta puedeng magin kapahapahamak. Mas importante pa ngani na humiro oyon sa espirituwal na paggiya na itinatao ni Jehova. Ini an idodoon sa programa sa aldaw nin espesyal na asamblea para sa taon 2005. An tema “Tawan Nindo nin Atension Kun Paano Kamo Naghihinanyog.”—Luc. 8:18.
Sa enot na pahayag nia, ipapaliwanag kan nagdadalaw na ispiker kun paano aplikado sa sato ngonyan an sadol na yaon sa enot na mga kapitulo kan ipinasabong na surat ni Pablo sa mga Hebreo. Sa pantapos na pahayag, “Pirmeng Magtao nin Atension sa Pagtotokdo nin Dios,” tatabangan nia an gabos na siyasaton kun baga sinda talagang naghihinanyog ki Jehova, sa saiyang Aki, asin sa “maimbod asin mapagmansay na oripon.”—Mat. 24:45.
Nangorognang magigin kapakipakinabang para sa mga pamilya an nagkapirang kabtang sa programa. An “Mga Pamilya na Naghihinanyog sa Tataramon nin Dios na Mayo nin Disturbo” tatabangan kita na dai manluya an satong espirituwalidad huli sa mga bagay sa kinaban. May kaiba iyan na mga interbio sa mga naggibo nin mga pagbabago tanganing enoton an espirituwal na mga bagay. An “Kun Paano an Atentong Paghinanyog sa Tataramon nin Dios Nagpapasarig sa Satong mga Hoben” may kaibang mga interbio sa mga hoben na nanindogan para sa katotoohan sa eskuelahan, sa mga kaedad ninda, o sa ministeryo. An “Saradit na Aki na Naghihinanyog sa Dios asin Nakakanood” tatabangan kita na dai pagmenoson an kakayahan kan saradit na aki na makanood. An mga interbio sa saradit na aki asin sa saindang mga magurang tatabangan kita na maheling an pakinabang na resulta nin pagsasanay sa mga aki sa dalan ni Jehova poon sa pagkaomboy.
Minsan ngani “ilinalagalag [ni Satanas] an bilog na ineerokan na daga,” ipinapaheling ni Jehova sa mga maimbod na lingkod nia an dalan na maninigo nindang lakawan. (Kap. 12:9; Isa. 30:21) An atentong paghinanyog sa saiyang hatol asin makinuyog na pag-aplikar kaiyan sa satong buhay nagpapadonong sa sato, nagtatao sa sato nin kaogmahan, asin naggigiya pasiring sa buhay na daing katapusan.—Tal. 8:32-35.