Bagong Programa sa Aldaw nin Espesyal na Asamblea
An mata sarong makangangalas na disenyo. (Sal. 139:14) Pero, iyan nakakapokus nin pasarosaro sana. Totoo iyan sa literal sagkod sa piguratibong paagi. Tangani na an satong espirituwal na pakaheling magin malinaw asin nakapokus, dapat na isentro niato an satong atension sa paggibo kan kabotan nin Dios. Huli sa paorog nang paorog na mga disturbo kan kinaban ni Satanas, angay nanggad na ipapaliwanag kan programa sa aldaw nin espesyal na asamblea para sa 2006 an temang “Papagdanayon na Simple an Saindong Mata”!—Mat. 6:22.
Ano an magigibo niato tanganing mag-ako nin mga bendisyon hale ki Jehova? (Tal. 10:22) Totokaron an hapot na ini sa kabtang na “Mag-ani nin mga Bendisyon sa Pagpapadanay nin Simpleng Mata.” Itatampok nin mga interbio kun paano kita makikinabang sa pag-aplikar kan mga prinsipyo na sono sa Kasuratan. An enot na pahayag kan nagsosongkong ispiker, “Pagpapadanay nin Simpleng Mata sa Sarong Maraot na Kinaban,” magpapatanid sa sato manongod sa mga bagay na puedeng makapakomplikar sa satong buhay asin luway-luway na makaolang sa pagtalubo kan satong espirituwalidad. Manonodan man niato kun ano an kalabot sa pagpili kan “marahay na kabtang.”—Luc. 10:42.
Paano maeenkaminar nin mga magurang asin nin iba an Kristianong mga hoben na magkonsentrar sa espirituwal na mga pinag-aaabot? An mga kabtang na “Mga Magurang na Iinaasentar nin Tama an Saindang mga Pana” asin “Mga Hoben na Naghihingoang Aboton an Espirituwal na mga Pasohan” may kaibang mga kapahayagan hale sa mga magurang asin hoben manongod sa importanteng hapot na ini. (Sal. 127:4) Totokaron kan pantapos na pahayag kan nagsosongkong ispiker kun paano kita maoswag kadungan kan organisasyon ni Jehova bilang mga indibiduwal, bilang mga pamilya, asin bilang sarong kongregasyon.
Baga man bago pa sana niatong manodan an katotoohan o dakol na dekada nang naglilingkod ki Jehova, mahalagang marhay na ‘papagdanayon na simple an satong mata.’ Tatabangan kita kan programa sa aldaw nin espesyal na asamblea na magibo nanggad iyan.