Magpaheling nin Personal na Interes—Paagi sa Pagpapadanay nin Epektibong Mata sa Matang Kontak
1 Kun naghuhulit sa publiko asin sa harong-harong, sa parate kita nag-eestablisar nin mata sa matang kontak sa mga tawo bago kita magpoon na magtaram. Sa halipot na panahon na iyan, puede niatong marisa sa ekspresyon kan saindang lalauogon kun ano an saboot ninda manongod sa satong presensia asin pati kun ano an disposisyon kan saindang isip. Kaagid kaiyan, dakol sindang puedeng marisa sa sato. Ini an sinabi nin sarong babae manongod sa pagdalaw nin sarong Saksi: “An narurumdoman ko sa saiyang nakahuyom na lalauogon iyo an pagigin kalmado. Napukaw an interes ko.” Nabuksan kaini an dalan tangani na an babae maghinanyog sa maogmang bareta.
2 An pag-establisar nin mata sa matang kontak sa iba sarong epektibong paagi na makapoon nin pagpatotoo kun naghuhulit sa tinampo o sa iba pang pampublikong mga lugar. An sarong tugang na lalaki minamasdan an mata kan mga naglalakaw parani sa saiya. Kun may humeling sa saiya, sia minahuyom dangan iinaalok nia an mga magasin. Sa paggamit kan pamamaaging ini, sia nagkakaigwa nin dakol na nakakaogmang pakikipag-olay asin nakakapasakamot nin dakol na babasahon.
3 Risahon an Saboot nin Iba: An pagpapadanay nin mata sa matang kontak matabang sa sato na marisa an saboot nin iba. Halimbawa, kun an saro nadedepisilan sa pagsabot sa sato o dai minaoyon sa sinabi niato, sa parate iyan maheheling sa saiyang lalauogon. Kun sia sibot o nalalangkag na, maririsa niato iyan paagi sa pag-obserbar sa ekspresyon kan saiyang lalauogon. Kun siring, puede niatong liwaton o pahalipoton an satong pag-atubang huli kaiyan. An pagigin mapagrisa sa saboot nin iba sarong marahay na paagi na ikapaheling an satong personal na interes sa sainda.
4 Sinseridad Asin Kombiksion: Sa dakol na kultura, an pagheling sa mata nin sarong tawo minamansay na ebidensia na an saro sinsero. Mangnohon kun paano si Jesus nagsimbag kan maghapot an saiyang mga disipulo: “Siisay talaga an maliligtas?” An Biblia nagbabareta: “Hineheling sinda sa lalauogon, si Jesus nagsabi sa sainda: ‘Sa mga tawo ini imposible, alagad sa Dios an gabos na bagay posible.’” (Mat. 19:25, 26) Mayong duwa-duwa na an kombiksion sa mga mata ni Jesus nakadagdag sa puersa kan saiyang mga tataramon. Sa siring man na paagi, an pagpapadanay nin epektibong mata sa matang kontak matabang sa sato na ikapahayag an mensahe kan Kahadean na may sinseridad asin kombiksion.—2 Cor. 2:17; 1 Tes. 1:5.