Bagong Programa sa Pansirkitong Asamblea

Gusto kitang papaniwalaon kan kinaban na magdadanay sagkod lamang an presenteng sistema nin mga bagay. Minsan siring, laen man an sinasabi sato kan Tataramon nin Dios. (1 Juan 2:15-17) Tinatabangan kita kaiyan na masabotan na daing kamanungdanan an pagmamaigot na ‘magtipon nin mga kayamanan sa daga.’ Tanganing pasarigon an banwaan nin Dios, ipapaliwanag kan programa sa pansirkitong asamblea na mapoon sa Pebrero 2007 an temang “Magtipon . . . nin mga Kayamanan sa Langit.”—Mat. 6:19, 20.

Kaiba an materyalistikong kaisipan sa sinasambit sa Efeso 2:2 na an “autoridad kan aire, an espiritu na naghihiro ngonyan sa mga aki nin kasumbikalan.” Kun paanong yaon sa gabos na lugar an literal na aire, na andam na hangoson, lakop man sa sistemang ini “an espiritu kan kinaban.” (1 Cor. 2:12) Mantang mapuersang marhay an impluwensia kaiyan, sinasabi na iyan igwa nin “autoridad.” Tatabangan kita kan bagong programa sa pansirkitong asamblea na likayan an materyalistikong kaisipan kan kinaban asin pagdanayon na malinaw sa isip an satong mga prioridad. (Mat. 6:33) Dugang pa, tatabangan kita kan programa na magsarig ki Jehova mantang ginigibo niato an satong ministeryo sa ibong kan mga sakit asin pagbalo na tibaad mapaatubang sa sato.

Seguradohon nindo na presente kamo sa duwang aldaw na iyan asin na ‘magtao kamo nin orog kisa dating atension.’ (Heb. 2:1) Kumua nin haralipot na nota sa mga punto na personal nindong ikakaaplikar sa saindong buhay asin sa saindong ministeryo. Paagi sa pagigin presente sa kapinonan sagkod sa katapusan mismo kan nakakaparahay sa espirituwal na programang ini, maeenkaminar asin mapapakosog kamo na padagos na ‘magtipon nin mga kayamanan sa langit’!