Bagong Programa sa Aldaw nin Espesyal na Asamblea

Huling napakosog kan banal na espiritu, naghingoa nin maigot an enot na mga Kristiano sa pagbalangibog kan maogmang bareta sa pinakamahiwas na mapupuede. (Gibo 1:8; Col. 1:23) An bagong programa sa aldaw nin espesyal na asamblea, “Masibot na Gayo sa Tataramon,” matabang sa sato na arogon an saindang marahayon na halimbawa. (Gibo 18:5) Mapoon an programang ini sa Pilipinas sa Pebrero 2007.

Sa pagkomento sa tataramon nin Dios, si Hadeng David nagsabi: “An pagirumdom ni Jehova mapagtitiwalaan, na nagpapadonong sa daing eksperyensia.” (Sal. 19:7) Itatampok kan maingat na inandam na programa para sa aldaw nin espesyal na asamblea sa 2007 an kahalagahan kan Kasuratan “sa paghusay kan mga bagay” asin iyan maenkaminar sa sato na gamiton an Tataramon nin Dios sa paghuhulit asin pagtotokdo na may pakamate nin pag-apura. (2 Tim. 3:16, 17) Ipapaheling kan bagong programa kun paano kita makakalikay sa natatagong mga peligro asin makikinabang paagi sa pag-aplikar kan mga prinsipyo sa Biblia sa pan-aroaldaw na buhay. Matabang man iyan sa sato na gamiton an Tataramon nin Dios sa pagtabang sa mga hoben asin bagohan na umoswag sa espirituwal.

Seguradohon na presente na kita sa pagpoon kan programa, asin maghinanyog nin maingat. Kumua nin mga nota sa mga punto na personal nindong ikakaaplikar. Ipaheling an pag-apresyar nindo sa inakong instruksion asin mga pagirumdom, patin isip-isipon kun paano nindo pinaplanong isagibo an mga bagay na nanodan.

An programa sa aldaw nin espesyal na asamblea dadagdagan an satong pag-apresyar sa Tataramon nin Dios, papagirumdomon kita na padagos na magin marigon sa paghuhulit kan maogmang bareta kan Kahadean na may kaigotan, asin ipapaheling sa sato kun paano tatabangan an iba na gibohon man iyan. Kaya magin desidido na dai malipasan an ano man na espirituwal na paggiya asin instruksion na itinatao ni Jehova sa paaging ini!—Isa. 30:20b, 21.