Hapot

◼ Ano an mga peligro sa paggamit kan Internet tanganing makikomunikar sa saro na dai niato kamidbid?

Dakol na Web site an ginibo tanganing an mga tawo makipagmidbidan asin makipagkomunikar paagi sa Internet. Sa dakol sa mga site na ini, an mga indibiduwal puedeng maggibo asin magpaheling kan sainda mismong profile, na tibaad kaiba an mga retrato asin iba pang personal na impormasyon. Dangan, an mga tawong nagheheling kan profile puedeng makikomunikar sa sainda. An siring na mga Web site popular na marhay sa mga hoben, asin ginagamit iyan nin nagkapirang hoben sa kongregasyon tanganing makikomunikar sa iba na naghihingakong mga Saksi ni Jehova.

Pasil sana para sa sarong tawo na namidbid niato paagi sa Internet na mandaya manongod sa kun siisay sia, manongod sa saiyang espirituwalidad, o manongod sa saiyang mga motibo. (Sal. 26:4) An totoo, an sarong indibiduwal na nagsasabing sia saro sa Mga Saksi ni Jehova tibaad daing pagtubod, tiwalag, o aktibong apostata pa ngani. (Gal. 2:4) Segun sa bareta, dakol na nakikidorog sa mga aki an naggagamit nin siring na mga Web site tanganing makakua nin mga biktima ninda.

Dawa kun kombensido kita na an mga nakakakomunikar niato may marahay na kamugtakan sa kongregasyon, an mga pakikikomunikar sa siring na kamugtakan puedeng madali sanang mapasiring sa nakakaraot na mga bagay. Ini huli ta an mga tawo may tendensiang daing gayo mag-alangan sa mga indibiduwal na dai pa ninda namimidbid nin personal. Tibaad minamansay man ninda na pribado an pakikikomunikar paagi sa Internet asin naniniwala na an ano man na sinasabi ninda dai maaaraman nin iba, arog baga kan saindang mga magurang o kan kamagurangan. Makamomondo, dakol na hoben sa Kristianong mga pamilya an nasiod asin napalabot sa bastos na pagtaram. (Efe. 5:3, 4; Col. 3:8) An iba nagbugtak sa saindang profile sa komputer nin nakakapukaw sa sekso na mga retrato ninda, mga bastos na gaha, o mga koneksion (link) pasiring sa bulgar na seksuwal na mga video nin musika.

Huli sa nasambitan sa enotan, maninigong subaybayan nin mga magurang an paggamit kan saindang mga aki nin komputer. (Tal. 29:15) Magigin peligroso na imbitaran sa satong harong an sarong dai kamidbid o pabayaan siang magsolo kaiba an satong mga aki. Siring man, peligroso para sa sato o sa satong mga aki na makikatood sa mga dai kamidbid paagi sa Internet, dawa kun sinda nagsasabi na sinda mga Saksi ni Jehova.—Tal. 22:3.