Aprobetsaran an mga Pagkakataon Mo na Ipalakop an Mensahe kan Kahadian!
1. Ano an manunudan niyato sa halimbawa ni David?
1 Dai tinugutan ni Hading David na maulang siya kan mga nagin kamugtakan niya sa buhay. Halimbawa, gusto niyang magpatugdok nin harong para ki Jehova. Kan pugulan siya sa paggibo kaiyan, binago niya an saiyang mga pasuhan asin inandam an mga kakaipuhanon ni Solomon sa pagtugdok kan templo. (1 Ha. 8:17-19; 1 Cron. 29:3-9) Imbes na pagparaisipon an dai niya magigibo, nagpokus siya sa kun ano an magigibo niya. Paano ta maaarog si David mantang naghahanap kita nin paagi para ipalakop an mensahe kan Kahadian?
2. Anong pagsiyasat sa sadiri an puwede tang gibuhon?
2 Gibuhon an Magigibo Mo: Dakul an nagpasimple nin buhay para makapag-auxiliary o regular payunir. (Mat. 6:22) Magigibo mo man daw iyan? Isip-isipon asin ipamibi an saimong kamugtakan. Sa paggibo kaiyan, tibaad mahiling mo na “sarong dakulang pinto na pasiring sa gibuhon” an nakabukas sa saimo. Kun siring, aprobetsaran an pagkakataon na iyan!—1 Cor. 16:8, 9, NW.
3. Anong mga pagkakataon para makapagpatotoo an puwedeng aprobetsaran dawa dai itinutugot kan satong kamugtakan na makapagpayunir?
3 Paano kun dai itinutugot kan kamugtakan mo na makapagpayunir? Dai palampason an iba pang oportunidad. Halimbawa, kun nakakaulay mo sa trabaho an mga bakong kapagtubod, taano ta dai aprobetsaran an angay na mga pagkakataon na magpatotoo sa sainda? O kun nagpapabulong ka, puwede mo daw patotoohan an mga nars asin doktor o iba pang health-care provider? Tandaan na may probisyon para sa mga nalilimitaran na marhay an aktibidad huli sa edad o grabeng problema sa salud na magreport nin 15 minutos. Sa pagreport kada bulan, siguraduhon na iiba an oras na ginamit sa impormal na pagpapatotoo pati na an naipasakamot na mga literatura, tract, asin imbitasyon sa Memoryal saka kumbensiyon. Pag nagkatiripon ini, mangalas ka na sana kun gurano kadakul na oras an nagamit mo sa garo saradit sanang mga pagkakataon na iyan!
4. Ano an determinasyon mo?
4 Ano man an kamugtakan ta, aprobetsaran an lambang pagkakataon na ipalakop an maugmang bareta. Paagi kaiyan, makakamati kita nin pagkakontento huling aram tang ginibo ta an satong pinakamakakaya para sa Kahadian.—Mar. 14:8; Luc. 21:2-4.