An Nakakatakot na Epekto kan Giyera
Grabe nanggad an puwedeng magin epekto sa mga tawo kan giyera saka mga ralaban. Aram iyan kan mga suldados saka mga sibilyan sa bilog na kinaban na nakaeksperyensiya mismo kaiyan.
MGA SULDADOS
“Grabe an mga nangyayari sa palibot. Dai mo hunaon na makakahiling ka nin mga tawong ginagadan o naiirido. Dai mo na talaga mamamati na ligtas ka.”—Gary, Britania.
“Tinamaan ako nin bala sa likod saka sa lalawgon, tapos nahiling kong ginagadan an dakul na tawo, dawa mga aki saka mga may edad na. Pinapabagol kan giyera an puso mo.”—Wilmar, Colombia.
“Pag may binadil sa atubangan mo mismo, dai iyan basta-basta mahahali sa isip mo. Pati pagkurahaw saka pag-agrangay niya garo pirmi mong nadadangog. Dai mo talaga iyan malilingawan.”—Zafirah, Estados Unidos.
MGA SIBILYAN
“Pagmati ko dai na lamang ako magigin maugma. Natatakot ako, pero mas natatakot ako sa puwedeng mangyari sa pamilya ko saka sa mga amigo ko.”—Oleksandra, Ukraine.
“Takuton akong magpila puon alas dos nin maagahon sagkod alas onse nin matanga para makakua nin pagkakan, ta ’baad bigla na sana akong tamaan nin bala.”—Daler, Tajikistan.
“Nagadan an mga magurang ko huli sa giyera. Solo-solo na lang ako sa buhay, na mayong nagraranga o nagmamakulog.”—Marie, Rwanda.
Dawa ngani grabe an inagihan ninda huli sa giyera, nagkaigwa pa man giraray sinda nin katuninungan. Nakumbinsir man sinda na madali nang matapos an gabos na giyera saka mga ralaban. Paano iyan mangyayari? Ipapaliwanag sa isyung ini kan An Torrengbantayan kun ano an sinasabi kan Bibliya manungod diyan.