Kun Paano Ka Magkakaigwa nin Katuninungan Dawa May mga Giyera Asin Ralaban
“Bago ako nag-adal nin Bibliya,” an sabi ni Gary, na dating nagserbi sa militar, “dai ko aram kun taano ta kadakul nin nangyayaring karingisan, inhustisya, asin iriwal sa kinaban. Pero ngunyan, matuninong na an isip ko. Aram ko na gigibuhon kan Diyos na Jehova na magin sarong ligtas na lugar an kinaban.”
Bako lang si Gary an nakakamati kaiyan. Pag-isipan kun paano nakatabang an Bibliya sa iba pang mga indibidwal.
AN SABI KAN BIBLIYA: “Ika, O Jehova, marahay asin andam na magpatawad.”—Salmo 86:5.
KUN PAANO INI NAKATABANG: “Natabangan ako kan bersikulong ini na magin sigurado na talagang mahihirakon si Jehova. Aram ko na papatawadon niya ako sa gabos na ginibo ko kaidto kan nagpartisipar ako sa giyera.”—Wilmar, Colombia.
AN SABI KAN BIBLIYA: “Naglalalang ako nin bagong mga langit asin sarong bagong daga; asin an dating mga bagay dai na masabong pa sa isip, asin an mga iyan dai na mapapasapuso.”—Isaias 65:17.
KUN PAANO INI NAKATABANG: “Dahil sa mga inagihan ko kaidto sa militar, nagkaigwa ako nin post-traumatic stress disorder saka depresyon. Pero ipinagirumdom sako kan bersikulong ini na madali nang halion ni Jehova an nakakapurisaw na mga bagay sa isip ko saka an bakong magayon na inagihan ko kaidto na pirmi kong nagigirumduman. Dai na lamang iyan malaog sa isip o puso ko. Magayunon nanggad na regalo!”—Zafirah, Estados Unidos.
AN SABI KAN BIBLIYA: “Sa saiyang mga aldaw, an matanos magigin marambong, asin an katuninungan magigin abunda sagkod na an bulan mawara na.”—Salmo 72:7.
KUN PAANO INI NAKATABANG: “Pigpaparaisip-isip ko an mga tataramon na ini. Dai na mahahaloy, matatapos na an giyera asin an gabos na maraot na mga bagay na dara kaiyan. Kaya dai na kita mahahadit sa kaligtasan kan satong mga mahal sa buhay.”—Oleksandra, Ukraine.
AN SABI KAN BIBLIYA: “Magkakaburuhay an saimong mga gadan. . . . Magmata kamo asin magkurahaw na may kaugmahan, kamong mga nag-iistar sa alpog!”—Isaias 26:19.
KUN PAANO INI NAKATABANG: “Haros gabos na kapamilya ko ginadan sa genocide dahil kabilang kami sa tribo nin Tutsi. Pero sinisigurado kan bersikulong ini sa sako na mahihiling ko giraray sinda. Gustong-gusto ko nang mag-abot an panahon na madadangog ko giraray an maugmang boses ninda pag binuhay na sinda liwat!”—Marie, Rwanda.
AN SABI KAN BIBLIYA: “Dikit na sanang panahon, asin an mga maraot mawawara na . . . Alagad magigin pagsadiri kan mga mahuyo an daga, asin makakanumpong sinda nin labi-labing kaugmahan huli sa abundang katuninungan.”—Salmo 37:10, 11.
KUN PAANO INI NAKATABANG: “Dawa ngani tapos na an giyera, igwa pa man giraray nin inhustisya asin maraot na mga tawo. Nakatabang na marhay sa sako an mga bersikulong ini. Nahihiling ni Jehova an gabos saka nasasabutan an sitwasyon ko. Nangangako siya na madali na niyang tapuson an gabos na pagsakit saka dai na iyan magigirumduman pa.”—Daler, Tajikistan.
Kabilang sa minilyon na mga Saksi ni Jehova an mga indibidwal na sinambit sa magasin na ini. Natabangan sinda kan Bibliya na manumpungan an katuninungan. Nanudan ninda kun paano mapangganahan an pagkaungis huli sa rasa, nasyonalidad, tribo, asin personal na dahilan. (Efeso 4:31, 32) An mga Saksi ni Jehova neutral pag-abot sa pulitika saka dai nakikikabtang sa mga ralaban.—Juan 18:36.
An mga Saksi ni Jehova sa bilog na kinaban garo sarong pamilya na namumutan saka sinusuportaran an kada saro. (Juan 13:35) Halimbawa, huli sa giyera kinaipuhan na maghali sa nasyon ninda si Oleksandra, na sinambit kasubago, kaiba an saiyang tugang. An sabi niya: “Kan makabalyo na kami sa border, nahiling mi tulos an mga Saksi duman na masabat samo para i-welcome kami. An suporta ninda nakatabang samo na maka-adjust sa pag-istar sa bagong nasyon bilang mga refugee.”
Maugma mi ikang iniimbitaran na mag-atender sa samong mga pagtiripon para manudan an mensahe kan Bibliya manungod sa katuninungan asin kun paano iyan isasabuhay. Magduman sa jw.org/bcl para makahanap nin lokasyon na harani saimo o para mag-request nin libreng pag-adal sa Bibliya kaiba an sarong Saksi ni Jehova, gamit an publikasyon na Mabuhay nin Maugma Sagkod Pa Man!