Tabangan Tulos an mga Tawong “Igwang Pusong Nasa Tamang Kamugtakan”

1. Ano an mga posibleng magin reaksiyon kan mga tawo sa maugmang bareta? (Gibo 13:47, 48; 16:14, 15)

DAKUL na tawo kan inot na siglo an inako tulos an katotoohan kan madangog ninda an mensaheng ipinapaabot kan mga Kristiyano. (Basahon an Gibo 13:47, 48; 16:14, 15.) Sa ngunyan, may mga tawo man na nakamati nin dakulang kaugmahan kan madangog ninda an maugmang bareta sa inot na pagkakataon. Maski an mga tawong kan primero mayong interes sa mensahe kan Kahadian tibaad pag-abot nin panahon buksan na ninda an saindang puso para akuon iyan. Ano an dapat tang gibuhon pag nakakanumpong kita sa satong ministeryo nin mga tawong “igwang pusong nasa tamang kamugtakan”?

2. Ano an pagkakaagid kan mga ginigibo nin sarong paratanom asin kan paggibo niyato nin mga disipulo?

² Puwede tang iagid sa mga ginigibo nin sarong paratanom an paggibo niyato nin mga disipulo. Kun mahiling kan paratanom na hinog na an mga bunga kan sarong tinanom, posibleng marhay na gugusihon niya na iyan dawa ngani tibaad naggugudak pa siya o nagtatanom pa sa ibang parte kan tanuman. Sa kaagid na paagi, pag nakahanap kita nin saro na andam na mag-ako kan satong mensahe, gusto tang tabangan siyang magin disipulo ni Cristo sa lalong madaling panahon. Pero padagos ta pa man giraray na kukultibaron an interes kan iba na tibaad nangangaipo pa nin panahon para mahiling an kahalagahan kan mga nadadangog ninda. (Juan 4:35, 36) Makakatabang sa sato an pakamansay tanganing makapili kita kan pinakaangay na pamamaagi para tabangan an mga tawo. Pag-ulayan ta ngunyan kun ano an mga puwede tang gibuhon durante kan inot na pakikipag-ulay para tabangan an mga tawong andam na mag-ako kan satong mensahe. Pag-uulayan ta man kun paano ta sinda matatabangan na padagos na umuswag.

PAG AN MGA TAWO ANDAM NA MAG-AKO

3. Ano an puwede tang gibuhon pag nakakanumpong kita nin mga interesado? (1 Corinto 9:26)

³ Pag nakakanumpong kita nin mga interesado, gusto ta sindang tabangan tulos na magpuon na maglakaw sa dalan pasiring sa buhay. Sa arog kaiyan na mga pagkakataon, dai kita dapat mag-alangan na alukan sinda nin pag-adal sa Bibliya asin imbitaran sinda na mag-atender sa satong mga pagtiripon sa inot pa sana niyatong pakikipag-ulay sa sainda.—Basahon an 1 Corinto 9:26.

4. Iistorya an eksperyensiya nin saro na nag-ako tulos nin pag-adal sa Bibliya.

⁴ Pag-alok nin pag-adal. May mga nakakaulay kita na nag-aako tulos nin pag-adal sa Bibliya. Pag-isipan an sarong eksperyensiya. Huwebes kaidto asin may sarong hoben na babayi sa Canada na nagdulok sa sarong cart nin mga literatura dangan nagkua kan brosyur na Mabuhay nin Maugma Sagkod Pa Man! Sinabi kan sister na nagbabantay sa cart na, kaiba kan brosyur, may inaalok man sindang daing bayad na pag-adal sa Bibliya. Dahil interesado an hoben na babayi, itinao niya an numero kan saiyang cellphone. Kan aldaw man sanang idto, nag-text an hoben na babayi sa sister asin naghapot kun nuarin gigibuhon an pag-adal. Sinabi kan sister kun puwede niya siyang dumanan sa weekend pero naghapot an hoben na babayi: “Ano daw po kun sa aga na lang? Wara man po akong gibo.” Kaya napunan ninda an pag-adal kan Biyernes mismo. Asin kan weekend man sanang idto, nag-atender sa pagtiripon sa inot na pagkakataon an hoben na babayi asin padagos na marikas na nag-uswag.

5. Paano kita makakapahiling nin pakamansay pag nag-aalok nin pag-adal sa Bibliya? (Hilingon man an mga ritrato.)

⁵ Siyempre, bako man gabos na nakakaulay ta arog kainteresado kan hoben na babaying idto. An iba tibaad kaipuhan nin urog pang tabang. Tibaad kaipuhanon ta ngunang makipag-ulay sa sarong indibidwal gamit an temang interesante sa saiya. Dawa arog kaiyan, kun danay kitang magigin positibo asin padagos na mapahiling nin personal na interes sa saiya, tibaad sa halipot lang na panahon mapunan ta na siya nin pag-adal. Ano an puwede tang sabihon pag nag-aalok nin pag-adal? Ihinapot ini sa nagkapirang tugang na mahusay sa pagpuon nin pag-adal sa Bibliya.

6. Ano an puwede tang sabihon pag nag-aalok nin pag-adal sa Bibliya asin tanganing maipagpadagos pa sa sunod an pag-uulay?

⁶ Sinabi kan mga parahayag asin kan mga payunir na hinapot manungod sa pagpuon nin pag-adal na sa ibang mga lugar pinakamarahay kun lilikayan an mga terminong arog kan “pag-adal,” “kurso sa Bibliya,” o “pagtutukdo” pag ipinapaliwanag an areglo nin pag-adal sa Bibliya. Narisa ninda na mas epektibo kun gagamiton an mga ekspresyon na arog kan “pag-uulay” saka “aramon an sinasabi kan Bibliya.” Dangan, tanganing magustuhan kan kaulay mo na ipagpadagos sa sunod an pag-uulay nindo, puwede mong sabihon, “Makangangalas talaga na nasisimbag kan Bibliya an importanteng mga hapot sa buhay” o “An Bibliya bako lang basta sarong libro sa relihiyon; natatabangan kita kaiyan sa praktikal na mga paagi.” Dangan puwede mong sabihon: “Dai man kita mahahaloy. Maski mga 10 sagkod sa 15 minutos, may manunudan na kitang kapaki-pakinabang na impormasyon.” Paagi kaiyan, malilikayan tang gamiton an mga terminong arog kan “iskedyul” o “kada semana,” na puwedeng magtao kan ideyang obligado siyang regular na makipag-ulay sa sato.

7. Kasuarin narealisar kan nagkapira na nahanap na ninda an katotoohan? (1 Corinto 14:23-25)

⁷ Imbitaran sinda na mag-atender sa satong pagtiripon. Minalataw na kan panahon ni apostol Pablo, narealisar kan nagkapira na nahanap na ninda an katotoohan kan mag-atender sinda sa Kristiyanong pagtiripon. (Basahon an 1 Corinto 14:23-25.) Sa parati, totoo man iyan sa ngunyan. Kadaklan sa mga baguhan mas marikas na nag-uuswag pag nag-aatender na sinda sa satong mga pagtiripon. Nuarin mo sinda dapat imbitaran? Sa leksiyon 10 kan librong Mabuhay nin Maugma Sagkod Pa Man! igwa nin imbitasyon na mag-atender sa satong mga pagtiripon, alagad dai mo na kaipuhan na halaton na makaabot sa parteng iyan kan libro bago mo imbitaran an saro na mag-atender. Sa inot pa lang nindong pag-uulay, puwede mo na siyang imbitaran na mag-atender sa pagtiripon sa puro kan semana asin sabihon saiya an tema kan pampublikong pahayag o an sarong punto sa Pag-adal sa Torrengbantayan para sa semanang iyan.

8. Ano an mga puwede tang sabihon sa sarong interesado pag iniimbitaran ta siyang mag-atender sa satong mga pagtiripon? (Isaias 54:13)

⁸ Pag iniimbitaran ta an sarong interesado, ipaliwanag kun paano an satong mga pagtiripon napapalain sa mga aktibidad na tibaad kinatudan niya sa saiyang relihiyon. Kan an sarong tinutukduan sa Bibliya mag-atender sa Pag-adal sa Torrengbantayan sa inot na pagkakataon, hinapot niya an nagba-Bible study sa saiya, “Aram kan nagkokondukta an pangaran kan gabos?” Sinabi kan sister na kun paanong aram ta an pangaran kan mga kapamilya ta, hinihinguwa ta man gabos na kabisaduhon an pangaran kan mga nasa kongregasyon ta. Para sa tinutukduan, ibang-iba ini sa kinatudan niya sa simbahan. Nahiling man kan dakul na ibang-iba man sa kinatudan ninda an katuyuhan kan satong mga pagtiripon. (Basahon an Isaias 54:13.) Nagtitiripon kita para magsamba ki Jehova, makanuod sa saiya, asin pakusugon an lambang saro. (Heb. 2:12; 10:24, 25) Huli kaiyan, areglado saka praktikal an satong mga pagtiripon, asin mayong kaibang mga ritwal. (1 Cor. 14:40) May supisyenteng liwanag sa laog kan satong Kingdom Hall huling nag-aatender kita diyan para makanuod. Asin nungka kitang nagsusuportar sa arin man na partido sa pulitika huling neutral kita; ni nagpapartisipar man kita sa mga debate o mga diriskutiran. Tibaad makatabang kun patiinot mo nang ipapahiling sa tinutukduan an videong Paano Ginigibo an Pagtiripon sa Kingdom Hall? para may ideya siya sa mga aasahan niya.

9-10. Pag iniimbitaran an saro na mag-atender sa pagtiripon, ano an puwede tang gibuhon tanganing maasigurar ta sa saiya na dai ta siya pipiriton na magbali sa sato o na magpartisipar sa pagtiripon? (Hilingon man an ritrato.)

⁹ Nag-aalangan an iba na mag-atender sa satong pagtiripon dahil natatakot sinda na tibaad sabihan ta sindang “mag-Saksi na” sinda. Asiguraron sa iniimbitaran mo na gustong-gusto tang may mga bisita kita asin dai ta man sinda pipiriton na mag-iba na sa sato o magpartisipar sa mga pagtiripon. Welcome an mga pamilya, kaiba na an mga may aki. Dai man suway na tinutukduan an mga aki, imbes, magkataid an mga magurang asin an mga aki ninda saka magkairibanan sindang nakakanuod. Paagi kaini, aram kan mga magurang kun sairisay an kaibanan kan saindang mga aki saka kun ano an itinutukdo sa mga ini. (Deu. 31:12) Mayong ginigibong pangungulekta; ni nagdidistribwir man nin mga sobre para maghagad nin donasyon. Imbes, sinusunod ta an pagbuot ni Jesus: “Inako nindong daing bayad, itao nindong daing bayad.” (Mat. 10:8) Puwede mo man na sambiton sa iniimbitaran mo na dai man kaipuhan an mamahalon na mga bado para mag-atender huling an Diyos naghihiling sa puso, bako sa itsura nin saro.—1 Sam. 16:7.

¹⁰ Kun mag-atender siya, gibuhon an pinakamakakaya mo na ipamating welcome siya. Ipabisto siya sa mga elder saka sa iba pang mga parahayag. Kun magigin pamugtak an buot niya, posibleng marhay na gugustuhon niyang magbalik sa sunod. Pag nasa pagtiripon na asin mayo siyang Bibliya, ipahiling saiya gamit an Bibliya mo kun paano ta sinusubaybayan an pahayag o kun paano ta ginigibo an pag-adal.

PAG NAKAPUON NIN PAG-ADAL SA BIBLIYA

11. Paano ka makakapahiling nin konsiderasyon sa oras asin iskedyul kan saimong tinutukduan?

¹¹ Ano an mga dapat tang isaisip pag nagkokondukta nin pag-adal sa Bibliya? Magpahiling nin konsiderasyon sa oras saka iskedyul kan saimong tinutukduan. Halimbawa, kun may napag-ulayan na kamong iskedyul, mag-abot na nasa oras, dawa kun bakong arog kaiyan an kinatudan kan mga tawo sa lugar nindo. Dugang pa, tibaad pinakamarahay na halipot lang an inot nindong pag-adal. Sinasabi kan nagkapirang eksperyensiyadong parahayag na mas marahay na dai palawigon an pag-adal dawa kun gusto pa kan tinutukduan mo. Likayan man na ika sana an magparataram. Imbes, pabayaing ipahayag kan tinutukduan an nasa buot niya.—Tal. 10:19.

12. Ano an dapat na magin pasuhan mo puon sa inot pa lang nindong pag-adal kan tinutukduan mo?

¹² Puon sa inot pa lang nindong pag-adal kan tinutukduan mo, dapat na an pasuhan mo iyo na tabangan siyang mamidbid saka mamutan si Jehova asin si Jesus. Magigibo mo ini paagi sa pagdara kan atensiyon niya sa Tataramon nin Diyos imbes na sa saimo asin sa kaaraman mo sa Bibliya. (Gibo 10:25, 26) Magayon na halimbawa kaiyan si Pablo. Pag nagtutukdo siya, parati niyang dinadara an atensiyon kan mga tawo ki Jesus, an saro na isinugo ni Jehova para tabangan kitang mamidbid asin mamutan Siya. (1 Cor. 2:1, 2) Malinaw man na ipinahiling ni Pablo kun gurano kahalaga na tabangan an bagong mga disipulo na patalubuon an marahay na mga kuwalidad arog kan pagtubod, kadunungan, pakamansay, asin pagkatakot ki Jehova. (Sal. 19:9, 10; Tal. 3:13-15; 1 Ped. 1:7) An mga kuwalidad na ini maikukumparar sa bulawan, plata, asin mamahalon na mga gapo. (1 Cor. 3:11-15) Arugon an paagi ni Pablo nin pagtutukdo paagi sa pagtabang sa saimong mga tinutukduan na magkaigwa nin makusog na pagtubod asin haraning relasyon sa saindang mamumuton na Ama sa langit.—2 Cor. 1:24.

13. Paano kita makakapahiling nin pagigin mapasensiya asin mapagsabot mantang tinatabangan ta an mga interesado? (2 Corinto 10:4, 5) (Hilingon man an ritrato.)

¹³ Arugon an paagi ni Jesus nin pagtutukdo paagi sa pagigin mapasensiya asin mapagsabot. Likayan an mga hapot na makakapasupog sa kaulay ta. Kun kinakaipuhan, laktawan nguna an mga puntong dipisil saiya asin balikan na lang iyan. Imbes na ipirit sa saiya an sarong katukduan na dai pa siya andam na akuon, magtao nin panahon na makagamot an katotoohan sa saiyang puso. (Juan 16:12; Col. 2:6, 7) Iinaagid kan Bibliya sa sarong kuta an salang mga katukduan na hinihinguwa tang pabagsakon. (Basahon an 2 Corinto 10:4, 5; hilingon an study note na “pabagsakin ang mga bagay na matibay ang pagkakatatag,” nwtsty-TG.) Imbes na gabaon an kuta kan saimong tinutukduan asin mabagsakan siya kaiyan, tabangan mo nguna siyang magin Pailihan niya si Jehova.—Sal. 91:9.

PAG NAG-ATENDER SA PAGTIRIPON AN SARONG INTERESADO

14. Paano ta dapat trataron an mga bago pa lang na mag-atender sa satong mga pagtiripon?

¹⁴ Inaasahan ni Jehova na tatrataron ta nin daing pagpalain-lain an gabos, ano man an saindang kultura, estado sa buhay, o lahi. (Sant. 2:1-4, 9) Kaya paano kita makakapahiling nin pagkamuot sa mga bago pa lang na mag-atender sa satong mga pagtiripon?

15-16. Ano an puwede tang gibuhon tanganing mamatian kan mga bago pa lang na mag-atender na welcome sinda sa satong mga pagtiripon?

¹⁵ May mga indibidwal na nag-aatender sa satong mga pagtiripon dahil lang ta interesado sindang mahiling kun ano man an mga ginigibo diyan o dahil may nag-imbitar sa saindang kabisto ninda na nasa ibang lugar. Kaya dai kita dapat mag-alangan na dulukon sinda. I-welcome sinda pero bako sa paaging sobra na man ta tibaad magin bako na lugod sindang komportable. Imbitaran sindang magtukaw sa kataid mo para matabangan sindang makasubaybay sa pagtiripon gamit an saimong Bibliya asin materyal na pinag-aadalan, o kaya tawan mo sinda nin sadiri nindang kopya. Apuwera kaiyan, konsideraron an saindang namamatian. Sarong lalaki na nag-atender sa Kingdom Hall an nagsabi sa brother na nag-welcome saiya na nahahadit siya dahil nakapangkaswal na bado lang siya. Pero sinabi saiya kan brother na an mga Saksi ni Jehova ordinaryong mga tawo man sana kaya mayo siyang dapat ikahadit. Pag-abot nin panahon, nag-uswag an lalaki dangan nabawtismuhan, asin nungka niyang nalingawan an marahay na nagin pagtratar sa saiya kan brother. Pero may patanid man sato: Pag nakikipag-ulay kita sa mga bisita bago o pagkatapos kan pagtiripon, pahilingan ta sinda nin personal na interes alagad dai man magparahapot nin personal na mga bagay sa sainda.—1 Ped. 4:15.

¹⁶ Maipapamati ta man na welcome an satong mga bisita paagi sa pagtaram nin may paggalang pag sinasambit ta sa satong mga pag-uulay, komento, saka mga kabtang sa pagtiripon an manungod sa mga bakong Saksi o sa mga paniniwala ninda. Likayan an mga ekspresyon na puwedeng makainsulto sa sainda o makadisganar sa sainda na magbalik. (Tito 2:8; 3:2) Halimbawa, nungka tang memenuson o kikritikaron an saindang mga paniniwala. (2 Cor. 6:3) Lalo nang dapat na magin maingat sa bagay na ini an mga brother na nagtatao nin pampublikong pahayag. Ipinapahiling man nindang isinasaisip ninda an mga bakong Saksing nagdadangog paagi sa pagpaliwanag sa mga tataramon o mga konsepto na dai masasabutan kan mga ini.

17. Ano an pasuhan ta pag nakakanumpong kita sa satong ministeryo nin mga tawong “igwang pusong nasa tamang kamugtakan”?

¹⁷ An satong gibuhon na paggibo nin mga disipulo lalong nagigin apurado sa kada aldaw na minaagi, asin padagos kitang naghahanap nin mga tawong “igwang pusong nasa tamang kamugtakan para sa buhay na daing katapusan.” (Gibo 13:48) Mantang ginigibo ta iyan, dai kita dapat mag-alangan na alukan sinda nin pag-adal sa Bibliya o imbitaran sinda na mag-atender sa satong mga pagtiripon. Paagi kaiyan, matatabangan ta sinda na magpuon na maglakaw sa “dalan na pasiring sa buhay.”—Mat. 7:14.