An mga Apocalipsis—Noarin?

IYAN garo pagbasa sa pinakabagong peryodiko—mga guerra, linog, peste, helang, gutom, krimen, asin pagkatakot! An gabos na pangyayaring ini asin an iba pa ihinula sa Biblia. Itinotokdo kaiyan an panahon na nabubuhayan niato gabos bilang “an huring mga aldaw.” Ini nangangahulogan kan panahon na minagiya pasiring sa nagdadangadang asin ipinanugang apocalipsis. Paano nindo maseseguro ini?

Naheheling nindo an kaotoban kan mga hula sa Biblia ngonyan. “Kaipuhan na atubangon mo an katotoohan,” sabi kan Biblia, “an huring panahon kan kinaban na ini magigin panahon nin kasakitan. An mga tawo daing ibang mamomotan kundi an pirak asin an sadiri; sinda magigin maabhaw, hambog, asin mapagpakaraot; daing paggalang sa mga magurang, daing utang na boot, daing kabanalan, dai nin pagkamoot; sinda magigin . . . harayo sa gabos na karahayan, . . . labi-labi an pagpahalaga sa sadiri. Sinda mga tawo na inienot an kasingawan imbes na an Dios, mga tawo na nagpapadanay sa panluwas na porma nin relihiyon, alagad ta nagdadanay man na pagpainda sa katunayan kaiyan.” (2 Timoteo 3:1-5, The New English Bible) Dai daw nindo naheheling an mismong mga kamugtakan na ini sa gabos na lugar?

An dakol na nabubuhay ngonyan, tibaad pati kamo, nakakagirumdom sa mga panahon na an mga kamugtakan bakong arog karaot ngonyan. An mga tawo kaidto mas makonsiderasyon sa lambang saro. An mga aki mas magalang sa saindang mga magurang asin sa mga gurang. An mga lalaki, babae, asin mga aki dai natatakot na maglakaw sa tinampo, dawa sa banggi. Alagad ta marikas na nagliliwat an mga panahon. Dawa kun an iba sa mga kamugtakan na ini garo baga dai nangyayari sa saindong lugar, tunay na an posibilidad nin guerra nuklear—huli sa mapaabaw-abaw na paghanap nin tawo sa kapangyarihan—nakakaapektar sa sato gabos.

Iyo, kun paanong an Dios maliwanag nanggad na naghula kan “huring panahon kan kinaban na ini” paagi sa saiyang Tataramon, an Biblia, sia nagtao man nin impormasyon manongod sa panahon kan apocalipsis, na si Jesus madatong tanganing maghokom.

Mas Harani Ki sa Paghona nin Dakol

“Naghuhula ako ngonyan nin bagong mga bagay,” sabi nin Dios. “Bago iyan lumataw isinasabi ko iyan sa saindo.” (Isaias 42:9, The Jerusalem Bible) Iyo, isinaysay nia para sa sato sa Biblia an pangenot na mga pangyayari na mangyayari bago an apocalipsis.

Halimbawa, si Jesus nagtaram manongod sa sarong mensahe na ipadadangog sa bilog na kinaban asin ikinonektar iyan sa apocalipsis. Sia nagsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Kaiba sa “katapusan” na iyan an apocalipsis. Ngonyan, an mga Saksi ni Jehova naggagamit nin ginatos na milyon na oras kada taon na maigot na ibinabalangibog an mensaheng iyan kan Kahadean sa harong-harong asin sa iba pang paaging mapupuwede, sa labing 200 na kadagaan sa bilog na kinaban!

Sa pagtao nin dramatikong pagkokomparar para sa kapakinabangan kan saiyang mga parasunod, ikinomparar ni Jesus an panahon na minagiya pasiring sa apocalipsis sa panahon bago an Baha kan aldaw ni Noe. Kan panahon ni Noe an mga tawo preokupadong gayo sa pagkakan asin pag-inom asin pagpasiramsiram kaya “dai sinda nagmangno” sa mensahe ni Noe manongod sa nagdadangadang na kalaglagan. Indiperente sinda sa saiyang mga patanid.—Mateo 24:37-39.

Nakakaagid nanggad an satong kaaldawan sa mga nangyari bago kan Baha! An mga tawo preokupadong gayo sa saindang mga gibo sa aroaldaw kaya dai sinda naghihinanyog sa mga patanid asin sa ebidensia kan nagdadangadang na apocalipsis.

Pero, an apocalipsis mas harani ki sa pinaghohona nin dakol. Manongod sa tanda kan huring mga aldaw, si Jesus nagsabi na “an kapag-arakian na ini dai noarin man makakalihis sagkod na an gabos na bagay na ini mangyari.” (Mateo 24:34) Arin na kapag-arakian an sinasabi ni Jesus?

An Kapag-arakian nin 1914

Sa pagtaram manongod sa “matoninong asin maasensong panahon Victoriano kan Gran Britania,” an dating Primer Ministro Harold Macmillan nagsabi na pinaghona nia na ‘an kinaban na namundagan nia’ padagos na “magrarahay.” Alagad ta “bigla na sana, dai linalaoman, sarong aga kan 1914 natapos an gabos.” Inaapod iyan na katapusan kan “100 na taon nin katoninongan asin pag-oswag,” nagigirumdoman ni Macmillan kun paanong an Guerra Mundial I nagtanda sa “katapusan nin sarong panahon” asin sa “kapinonan kan karibarawan na nangyayari sagkod ngonyan.” An dakol pang iba, nangorogna an mga nabuhay kan 1914 asin nabubuhay pa, nakakaaram na ini totoo.

Iyo, arog kan ipinahayag kan magasin na ini sa mga nagbabasa kaiyan sa nakaaging mga taon, an ebidensia nagtotokdo sa kapag-arakian nin 1914 bilang an kapag-arakian na sinasabi ni Jesus.a Kaya, “an kapag-arakian na ini dai noarin man makakalihis sagkod na an gabos na bagay na ini [kaiba an apocalipsis] mangyari.”

Minsan ngani labi nang 70 taon an nakaagi poon kan 1914, igwa pa ngonyan nin mga tawo na nabuhay kan panahon na idto. Sono sa The American Legion Magazine para sa Disyembre 1984, sa Estados Unidos mga 272,000 na beterano kan Guerra Mundial I an buhay pa, asin arog man kaiyan sa ibang nasyon. Minsan siring, marikas na nagbababa an bilang. Kaya gurano pa kahaloy bago an ultimong beterano kan Guerra Mundial I magmartsa pasiring sa kasaysayan?

Minsan ngani an estadistikang ini nagdadara kan satong atension sa huring mga oras kan kapag-arakian nin 1914, gurano kaespisipiko na masasabi niato an eksaktong panahon kan apocalipsis?

“Parahabon Kun Banggi”

An Biblia nagpapatanid: “Kun dapit sa mga panahon asin mga kapanahonan, . . . kamo man sana nakakaaram na gayo na an aldaw ni Jehova madatong na kabaing na gayo nin parahabon kun banggi.” (1 Tesalonica 5:1, 2) Lalaoman daw nindo an sarong parahabon na magtelegrama tanganing ipaisi kun noarin nia pinaplanong habonan an saindong harong?

Kaya angay nanggad na si Jesus nagsasadol sato manongod sa eksaktong oras: “Magbantay kamo, magpuka kamo, huli ta dai nindo aram kun noarin an itinalaan na panahon.” (Marcos 13:32-37) Minsan siring, naaraman niato na si Jesus nagsaysay nin laen-laen na mga pangyayari na nagtotokdo sa kapag-arakian nin 1914. Asin an Biblia naglaladawan nin maabot pang mga pangyayari na magigin tanda sa nagdadangadang na apocalipsis. Ano an puwede niatong laoman?

Pagkaliwat nin mga Pangyayari

Si apostol Pablo nagsabi: “Sa panahon na sinda nagsasarabi: ‘Katoninongan asin katiwasayan!’ dangan an biglang pagkalaglag madaling maabot sa sainda siring sa kolog kan bados na babae; asin dai sinda makaliligtas minsan sa anong paagi.” (1 Tesalonica 5:3) Kaya mantang kita nagdadangadang sa katapusan kan “huring mga aldaw” na ini, makakalaom kita na may lataw na atension na itatao sa “Katoninongan asin katiwasayan!” bilang kaotoban kan mga tataramon ni Pablo. Dangan ano na?

Ipinaririsa kan mga hula sa Biblia na an pankinaban na relihiyon, na inaapod “Dakulang Babilonya,” biglang sasalakayon kan mga kapangyarihan politikal sa daga asin biglang matatapos! (Kapahayagan 17:5, 16; 18:10, 17) Ini an magigin kapinonan nin sarong “dakulang kahorasaan na dai pang kaagid na nangyari poon sa kapinonan kan kinaban sagkod ngonyan.” (Mateo 24:21) Alagad paano ini makakaapektar sa mga ‘nagpuka’ asin nagbantay para sa apocalipsis?

An tunay na mga Kristiano makakasarig na sinda ililigtas ni Jehova. (2 Pedro 2:9) Iyo, basta sinda nakakamidbid ki Jehova Dios asin daing kapasloan na naglilingkod sa saiya, dai sinda nin dahelan na matakot kun an Dios asin si Cristo lumuwas na tanganing makipaglaban sa Armagedon.—Kapahayagan 11:17, 18; 16:14, 16.

Sumunod, an apocalipsis magbubunga kan pagsiblag ki Satanas na Diablo asin kan saiyang dai naheheling na hukbo sa katawohan. (Kapahayagan 20:2, 3) Iyo, an nagdadangadang na kaanggotan bako sanang hahaleon sa daga an mga tawo na habong maglingkod sa Dios. Minsan an maraot na mga espiritu na ngonyan nag-iimpluwensia sa kinaban na nasa palibot niato hahaleon. (2 Tesalonica 1:6-9) Ini mangangahulogan nin daing katapusan na bendisyon para sa mga makaliligtas sa apocalipsis.

Apocalipsis—Pangyayari Bago an Paraiso

Mapadapit sa mga nag-eerok sa daga, an librong Kapahayagan (Apocalipsis, Douay) nagsasabi sato na an Dios “papahidon nia an gabos na luha sa saindang mga mata. Mawawara na an kagadanan o pagmondo o pagtangis o kolog, huli ta an daan na palakaw nin mga bagay nakalihis na.” (Kapahayagan 21:4, New International Version) Imbes kan madiklom na resulta kan apocalipsis, an Biblia nagpapahayag na an tawo mabubuhay sagkod lamang sa sarong paraiso sa daga.—Salmo 37:9-11, 29.

Paraiso? Buhay na daing katapusan sa daga? Isip-isipa, mga tawo na hale sa gabos na rasa na mabagsik an salud, maogma sa sangkap na paagi, na igwa nin lubos na buhay! ‘Paano ini magigin resulta nin sarong apocalipsis?’ tibaad ihapot nindo. An Dios nanuga. Iyan magigin kapareho kan mga ginibo nin Dios sa Israel, na “mayo ni sarong panuga an nasudya sa gabos na marahay na ipinanuga ni Jehova . . . ; iyan gabos naotob.”—Josue 21:45.

Kaya, mapadapit sa eksaktong aldaw asin oras kan apocalipsis mayo nin siisay man na nakakaaram, alagad an ebidensia nagpapaheling na kita nabubuhay sa panahon kan apocalipsis. Kun iyan umabot na, kita logod manompongan na puka asin “nagbabantay.” Huli ta “an kinaban maagi sana asin an horot kaiyan, alagad an naggigibo kan kabotan nin Dios magdadanay sagkod lamang.”—Marcos 13:33, 37; 1 Juan 2:17; Mateo 24:36.

[Mga Nota sa Ibaba]