Padagos na Magmaan sa Saindong Paglakaw
1 An bagong programa nin pansirkitong asamblea para sa 1990 magpopoon sa Pebrero. Idodoon kaini an kahalagahan nin pagmaan kan satong paglakaw, pagpadagos kan mga bagay na nakapagpapatoninong, asin sa paglikay sa kadakol na pakana na ibinubugtak sa atubang niato ni Satanas asin kan saiyang mga hukbo, kapuwa espiritu asin tawo.
2 An paglakaw sa dalan nin katanosan dai na nagigin mas pasil sa mga huring aldaw na ini. Kaya, an programa kan duwang aldaw na pansirkitong asamblea magtatao nin panpakosog asin praktikal na sadol tanganing tabangan an banwaan ni Jehova na pagdanayon an saindang espirituwal na pagkatimbang asin magpatunay na mga nagdadanay sa integridad.
3 An tema kan asamblea na, “Padagos na Magmaan sa Saindong Paglakaw,” basado sa Efeso 5:15, 16, iyo an pinakaangay para sa pagbilog asin presentasyon kan inandam na materyal. Itatao an instruksion paagi sa mga pahayag, demonstrasyon, eksperyensia, asin mga interbio. Sa Sabado, magkakaigwa nin oportunidad para sa mga bagong nagdusay na mabautismohan. Kaya, an mga nagpaplano na magpabautismo sa pansirkitong asamblea maninigong patienot na magpaaram sa nangengenot na paraataman tanganing puwedeng magibo an mga areglo para sa pagrepaso kan pan-introduksion na mga hapot.
4 An tampok na kabtang kan pansirkitong asamblea iyo an pahayag publiko kan paraataman sa distrito. An tema kan saiyang pahayag iyo an “Mga Paradara nin Liwanag sa Sarong Madiklom na Kinaban.” An pag-orolay na ini sa Biblia igwa nin mahalagang impormasyon para sa mga interesadong tawo, asin makapagpapakosog ini sa mga naglilingkod na bilang mga ministro kan maogmang bareta.—Mat. 24:14.
5 Ipaaaram sa saindo kan saindong paraataman sa sirkito kun saen asin noarin isasagibo an saindong pansirkitong asamblea. Magkaigwa nin malinaw na mga plano tanganing makaatender sa gabos na sesyon sa duwang aldaw. Dai niato magigibong laktawan an ano man na kabtang kan programa. Babalosan ni Jehova an saindong mga pagmamaigot paagi sa pagtabang saindo na padagos na magmaan sa saindong paglakaw.