Pagpaheling nin Pagsarig ki Jehova Paagi sa Pagpayunir
1 An pag-enot sa mga intereses kan Kahadean naghahagad nin pagsarig ki Jehova. (Sal. 56:11; Tal. 3:5; Mat. 6:33) Kaipuhan na irayo niato an satong isip sa ibinibilang na mahalaga kan kinaban asin magkonsentrar kita sa espirituwal na mga bagay. Mantang an kinaban pinupukaw an horot para sa materyal na mga bagay, pinakikiolayan kita ni Jehova na makontento sa tunay na mahahalagang bagay.—1 Tim. 6:8; Fil. 1:10.
2 Ini nangorognang angat sa Kristianong mga hobenes na gustong isapuso an mga pagboot ni Jehova. Tibaad impluwensiahan sinda kan saindang mga maestro asin kaklase na ibinibilang an mas halangkaw na inadalan na kaipuhan tanganing umasenso sa buhay. Mantang minimidbid na sinda may materyal na mga pangangaipo, an dakol na Kristianong hobenes pinaglalabanan an impluwensiang iyan asin pinipili bilang saindang karera an pagpapayunir. Nananarig sa mga panuga ni Jehova, sinda naglalaom sa saiya na iyo an mag-asikaso sa saindang mga pangangaipo.—Sal. 62:2; 68:19; 1 Tim. 5:8; 6:9, 10.
REPASOHON AN PERSONAL NA MGA KAMUGTAKAN
3 An The Watchtower kan Nobyembre 15, 1982 nagsasadol sa lambang saro sa sato na ihapot: “May ikapangangatanosan daw ako ki Jehova sa bagay na ako bakong payunir?” An dakol mayo kaidto sa kamugtakan na magpayunir. Pero dai nanluya an saindang boot, sa pakaaram na an bilog na pusong paglilingkod minsan gurano iyan perming inaako ni Jehova. (Miq. 6:8; 2 Cor. 8:12) Paghaloyhaloy, sa pagkaliwat nin mga kamugtakan, an mapagngayongayong paghorophorop liwat sa artikulong idto sa 1982 Watchtower nagpangyari sa nagkapira na makabilang sa rinibo na bago pa sanang lumaog sa pagregular payunir.
4 Kun an personal na mga kamugtakan dai nagtogot sa saindo na magpayunir kan imprentahon kan 1982 an mga tataramon na iyan, naliwat na daw an saindong mga kamugtakan? Digdi sa Pilipinas, 3,417 aplikasyon sa payunir an inasikaso kan 1989 taon nin paglilingkod! Daing duwa-duwa na an dakol sa mga aplikanteng ini boot na magpayunir kaidto pa pero kinaipuhan nindang halaton an pagkaliwat nin personal na mga kamugtakan.
5 Sa ibang kaso, an kaipuhan na pagkaliwat tibaad may koneksion sa kaisipan nin saro manongod sa pagpapayunir. O tibaad an kaipuhan sana paggibo nin marahay na iskedyul para sa paglilingkod. Kun beses kaipuhan an pagkaliwat sa personal na mga paninimbagan asin obligasyon tanganing mabukasan an dalan sa pagpapayunir. Kun siring, marahay na danay ining ipamibi ki Jehova kaiba an sadiosan na pagturotimbang sa satong sadiri asin sa satong kamugtakan. Rinibo an guminibo kaiyan asin ngonyan nagkakamit kan mga bendisyon nin pagpapayunir.
6 Kun iparisa nin prangkang pagturotimbang sa saindong kamugtakan na kamo saro sa puwedeng magpayunir sa harani nang ngapit, taano ta dai ponan ngonyan an regular na pag-auxiliary payunir? An Abril asin Mayo marahayon na bulan na ponan ini, asin tatawan kamo kaiyan nin oportunidad na maheling kun kaya nindong aboton an mga kahagadan sa regular payunir sa ngapit. Sa laog nin pirang bulan posible na kamo magkaigwa nin mga pagdalaw liwat asin pag-adal sa Biblia. Ini makatatabang saindo na magin pasil an pagbalyo sa pagregular payunir, tibaad bago pumoon an bagong taon nin paglilingkod sa Setyembre.
7 Si Jehova naggigibo nin makangangalas na mga bagay sa huring mga aldaw kan presenteng palakaw nin mga bagay. Ngonyan na an panahon na kita gabos magin dayupot sa saiya asin omawon an saiyang ngaran “sa bilog na aldaw.” (Sal. 145:2; Sant. 4:8) An mga payunir nangengenotan sa dakulang gibohon na ini, na kan nakaaging taon nagreport kan 69% sa total na oras asin 71% sa total na pag-adal sa Biblia digdi sa Pilipinas. Kaya kun itinotogot kan saindong kamugtakan asin kuwalipikado kamo, togotan na an pagpapayunir magin saro pang ebidensia na kamo nananarig ki Jehova asin bako sanang sa sadiri nindong kosog. Hinahalat ming akoon sa pagpapayunir an dakol pa sa 1990!—Sal. 94:18.