Umatender sa “Malinig na Tataramon” na Pandistritong Kombension
1 An makahulang tataramon ni Jehova sa Sofonias 3:9 nagsasabi: “Sa panahon na iyan itatao ko sa mga banwaan an pagbago sa malinig na tataramon, tanganing sinda gabos mag-apod sa ngaran ni Jehova, tanganing daramay na maglingkod sa saiya.” An kombension ngonyan na taon bako sanang magsasabi kun ano an “malinig na tataramon” kundi tatabangan man kitang masabotan kun taano an pakanood dian asin pakataram kaiyan nin matibay napakahalaga asin kun paanong an abilidad niato sa paggamit kaiyan nagpapakosog sa pagkasararo kan kasararoan nin magturugang sa bilog na kinaban.
2 UMABOT NIN AMAY: An organisasyon ni Jehova nag-aagda sato na kumakan sa saiyang espirituwal na lamesa. Sarong tanda nin paggalang an pag-abot nin nasa oras. Ini nangangahulogan na kita maninigong umabot nin amay aroaldaw asin tumukaw na bago pumoon an programa. Ini nagkakaipo nin pagtao nin bastanteng oras para sa pagparada kan satong sasakyan asin paghanap nin tukawan.—1 Cor. 14:40.
3 An mga delegado sa mga kombension sa Polandia kan sarong taon naghanga sa diosnon na debosyon, pagkamoot, asin pagkasararo kan saindang mga tugang. Risang marhay an hararom na pag-apresyar sa espirituwal na mga probisyon. Kada aga, an mga tugang yaon na sa mga lugar nin kombension nin amay pa, na nagtuturukaw na asin andam na para sa pambukas na awit asin pamibi. Nagdanay sinda sagkod sa pantapos na awit asin pamibi, asin dai pa sinda naghaharale pagkatapos kan programa tanganing makiasosyar sa mga tugang.
4 Pambihira man an pagigin husay kan mga tugang. Nagduman sinda tanganing maghinanyog asin makanood. Minsan an oran sa daing atop na mga istadyum sa Poznan asin Chorzow dai nakahahale kan saindang atension sa programa. An mga hoben, pati an saradit na aki, disiplinado, toninong, asin atento sa programa. An mga pamilya taraed sa tukawan. Paano daw kita makikinabang sa saindang halimbawa?
5 Makakasuratan na arogon an marahay na halimbawa nin iba. (2 Tes. 3:7) Minsan ngani tibaad laen man an satong personal na mga kamugtakan, boot man niatong makua an pinakadakulang pakinabang sa satong mga kombension. Tanganing malikayan an kahaditan asin pagkadisganar huli sa atrasadong pagduman sa lugar kan asamblea, an ibang pamilya nagtatalaan nin rasonableng oras sa pagtorog. Kaya sinda nakakatorog nin bastante asin andam na humale nin amay sa sunod na aldaw. Nalilikayan kaini an pag-abot mantang may programa na, na nakaiistorbo sa mga dati nang nagtutukaw. An pagkamakonsiderasyon niato sa bagay na ini tanda kan satong pagtaong onra asin paggalang ki Jehova asin kan satong pagkamoot saka konsiderasyon sa satong mga tugang.
6 APAT-NA-ALDAW NA KOMBENSION: An “Malinig na Tataramon” na Pandistritong Kombension malawig nin apat na aldaw. Iyan mapoon sa Huwebes ala 1:30 n.h. asin matatapos mga ala 5:10 n.h. sa Huwebes, Biyernes, asin Sabado, asin alas 4:00 n.h. sa Domingo. Sa Biyernes sagkod Domingo an programa mapoon alas 8:30 n.a. An kada aldaw pano nin mahahalagang impormasyon may koneksion sa pagtaram kan malinig na tataramon. Magkakaigwa nin mga pahayag, demonstrasyon, eksperyensia, simposium, asin duwang drama sa Biblia. Pasabot: An programa parareho sa gabos na kombension, pati an sa Metro Manila. An solamenteng kalaenan sa Manila iyo an presensia nin mga delegado hale sa ibang nasyon na inimbitaran na umatender.
7 Magdesisyon kamo na dai pumalta minsan sa sarong sesyon. Tibaad kaipuhanon kaini an personal na mga pagsasakripisyo asin pagliliwat sa saindong iskedyul. An iba tibaad kaipuhanon na gumibo nin espesyal na areglo sa saindang among. An dakol kaipuhan pa nganing dai nguna aprobetsaran an pinansial na mga bentaha tanganing makaatender sa gabos na sesyon. Minsan siring, isip-isipon kun ano an isinakripisyo nin dakol na tugang asin kinaipuhan na tagalan tanganing makaatender sa mga kombension sa Polandia kan sarong taon. Dai daw iyan nakapahihiro saindo na magin presente sa saindong kombension sa kada sesyon? Tunay na bebendisyonan ni Jehova an mga odok na ipinamimibi an bagay na iyan asin naggigibo nin odok sa pusong paghihingoa na makaatender.—Heb. 10:24, 25.
8 MAGHINANYOG NIN ODOK: Sa Salmo 50:7 si Jehova nagsasabi: “Maghinanyog kamo, banwaan ko, asin mataram ako.” Kaya, sa oras kan programa kan kombension, dai kamo magpaistorbo sa mga nangyayari asin nadadangog na daing koneksion sa iinaatubang sa plataporma. An kamawotan niato na itaram nin matibay an malinig na tataramon maninigong magpahiro sato na lubos na sumunod sa kahagadan ni Jehova sa Isaias 55:2: “Maghinanyog kamo nin odok sa sako.”
9 An gabos na iaatubang sa kombension na ini para sa satong espirituwal na ikakarahay asin magpapakosog sa satong desisyon na magdanay na marigon sa satong paglilingkod ki Jehova asin kasaro kan satong mga tugang. An kombension paaaramon kita kan presenteng mga pangangaipo asin tatabangan kita na makadungan sa organisasyon ni Jehova. An dai pag-atento magbubunga kan pagkawalat niato. Kaipuhan na isentro niato an satong atension sa programa tanganing kamtan an lubos na pakinabang dian asin dangan gibohon an satong nanodan.—Sant. 1:25.
10 May magigibo daw kita tanganing orog na makatao nin atension asin magirumdoman an iinatubang na impormasyon? Igwa. An dakol na delegado inugale na an pagkua nin nota sa oras kan programa. Iiba an sarong notebook sa saindong Biblia asin songbook kun nag-aatender sa kombension. Kun may pagduda kamo sa pagkua nin nota, taano ta dai iyan probaran sa “Malinig na Tataramon” na Kombension? Tibaad madiskobre nindo na iyan marahay na paagi na ikapako an saindong atension sa sinasabi asin na iniingatan kamo kaiyan na dai maglagawlagaw an saindong isip.
11 Dai man kaipuhan na magin halabaon an mga nota. Parate na igo na an saro o duwang frase para sa sarong mayor na punto. Narisa nin mga magurang na nakatatabang an pagkaigwa nin malinig na mga nota para sa pangengenot sa makahulogan na repaso kan programa sa kombension sa Pagtiripon sa Paglilingkod. Siring man, tibaad boot nindang gamiton an dakol sa mga puntong iinatubang sa saindang pagtotokdo asin pagpapastor.
12 AWIT ASIN PAMIBI: Tinatawan niato nin onra si Jehova sa pag-awit nin mga pag-omaw sa saiya. Iyan kabtang kan satong pagsamba. Ikinaoogma man ni Jehova kun an saiyang banwaan minadolok sa saiya sa odok na pamibi. (Tal. 15:8b) An pandistritong mga kombension nagtatao sato nin pambihirang oportunidad na makasaro kan rinibo sa satong mga tugang sa pag-omaw ki Jehova kapwa sa pag-awit asin pamibi. Minsan siring, an iba nagpaheling nin kakulangan nin paggalang sa mahahalagang kabtang na ini kan satong pagsamba. Paano? Paagi sa dai man nin dahelan na pag-abot sa kombension sa oras o pakalihis kan pambukas na awit asin pamibi. O pagkatapos kan programa, an iba minahale sa tukawan ninda sa oras kan awit asin bago an pamibi. Taano? Kun beses tibaad may marahay na dahelan sa paggibo kaini. Minsan siring, ipinaheheling daw an tamang paggalang sa lamesa ni Jehova kun an iba tinatalikdan an pribilehiyong umawit asin umiba sa pamibi tangani sanang amay na makapuli o makakakan?—Mat. 6:33.
13 Kaipuhan na magmaan na sa paghanap kan kombenyente para sa sadiri, dai niato tinotogotan na makaolang sa satong espirituwal na pag-oswag an kinabanon na kaisipan na ako nguna. Ipaheling logod niato an espiritu nin pag-apresyar sa banal na mga bagay na kapareho kan ipinaheling kan satong mga tugang sa mga kombension sa Polandia kan sarong taon, asin kita logod maglakaw na kadamay ninda paagi sa pagpaheling nin paggalang sa pamibi asin pag-awit nin mga pag-omaw ki Jehova.—Sal. 69:30.
14 AN SATONG UGALENG KRISTIANO: Huli sa satong Kristianong ugale asin itsura sa mga kombension nagkaigwa kita nin marahay na reputasyon bilang mga Saksi ni Jehova. Ini huli ta seryoso kita sa satong pagsamba ki Jehova asin dai niato ibinibilang na eskursion sana an pag-atender sa kombension. Kun nag-aatender sa siring na espesyal na mga okasyon, maninigo niatong papagdanayon an Kristianong dignidad asin espirituwal na kaisipan, na minagawe bilang mga ministro sa gabos na panahon.—1 Cor. 10:31-33.
15 Minsan siring, nakahahadit na maheling na an nagkapirang nag-aatender sa mga kombension nagin sobra na kakaswal an saindang gubing, pagtaram, asin gawe. Ano daw an magigibo kun ini namamasdan sa lokal na kongregasyon o sa mga kombension? An mga igwa nin espirituwal na kuwalipikasyon maninigong tumao nin mamomoton na hatol sa katuyohan na mabakle iyan. (Gal. 6:1; Efe. 4:11, 12) An pagtaram sa malinig na tataramon maninigong makapahiro sato na papagdanayon an satong marahay na reputasyon asin halangkaw na pamantayan nin paggawe.
16 An sarong bisita sa sarong kombension nagwalat kan surat na ini sa sarong kahon sa kontribusyon: “Nagustohan kong marhay an saindong programa. Ngonyan makikipag-adal na ako kan Biblia kaiba kan saro sa mga tugang. Ini an enot kong pagsongko sa arin man sa saindong mga asamblea. An plano ko Sabado sana umatender, ta an Domingo aldaw ko sa pagsimba. Pero naghanga akong marhay kaya nagdigdi ako ngonyan asin iiniba ko an bilog kong pamilya. Pero namondo ako sa bagay na an mga nasa edad na nag-oorolay nin makosog mantang nagtataram an espiker.”
17 Namasdan man na sa ibang kombension may pirang tin-edyer na nagtutukaw sa likod asin naghihiringhingan, asin sa kadaklan dai nagdadangog sa programa. Ini nagpapaheling na kaipuhan pa ninda an pag-asikaso nin magurang asin maninigong tumukaw kataed kan pamilya. An responsableng mga magurang tatawan nin atension an mga bagay na ini asin nin paggiyang kaipuhan an saindang mga aki. (Efe. 6:4) An gabos, hoben asin gurang, maninigong makasabot na kun may programa, iyan panahon para sa paghinanyog, bakong sa pagtaram.—Deut. 31:12.
18 Minsan ngani an mayoriya sa mga tugang nagtatao nin onra sa ngaran ni Jehova, kaipuhan na admitiron niato na an pirang pamilya na nag-aatender sa mga kombension nagtao nin dahelan na may magreklamo. Halimbawa, pakaarkila sa sarong kuwarto na may kapasidad na dai malabi sa apat o lima katawo, may mga ilinaog an sagkod sa sampulo katawo, asin iyan pandadaya. Tanganing may matorogan, an mga kutson hinale sa katre asin ibinugtak sa salog. Dangan naghagad nin ekstrang mga bedsheet. An ibang motel ngonyan habo nang paarkilahan sa mga Saksi ni Jehova an saindang mga kuwarto ta an iba linapas an regulasyon na nagpoprohibir nin pagluto. An saro pang reklamo iyo na binayaan nin mga tugang an saindang kuwarto sa motel na makanuson. An kalinigan asin konsiderasyon maninigo man na ipaheling bako sanang sa satong sulot asin gawe kundi pati sa pagtratar niato sa rogaring nin iba, nangorogna kun kita nag-iistar sa mga kuwarto sa eskuwelahan o mga edipisyo kan gobyerno na maboot na iinopresir sato kan mga namamahala sa istadyum. May dahelan daw na an sarong kuwarto dai bayaan na areglado asin malinig? An gaweng daing konsiderasyon nagigin mantsa sa satong marahay na ngaran. Sa maabot na pandistritong mga kombension, kita logod gabos maghingoa na gumawe tanganing ‘masamnohan an katokdoan kan satong Paraligtas, an Dios, sa gabos na bagay.’—Tito 2:10.
19 Sa pirang kombension, narisa kan nakaaging taon na kadakol na basura an iwinalat sa assembly hall. Dakol na kapidasong papel, patos nin dulse, bote, asin iba pang lalagan, an iwinalat na sana sa mga tukawan. Ini tunay na dai nagpapaheling nin paggalang sa ngaran ni Jehova ni konsiderasyon man sa mga naasignaran na maglinig paghale niato. Seguradohon na puroton an ano man na maheling niatong basura asin iapon iyan sa tamang mga basurahan, o kun kulang ini, ipuli iyan tanganing duman iapon.
20 Sa kombension an satong isip maninigong nakasentro sa espirituwal na mga bagay, ta ini kabtang kan satong banal na paglilingkod. Kun siring dai niato igagalang an lamesa ni Jehova kun gagamiton niato an okasyon sa pagnenegosyo o paghanap nin kuwarta, na inaaprobetsaran an dakulang kadaklan nin mga tugang na nag-atender. Liwat boot niamong ipagirumdom sa gabos na dai itotogot an pagtinda nin personal na mga bagay sa laog kan kombension, asin mga bagay sana kan Sosyedad an puwede sa bookroom o iba pang departamento kan kombension.
21 Kaoyon kaiyan, an mga departamento nin refreshment sirrado sa oras kan gabos na sesyon kan kombension, kaya kaipuhan na kumua kan kaipuhan nindo sa pag-oltanan nin mga sesyon. Paagi kaini an gabos makakapaghinanyog kan sinasabi hale sa plataporma, pati an mga nagtatrabaho sa mga departamento nin refreshment.
22 PARA SA MGA MAGURANG: An mga aki asin tin-edyer kaipuhan man na magtaram nin matibay kan malinig na tataramon. Marahayon nanggad na maheling an mga aki na nakanood na mag-atento sa gabos na Kristianong pagtiripon asin interesado nanggad sa programa kan kombension! (Sal. 148:12, 13) Pero iyan dependeng gayo sa halimbawa asin pag-asikaso kan mga magurang. An dakol na aki tinokdoan na kumua nin mga nota. Kun bilang magurang dai pa nindo tinotokdoan an saindong mga aki kun paano makua nin nota, taano ta dai gamiton an panahon na natatada bago an saindong kombension sa paggibo kaiyan? Minsan an saraditon pa puwede nang sadolon na isurat an mga teksto asin konektadong mga pangenot na tataramon na nadadangog ninda sa espiker. An ibang magurang iinaareglo na repasohon an pangenot na mga punto kan programa sa aldaw na iyan pakapuli o mantang nagbibiyahe papuli.
23 Siyempre, an kadaklan na magurang nakasasabot na an natural na hilig nin mga aki magkawat. Kulang sinda nin kabatidan sa buhay, asin bako pa sindang maygurang. Kun siring, kaipuhan sindang tokdoan kun noarin dapat na maghinanyog asin kun paano magawe sa mga pagtiripon. An ibang magurang nagin pabaya sa bagay na ini. Kun beses, minsan ngani an mga magurang tibaad nagpapaheling nin maninigong paggalang ki Jehova sa oras nin pamibi, an saindang mga aki nagkakawat asin nakaiistorbo sa iba. Maninigong aram nin mga magurang kun ano an ginigibo kan saindang mga aki sa oras nin mga pamibi. Saro pa, ano an ginigibo ninda kun sinda minahale sa saindang tukawan sa oras kan programa?—Tal. 29:15.
24 INAAPRESYAR AN SAINDONG LUBOS NA KOOPERASYON: Dakulang pagpaplano an ginibo tanganing masierto na may bastanteng tukawan, literatura, kakanon, asin iba pang probisyon para sa gabos na nag-aatender sa kombension. Tanganing masierto na epektibo an mga areglong ini, an kada kongregasyon iinasignar sa sarong kombension. Kaipuhan an lubos nindong kooperasyon tanganing malikayan an pagsurusuan. Nangorognang pasasalamatan kun an mga taga-Metro Manila estriktong kukuyogon an mga asignasyon sa saro kan tolong kombension sa Enero 3-6, 1991. Lilikayan kaini an pagsurusuan sa saro sanang istadyum. An mga tagaprobinsia puwedeng umatender sa mga kombension sa Manila asin hiningoa mi na seguradohon na may bastanteng lugar. Minsan siring, arog kan nasambitan sa enotan, pareho man sana an programa sa Manila kan saindong aatenderan sa mga probinsia.
25 Hinahagad an lubos nindong kooperasyon sa pagreserba nin tukawan. Tabi girumdomon na AN MGA TUKAWAN IKARERESERBA SANA PARA SA MGA MIEMBRO KAN SAINDONG PAMILYA ASIN SA SIISAY MAN NA KAIBA NINDO SA BIYAHE SA SAINDONG KOTSE. Tabi dai magreserba nin tukawan para sa iba. Kun beses, mayo man nin partikular na rinireserbahan nin tukawan. Ini bakong mamomoton asin nakadadaya sa mga attendant asin iba pang naghahanap nin tukawan. Kaoyon sa hatol kan Biblia, maninigo na kita maghingoa na magpaheling nin pagkamoot sa tugang asin lubos na magkooperar sa aprobadong areglo sa pagreserba nin tukawan.—2 Ped. 1:5-8.
26 An paggamit nin video camera asin audio recording equipment togot sa lugar kan kombension. Minsan siring, an mga naggagamit nin siring na mga kasangkapan dai dapat na makaistorbo o makaribok sa iba. An siring na kasangkapan dai maninigong ibugtak sa mga agihan o luluwasan. Mayo nin siring na kasangkapan na maninigong ikonektar sa public address system. Dai totogotan an mga floodlight. An mga nakaiistorbo maninigong itanos tolos an bagay kun iyan iinaapod sa saindang atension. An mga attendant mag-aalisto na itanos an ano man na paglapas sa mga giyang ini, asin maninigo na akoon ninda an lubos na kooperasyon kan mga naggagamit nin siring na kasangkapan.
27 Tunay nanggad, an banwaan ni Jehova inaapresyar an pagtiripon sa magayon na mga pasilidad kada taon tanganing makinabang sa espirituwal na programang inandam. Inaapresyar man niato an dakol na serbisyo asin katrangkilohan na itinatao sa siring na katiriponan. Sa dakulang gastos kan Sosyedad, ginigibo an mga areglo para sa mga istadyum o hall, sound system, asin dakol pang ibang serbisyo na minagibo sa satong mga kombension na makaoogma asin nakarerepresko sa espirituwal.
28 An mga gastos na ini natatahoban kan saindong boluntad na mga kontribusyon sa pagsuportar sa lakop sa kinaban na gibohon kan Sosyedad. Tanganing kombenyente para sa saindo, an may klarong tandang mga kahon sa kontribusyon yaon sa gabos na lugar kan kombension. An gabos na kontribusyon pinasasalamatan na gayo, asin an Sosyedad boot na patienot na magpasalamat sa saindo para sa saindong matinao asin sararong pagsuportar sa intereses kan Kahadean sa paaging ini. Kami nagsasarig na an gabos mapahihirong mamatean an saindang indibiduwal na paninimbagan sa bagay na ini asin lubos na makooperar paagi sa pakikikabtang sono sa itinotogot kan saindang kamugtakan.—Luc. 6:38.
29 UMATENDER SA “MALINIG NA TATARAMON” NA PANDISTRITONG KOMBENSION: Paagi sa pag-atender sa “Malinig na Tataramon” na Pandistritong Kombension asin paghinanyog nin maingat sa programa, orog pa nindong lubos na masasabotan kun taano ta itinao sa sato ni Jehova an malinig na tataramon asin kun taano ta dapat kitang perming mag-ingat tumang sa ano man na paslong tendensia na makaoolang sa satong pagigin kasaro kan satong mga tugang. Gibohon na ngonyan an saindong mga plano na magin presente para sa pambukas na awit asin umatender sa gabos na sesyon sagkod sa pantapos na pamibi sa Domingong hapon.
[Kahon sa pahina 6]
Mga Pagirumdom sa Pandistritong Kombension
DADAGUSAN: Mapadara kami nin suplay nin mga pormang Room Request sa kada kongregasyon. An mga nagkakaipo nin dadagusan sa mga kombension sa probinsia maninigong pumirma sa saro sa mga pormang ini asin itao iyan sa nagkokoordinar kan kombension sa saindong kongregasyon. Ririsahon nia asin pipirmahan iyan, dangan ipadadara iyan sa Watch Tower Convention sa saro kan mga adres na nasa ibaba. Pasabot: Mayo nin areglo nin dadagusan para sa mga kombension sa Manila. Kaya an mga hale sa probinsia na maatender sa Manila kaipuhan na areglohon an sadiri nindang dadagusan.
BAUTISMO: An mga kandidato sa bautismo maninigong maghingoa na nagtutukaw na sa sinabing lugar bago pumoon an programa sa Sabadong aga. An mabining pankarigos asin tuwalya maninigong darahon kan kada saro na nagpaplanong pabautismo. Pakatapos kan pahayag sa bautismo asin pamibi kan espiker, an tsirman kan sesyon matao nin halipot na instruksion sa mga kandidato sa bautismo dangan mapakanta. Sa pagpopoon kan ultimong berso, gigiyahan kan mga attendant an mga kandidato sa bautismo sa lugar nin pagbautismo o sa mga lunadan na magdadara sa sainda duman, mantang tinatapos kan ibang presente an pagkanta. Mantang an bautismo bilang simbolo kan pagdusay nin saro sarong dayupot asin personal na bagay sa pag-oltanan kan indibiduwal asin ni Jehova, mayo nin probisyon para sa inaapod na magkaparehang mga bautismo kun saen an duwa o orog pang kandidato sa bautismo magkukurugusan o magkakaraputan nin kamot mantang binabautismohan.
ESPESYAL NA MGA MITING: May gigibohon na pakipagmiting sa gabos na regular asin espesyal payunir saka mga nagbibiyaheng paraataman sa alas 11:15 n.a. sa Biyernes, mantang an pakipagmiting sa gabos na kamagurangan gigibohon sa alas 11:15 n.a. sa Sabado. An mga lugar kan mga miting na ini ipaiisi sa plataporma.
PIONEER IDENTIFICATION: An gabos na regular asin espesyal payunir, saka nagbibiyaheng mga paraataman, kaipuhan na darahon sa kombension an saindang Identification and Assignment card (S-202). An mga payunir na nasa lista poon kan Hulyo 1, 1990 o bago kan petsang iyan puwedeng umako nin halagang ₱80.00 na tiket sa kombension basta ipresentar an saindang ID card sa sarong kombension na iyan sana. Ingatan an card na garo kuwarta. Dai iyan masasalidahan sa kombension.
PAGBOBOLUNTARYO: An tabang nin mga boluntaryo kaipuhan para sa pulidong pag-andar kan pandistritong kombension. Minsan kun puwede kamong magtrabaho para sa kabtang sana kan kombension, an saindong paglilingkod pasasalamatan. Kun puwede kamong makatabang, tabi magreport sa Volunteer Service Department sa pag-abot nindo sa kombension. An kaakian na dai pang 16 anyos an edad puwede man na makakontribuwir sa kapangganahan kan kombension, alagad hinahagad na sinda magtrabaho kaiba nin magurang o iba pang responsableng adulto.
LAPEL CARDS: Tabi isulot an may espesyal na disenyong lapel card sa kombension asin mantang nagbibiyahe paduman asin hale sa lugar kan kombension. Parateng ginigibo kaining posible sa sato na magtao nin marahay na patotoo mantang nagbibiyahe. An lapel cards maninigong kuanon paagi sa kongregasyon, mantang an mga ini dai makukua sa mga kombension. (Pasabot sa sekretaryo: An lapel card maninigong pedidohon sa Special Order Blank for Forms. Kun ini dai nagibo, magpadara na ngonyan kan regular na S-14 na pedido para kaini.)
PATANID: Saen man kamo umatender, bantayan an saindong mga dara-dara sa gabos na oras. Kun kamo may kotse, seguradohon na iyan barat asin dai magwalat nin ano man na mahalaga sa napaparadang kotse. Siring man, mag-ingat kamo sa mga parahabon asin mandurukot na perming yaon sa darakulang katiriponan. Kabale digdi an dai pagwalat nin ano man na may halaga sa tukawan na mayo nin nagbabantay. Tabi mag-ingat.