Mapusong Ipaabot an Imbitasyon na “Madia!”
1 An marikas na mga pangyayari sa bilog na kinaban nagpapamidbid sa mga panahon na ini bilang an “huring mga aldaw.” (2 Tim. 3:1-5) An pag-oswag nin krimen, daing karigonan sa ekonomiya, asin an nagsasapeligro sa buhay na mga helang nakadugang sa pangigipit sainda. Pero sa atubang nin siring na mga kamondoan, an mga tawo tinatawan nin imbitasyon na makaaapektar sa sainda sagkod lamang. An espiritu asin an nobya padagos na nagsasabi: “Madia!” Asin ngonyan “sarong dakulang kadaklan” an nakikiiba sainda sa pag-imbitar sa mga tawo saen man na dumolok asin kumua kan tubig nin buhay na daing bayad.—Kap. 7:9; 22:17.
2 Ngonyan, an dakol na napapaha sa katanosan naghihimate sa imbitasyon na ini. Kan nakaaging taon minilyon an nag-atender sa pandistritong mga kombension na ginibo sa bilog na kinaban, asin haros sampulong milyon an presente sa Memorial. Minilyon pang iba an nagpapaheling nin apresasyon sa probisyon ni Jehova paagi sa paghinanyog sa mensahe kan Kahadean. Kaya, kanigoan kahalaga nanggad na madonong niatong gamiton an satong panahon sa pagpaabot kan imbitasyon na ini nin hayagan asin sa harong-harong!—Gibo 5:42; Efe. 5:15, 16.
MAPUSONG MAKIKABTANG
3 An enot na mga Kristiano linamag huli sa saindang maigot na paghulit. (Gibo 16:19-21; 17:2-8) Alagad, dai sinda nag-ontok sa saindang mapusong paghingoa na ipahayag an maogmang bareta. Kita man maninigong magin mapuso asin determinado sa satong mga paghingoa na ihulit an maogmang bareta.
4 Maski ngani sa mga nasyon na ibinabawal an gibohon, an mga tugang nakikikabtang nin bilog na puso sa gibohon na paghuhulit sa ibong nin makuring paglamag, kabilang an posibleng pagkawara nin trabaho, harong, asin maski ngani nin saindang katalingkasan. An saindang marahay na halimbawa nagseserbing panpakosog sato na padagos na imbitaran an iba na “Madia!”—2 Tes. 3:9.
5 Sa labi nang 35 taon, sarong tugang na babae an nagdanay sa pagmawot kan saiyang puso na magpayunir. An saiyang mga kamugtakan naliwat kan 70 anyos an edad nia, asin sia nagin regular payunir. Maski ngani dikit na tawo na siring an edad an malaog sa bagong karera, ginibo nia an siring. Sa paggayagaya sa paglilingkod bilang payunir sa dakol na taon na ngonyan, sinabi nia, “Nagigin mas marahay aroaldaw.”
6 Siring kan enot na siglo, an mga tawo ngonyan naghihimate sa imbitasyon na ini, liniliwat an saindang pag-isip asin isinisikwal an dai nagtataong onra sa Dios na mga gawe. Sinda nagin kabtang nin nagdusay na internasyonal na pagkanitugang nin mga Saksi asin nakikiiba sa espiritu asin sa nobya sa pagsabing “Madia!” sa dakol pang ibang sadiosan an pusong mga tawo.
7 An dakulang pag-oswag sa gibohon kan Kahadean asin an pagpahiwas kan mga sangang opisina sa dakol na kadagaan nagpapatotoo sa bendisyon ni Jehova. Alagad nauubos na an panahon para sa daan na palakaw na ini. Ngonyan an panahon na ipaheling an kapusoan asin kaigotan sa pagsabing “Madia!” tanganing an iba marikas na maghimate asin humiro sa nadangog ninda. Gibohon niato ini durante kan Hulyo asin Agosto paagi sa kampanya nin brochure.—Gibo 20:26, 27; Roma 12:11.