Pagpaheling nin Personal na Interes sa Iba
1 An interes ni Jehova sa iba abunda nanggad na naheheling. Bako daw na nagtao siang buka an palad sa saiyang linalang? (Gen. 1:29, 30; 2:16, 17; Mat. 5:45; ikomparar an Lucas 6:35.) Orog na mahalaga, bako daw na nagpaheling sia nin personal na interes sato paagi sa paggibo nin probisyon para sa satong kaligtasan sa kasalan asin kagadanan?—Juan 3:16.
2 Inarog ni Jesus an sangkap na halimbawa kan saiyang Ama sa pagpaheling nin personal na interes sa iba. (Mat. 11:28-30; 1 Ped. 2:21) Kan sinabi nin daoton na tawo ki Jesus: “Kagurangnan, kun boot mo sana, mapalilinig mo ako,” nagsimbag si Jesus, “Boot ko,” asin naomayan sia. (Mat. 8:2, 3) Saiya man na binuhay liwat an sarong hoben na lalaki harani sa Nain huli sa pagkaherak sa saiyang nabalong ina. (Luc. 7:11-15) Maski an saradit na kaakian minansay na angay sa saiyang panahon asin atension, asin bako nanggad siang sibot na gayo tanganing rangahon asin pakosogon an iba.—Mat. 20:31-34; Mar. 10:13-16.
AN PAMILYA ASIN MGA KATOOD
3 Maninigo tang pagmaigotan na magin siring ki Jehova asin ki Jesu-Cristo sa paghanap nin mga paagi na ipaheling an personal na interes sa iba. Konsideraron niato an nagkapirang paagi tanganing gibohon iyan.
4 An saro sa pinakadakulang pangangaipo iyo an pagpaheling kan mga tugang nin tunay na interes sa mga miembro kan sainda mismong pamilya asin dai pagpabaya sa saindang espirituwalidad. Sa saindong panpamilyang pag-adal, ginigibo daw nindong praktikal asin nakaiinteres an materyal? Regular daw kamong naghuhulit sa paglilingkod sa langtad na kaiba an kada miembro kan pamilya? Pinatatalubo daw nindo sa saindong mga aki an pagmawot na tabangan an ibang tawo?
5 Sa satong sibot na pamumuhay, linilingawan daw niatong ipaheling an personal na interes sa mga miembro kan kongregasyon na may espesyal na mga pangangaipo? (Tal. 3:27; Gal. 6:10) Sa kongregasyon may mga ilo, gurang, balo, may helang, asin mga nagmomondo. Maninigong dai niato paglingawan na magpaheling nin personal na interes sa gabos niatong tugang.—1 Cor. 10:24; Fil. 2:4; Heb. 13:16.
MGA AROG-KARNERO SA LANGTAD
6 Paano kita makakapaheling nin personal na interes sa mga tawo na nag-aadal nin Biblia? Maski ngani kita sibot, nagpapaheling daw kita nin interes sainda asin ipinamamate na inaako sinda bilang satong bagong mga katood? Kita daw gikanan nin panpakosog sa sainda maski ngani bako kita an nakikipag-adal sainda?—Ikomparar an Marcos 10:28-30.
7 Puwede daw kamong magkaigwa nin mas dakulang kabtang sa pagpaheling nin odok sa boot na interes sa mga tawo na naghihinanyog sa maogmang bareta? Personalmente, ano an puwede nindong gibohon tanganing magkaigwa nin mas dakulang kabtang sa ministeryo sa langtad? Dai magpogol kun kamo nasa kamugtakan ngonyan na makikabtang nin orog pa.—Luc. 9:60-62.
8 Maninigo niatong arogon si Jehova asin si Jesus sa pagpaheling nin personal na interes sa iba. Iyo, maninigong danay niatong hanapon an mga paagi na ipaheling an satong personal na pagmakolog sa sainda.