Magplano Na Ngonyan Para sa Espesyal na Aktibidad sa Tig-initan
1 Aram niato gikan sa kabatidan na an marahay na mga resulta minagikan sa maingat na pagpaplano. (Tal. 20:18; 21:5) Pinanunugaan kita ni Jehova na tatabangan nia kitang magin mapanggana an satong dalan.—Tal. 16:3.
2 Parate na an mga bulan poon Enero sagkod Mayo kada taon marahay an panahon, asin sa pirang kabtang kan panahon na ini an satong mga aki bakasyon sa eskuwelahan. Kaya ini marahay na panahon na magplano para sa orog na teokratikong aktibidad. Marahay na patienot na iplano tanganing madeterminaran kun arin na mga aktibidad an maninigong ipaorog sa iba. (Luc. 14:28-30) Malinaw na sa pag-establisar kun ano an mahalaga, an intereses kan Kahadean maninigong enoton sa ibang bagay.—Mat. 6:33; 1 Ped. 2:11.
3 Magplanong Mag-auxiliary Payunir: An mga bulan na tig-initan ekselenteng oportunidad na mag-auxiliary payunir. An mga hobenes na bakasyon dinadagka na gamiton an kisuerra sarong bulan ngonyan na tig-initan bilang auxiliary payunir. Taano ta dai dagkahon an ibang hobenes na magkainteres na umiba sa mga nagpalista? An panahon na ginamit sa paaging ini nakadudugang sa espirituwal na pagtalubo nin saro.
4 Kan nakaaging Abril 15,730 an nag-auxiliary payunir dangan kan Mayo may 11,494. Marahayon nanggad ini! Sa pag-oltanan nin Enero asin Hunyo, 45,306 gabos an nakikabtang sa gibohon na ini. Kumusta man ngonyan na taon? Irinerekomendar mi na pumoon na ngonyan an gabos na iplano an saindang mga aktibidad. An iba tibaad puwedeng magpayunir nin pirang bulan, mantang an iba tibaad mga saro o duwang bulan sana. Aram niato na abundang bebendisyonan ni Jehova an ano man na makaya nindo sa paglilingkod sa saiya ngonyan na tig-initan.
5 Sa Panahon nin Memorial: An selebrasyon kan Memorial ngonyan na taon gigibohon sa Biyernes, Abril 17, 1992, pagkasolnop kan aldaw. Girumdomon na an paglibot kan mga emblema dai maninigong pumoon sagkod na dai pa nasolnop an aldaw, minsan ngani puwedeng pumoon nin mas amay an pahayag. Ini marahay na oportunidad na papoonon an mga bagohan na makiasosyar sa organisasyon ni Jehova, kaya maninigo na kita magin espesyal an kaigotan sa satong paghuhulit sa panahon na ini. Maresibi kamo nin inimprentang mga imbitasyon sa Memorial, asin magagamit nindo ini sa pag-imbitar sa mga dai pa napoon na umatender sa mga pagtiripon.
6 Tibaad huli sa marahay na panahon puwede man na hulitan an teritoryong hararayo na masakit maabot sa tig-oranan. Taano ta dai gumibo nin espesyal na paghihingoa na hulitan an gabos na hararayong teritoryo sa panahon kan Memorial?
7 Mantang pinaplano niato an satong mga aktibidad sa tig-initan ginigibo niato iyan na igwa kan mapagngayongayong punto-de-vista kan Salmo 90:12. Kun matapos na an tig-initan dai kitang ikapamamasol kun kita madonong na nagplano asin ginamit sa kapakipakinabang na paagi an satong panahon. Magkakaigwa kita nin kadakol na maogma, teokratikong mga eksperyensiang gigirumdomon.