Espirituwal na Pagkakan sa Aroaldaw—Mahalaga Para sa Kristianong Pamilya
1 “An tawo dapat na mabuhay, bakong sa tinapay sana, kundi sa lambang tataramon na minaluwas sa ngoso ni Jehova.” (Mat. 4:4) Totoo nanggad an mga tataramon na ini! Tanganing matabangan kita na regular na kumakan sa Tataramon nin Dios, ipinublikar kan Sosyedad an pulyeto na Pagsiyasat sa Kasuratan Aroaldaw. Bilang Kristianong pamilya, nagtatagama daw kamo nin oras kada aldaw tanganing pag-olayan an pan-aroaldaw na teksto?
2 Kaipuhan na Magin Arogan an mga Magurang: Huli sa aroaldaw na kasibotan, pasil sanang idigson an pag-orolay sa teksto, na iniisip na puwede iyan gibohon sa ibang panahon. Pero kun an mga magurang naggigirumdom sa espirituwal na pangangaipo kan saindang pamilya, magkakaigwa sinda nin panahon kada aldaw na gibohon an siring kun iriba an pamilya. (Mat. 5:3) Dai sana ninda babasahon an teksto kaiba an saindang mga aki kundi itatampok man an mga punto sa mga komento kan Torrengbantayan asin ipakikipag–olay kun anong aplikasyon an puwedeng gibohon sa impormasyon asin sadol. Totoo, tibaad nangangaipo nin pagmamaigot tanganing matood, alagad bawi an mga kapakinabangan. (Ikomparar an Gibo 17:11, 12.) Kaya mga magurang, magmahigos na itao an marahay na halimbawa!
3 Humanap nin Kombenyenteng Panahon: Noarin an pinakamarahay na panahon na an bilog na pamilya magtiripon para sa pag-orolay sa teksto? Igwa nin bentaha sa pagpopoon kan aldaw paagi sa pag-orolay sa sarong teksto sa Biblia. Sa Bethel asin mga harong kan misyonero sa bilog na kinaban, pinoponan an aldaw paagi sa pan-agang pagsamba, na kabale an pag-orolay sa teksto kan aldaw. Nagtatabang ini sa mga tugang na maponan nin marahay an aldaw, na aroaldaw na naghohorophorop sa mga pagirumdom ni Jehova.—Sal. 1:1, 2; Fil. 4:8.
4 Makikinabang man an Kristianong mga pamilya sa pan-agang pag-orolay sa Biblia. Matatabangan an mga aki na atubangon an mga peligro sa saindang espirituwalidad sa eskuwelahan. Kun sa sarong panahon bakong posible para sa bilog na pamilya na iribang pag-olayan an teksto, an mga magurang puwedeng gumibo nin laen na mga areglo tanganing dai mapaltahan an espirituwal na pagkakan na ini. Halimbawa, kun an ama kaipuhan na lumaog sa trabaho bago magmata sa aga an mga aki, tibaad puwedeng ipakipag-olay kan ina an teksto sa mga aki. An ibang pamilya pinag-oolayan an teksto sa banggi ta iriba na sinda sa panahon na iyan. An kada pamilya puwedeng gumibo nin iskedyul na pinakamarahay sa mga kamugtakan kaiyan.
5 Mahalaga an espirituwal na pagkakan aroaldaw para sa Kristianong pamilya. Tawan nin pangenot na lugar an pag-orolay sa pan-aroaldaw na teksto. (Fil. 1:10) Makatatabang sato an pag-orolay sa sarong teksto sa Biblia kada aldaw na mangapot nin marigon sa matanos na mga prinsipyo asin pagboot ni Jehova.