Isadol an Paghihingoang Maabot an Espirituwal na mga Pasohan
1 Kasuarin man dai pa nagkaigwa kaidto nin kadakol na hobenes na nakikabtang sa paghuhulit kan maogmang bareta kan Kahadean! Manampulong ribo an nag-aako kan sadol sa Eclesiastes 12:1: “Girumdoma, ngonyan, an saimong Dakulang Kaglalang sa mga aldaw kan saimong pagkabarobata.” Ano an nagpapahiro sa mga hobenes na ini na makikabtang sa ministeryo, asin taano ta kadakol sainda an nakiiiba sa paglilingkod bilang payunir?
2 Daing duwa-duwa na dakol an nag-aarog sa gawe kan marahayon na hoben na si Timoteo. Tinawan sia kan saiyang ina asin lola nin espirituwal na edukasyon poon pagkaomboy asin dinagka sia na pag-aaboton an espirituwal na mga pasohan. (2 Tim. 3:14, 15) Kaya kan lumataw an oportunidad para sa dugang na mga pribilehiyo nin paglilingkod, kuwalipikado asin andam na sia.—Gibo 16:1-3.
3 Paano madadagka an dakol pang hobenes na pag-aaboton an espirituwal na mga pasohan? Paano mapatatalubo kan mga magurang sa saindang mga aki an pag-apresyar para sa katotoohan asin tabangan sinda na magbugtak nin mga pasohan para sa saindang sadiri?
4 Magbugtak nin Makakasuratan na Pundasyon: Maninigong siertohon kan mga magurang na an saindang itinotokdo sa saindang mga aki gikan ki Jehova tanganing gibohon kaiyan an saindang mga aki na ‘madonong para sa kaligtasan.’ (2 Tim. 3:15) Odok na pagmaigotan na makultibar sa sainda an hararom na pagkamoot sa Tataramon nin Dios. Ini nangangaipo nin regular, makahulogan na pag-adal sa Biblia, kaiba an regular na pag-atender sa pagtiripon. Kaipuhan man na magkaigwa an mga hobenes nin sadiring personal na programa nin pag-adal asin pataluboon an sadiring relasyon ki Jehova.—1 Tes. 5:21; Heb. 11:1.
5 Magigin mas andam an hoben na mga Kristiano na magmaigot sa espirituwal na mga intereses kun an saindang mga magurang asin iba pang maygurang sa kongregasyon nagtatao nin marahay na halimbawa asin ipinababanaag “an kaogmahan ni Jehova.” (Neh. 8:10) Paagi kaini, ikapaheheling niato gabos sa mga hobenes na an mga kahagadan kan tunay na Kristianismo bakong magabat.—1 Juan 5:3.
6 Dakol na mga hobenes an naimpluwensiahan na marhay kan mga payunir, misyonero, asin nagbibiyaheng mga paraataman na nag-iba sainda sa paglilingkod sa langtad o pinakosog sinda. Puwedeng makatabang an mga magurang paagi sa pag-imbitar sa saindang harong kan arogan na mga naglilingkod nin bilog na panahon para sa pagkakan o para sa Kristianong asosasyon. Itinao ni Jesus an pinakamarahay na halimbawa kan pagtatao nin timbang na atension sa mga hoben.—Mar. 10:13-16.
7 Pagbugtak nin mga Pasohan: May tamang giya kan mga magurang, parateng amay pa na nakabubugtak an mga aki nin espirituwal na mga pasohan para sa saindang sadiri. Pakadesisyon kan mga hobenes kun ano an espirituwal na pasohan na boot nindang aboton, magsalang paglilingkod bilang payunir, paglilingkod sa Bethel o bilang misyonero, mapakokosog sinda kan mga magurang asin iba pang maygurang na padagos na maghingoa na maabot an saindang pasohan, na nagtatao nin praktikal na mga suhestion sa pagsadol sainda.
8 Garo pamilya an kada kongregasyon. Kaya an kada saro sato maninigo na interesado sa pagtabang sa mga hobenes na magpadagos na lumakaw sa katotoohan asin gumibo nin espirituwal na pag-oswag.