Mapalalaad daw Giraray an Interes?

¹ “Maogma idtong mga nakamamate kan saindang espirituwal na pangangaipo.” (Mat. 5:3) An mga tataramon na idto ni Jesus sa saiyang Sermon sa Bukid pano-pano nin kahulogan. Kadikit sana sa katawohan an nakasasabot na nangangaipo sinda nin espirituwal na mga bagay tanganing gibohon an saindang buhay na maogma asin may katuyohan. Igwa nin nagkapira na kan enot igwa kan pakamateng iyan sa espirituwal na mga pangangaipo pero iwinara iyan. May bagay na nagin dahelan na sinda naglipot manongod sa espirituwal na mga bagay. Tuminalikod sinda dian sa talagang para sa saindang kapakinabangan. An hapot iyo ini, Mapalalaad daw giraray an interes kan mga siring? Makaoogma, para sa nagkapira iyo.

² Tibaad may midbid kamong saro na nag-adal kan Biblia sa mga Saksi ni Jehova mga pirang taon na an nakaagi, tibaad kan aki pa ngani, pero dai nagpadagos na makiasosyar sa banwaan nin Dios. Pero, an pirang katokdoan asin matanos na mga prinsipyo sa Biblia tibaad ikinatanom na sa isip kan sarong iyan asin nagigirumdoman pa. Mantang naggagrabe an mga situwasyon sa kinaban asin nagliliwat an mga kamugtakan sa buhay, nagigirumdoman an mga bagay na nanodan kaidto asin an saro tibaad bumalik sa Dios asin andam na umako nin dugang na kaaraman sa Biblia. An pagdalaw sa siring na mga tawo sa katuyohan na ponan giraray an pag-adal sa Biblia puwedeng mapatunayan na pinakakapakipakinabang.

³ Tunay nanggad na kaipuhan na gibohon an paghihingoa sa panapanahon na dumalaw sa mga nag-atender sa pagselebrar kan Memorial. Ipaaram sainda na kamo tunay na nagmamakolog dapit sa saindang espirituwal na kapakanan, asin alokon na adalan sinda sa Biblia. Kaipuhan na gibohon an espesyal na paghihingoa na tabangan man an mga nag-atender sa pandistritong mga kombension o pansirkitong mga asamblea. Sa ibang kamugtakan tibaad mas marahay na ibang parahayag an dumalaw sa tawo na dai ikinapadagos an pag-adal huli ta kulang sa pag-oswag.

⁴ Siyempre, an mga tawo na inaadalan niato linalaoman na isapuso an pagsamba ki Jehova asin ipaheling an dakulang kahigosan sa saindang pag-adal sa Biblia. Pero sa kabtang niato, boot niatong siertohon na ginibo niato an igong pagmamaigot na makatabang asin na an puwedeng magin pagmate niato dapit sa iba arog kan ki apostol Pablo kan sabihon nia na, “malinig ako sa dugo kan gabos na tawo.”​—Gibo 20:26.