Pakikokooperar sa Konduktor kan Satong Pag-adal sa Libro kan Kongregasyon
1 An Pag-adal sa Libro kan Kongregasyon igwa nin mahalagang kabtang sa pagpaoswag nin satong mga kakayahan bilang mga ministro. An mga grupo tuyong pinapagdanay na sadit tanganing magkaigwa nin mainit, garo pamilyang atmospera para sa pag-adal kan Biblia. Madaling nakukua an personal na pagdagka asin atension paagi sa areglo nin pag-adal sa libro. Paano kita lubos na makikokooperar sa konduktor asin makikinabang sa marahay na probisyon na ini?
2 Maigot na Pakikakabtang sa Ministeryo sa Langtad: An saro sa pinakamahalagang paninimbagan kan konduktor sa pag-adal sa libro iyo an pagtabang sa lambang saro sa grupo na magkaigwa nin maigot na pakikakabtang sa ministeryo. Manongod digdi, an librong Our Ministry nagpapagirumdom sato sa pahina 44 na an “pagigin regular, kaigotan asin entusiasmo na ipinaheheling nia sa aktibidad sa langtad maheheling sa mga parahayag.” Masusuportaran daw nindo nin regular an pagtiripon bago maglingkod sa langtad? An saindong paggibo kaini aapresyaron nin marhay kan saindong konduktor sa pag-adal sa libro asin kan ibang parahayag.
3 An pagtiripon bago maglingkod sa langtad iinaareglo sa kombenyenteng mga lugar tanganing an gabos maigot na makapakikabtang sa paghuhulit. Mantang kinokonsiderar an lokal na mga kamugtakan, an kada grupo bobooton na makapoon nin amay sa ministeryo.
4 Gusto mo daw na matabangan sa ibang kabtang kan ministeryo? An konduktor sa pag-adal puwedeng mag-areglo na an sarong may kakayahan na parahayag tabangan kamo. Sa katapusan kan bulan, siertohon na itao tolos an saindong report. Aapresyaron kapwa kan konduktor sa pag-adal sa libro asin kan sekretaryo an saindong kooperasyon digdi.—Ikomparar an Lucas 16:10.
5 Kun Dinadalaw kan Paraataman sa Paglilingkod an Grupo: An paraataman sa paglilingkod sa parate dinadalaw an sarong grupo nin pag-adal sa libro kada bulan. Hinanyogon nin marhay an itatao niang 15-minutong pahayag sa pagtatapos kan pag-adal sa libro, ta ini magtatao nin espisipikong konseho sa grupo sa kun paano paooswagon an laen-laen na kabtang kan paghuhulit. An paraataman sa paglilingkod galaga man na makiiba sa mga nasa grupo kan pag-adal sa libro kun Sabado asin Domingo. Siertohon na aprobetsaran an espesyal na probisyon na ini tanganing kamo makinabang sa saiyang eksperyensia asin kakayahan sa langtad.
6 An satong personal na halimbawa nin pagkooperar asin satong pagigin andam na tabangan an mga kulang an kabatidan matabang na magkaigwa nin mainit, makiamigong atmospera sa Pag-adal sa Libro kan Kongregasyon mantang kita “naggigibo nin marahay sa gabos, alagad orog na sa mga may relasyon sa sato sa pagtubod.”—Gal. 6:10.