Bagong Programa sa Pansirkitong Asamblea
1 Bilang pagsunod sa mga tataramon ni Jesus sa Mateo 6:33, an tunay na mga Kristiano perming inienot an Kahadean sa saindang buhay. Kun siring, an “Padagos na Hanapon Nguna an Kahadean” sarong angay na tema para sa programa sa pansirkitong asamblea na mapoon sa Pebrero, 1994.
2 Sa kapinonan itatampok kan programa an katunayan kan Kahadean, na idinodoon na iyan sarong nagpupunsionar na pamamahala na igwang teritoryo, mga namamahala, mga sakop, asin mga ley. An totoo, an kadaklan sa mga ley nin mga pamamahala nin tawo na nagtatao nin pakinabang sa sosyedad ngonyan basado sa mga ley kan Biblia. Magpoon kan 1914 naheling niato an mga epekto kan pamamahala kan Kahadean sa mga sakop kaiyan, na ngonyan nasa 229 laen-laen na nasyon kan daga.
3 Ipaliliwanag an proteksion asin mga bendisyon na satong inaako gikan sa pag-enot kan Kahadean sa gabos na kabtang kan satong buhay. Itatao an mapakikinabangan na mga hatol tanganing ipaheling kun paano ta malilikayan an dai kinakaipuhan na paghadit. Ipaheheling kan mga pahayag, demonstrasyon, asin pag-orolay kun taano ta importanteng marhay na papagdanayon na simple an satong mata.
4 Sa Sabado kan asamblea, an kuwalipikadong mga kandidato sa bautismo ikapahahayag sa publiko an saindang pagdusay ki Jehova. Asin sa Domingo, bobooton niato gabos na magin presente para sa pahayag-publiko, na an tema “Kun Ano an Gigibohon kan Kahadean nin Dios Para sa Katawohan.”
5 Siertohon na gibohon an saindong mga plano na magin presente sa duwang aldaw kan pansirkitong asamblea, asin imbitaran na umatender man an mga kinokonduktahan nindo nin mga pag-adal sa Biblia. An saindong paraataman sa sirkito papaisihon kamo kan mga petsa kaini sa tamang panahon. An programa sa asamblea, na may maogmang sa-magturugang na pag-iribaiba, matao nin nakaoogma asin nakagiginhawang pagpakosog na mayo sa sato an boot na palihison.