Lubos na Suportaran an Programa sa Pampublikong Pagtiripon kan Saindong Kongregasyon
1 Mga pirang taon na an nakaagi an sarong soltero nakakua nin handbill na nag-aanunsio kan mga pagtiripon kan kongregasyon sa lokal. Mantang hinahanap nia an katotoohan, nagdesisyon siang umatender sa Pampublikong Pagtiripon kan Domingong iyan, na uminabot nin amay sa hall. Sarong parahayag an mainit siang tinaratara asin inalok sia nin pag-adal sa Biblia. An solterong ini marikas na nag-oswag asin nabautismohan pakaagi nin nagkapirang bulan. Makanonood kita nin kisuerra tolong nakatatabang na leksion gikan sa eksperyensiang ini.
2 Enot, an Pampublikong Pagtiripon iinanunsiar. Naggagamit daw kamo nin mga handbill tanganing ianunsiar an mga Pampublikong Pagtiripon kan saindong kongregasyon? Mantang iinaanunsiar kan tsirman an titulo kan pahayag-publiko na ipahahayag sa masunod na semana, isipon an mga nasa teritoryo nindo na tibaad nangorognang interesado sa tema. May mga tawo na habong magbasa, pero tibaad magusto sindang maghinanyog sa sarong pahayag manongod sa Makakasuratan na topiko.
3 Ikaduwa, an bagohan tinawan nin mainit na pag-ako. Iplano na umabot nin amay sa hall tanganing mataratara nindo an saindong mga tugang saka an siisay man na mga interesado. (Heb. 10:24) Kun nag-atender an sarong bagohan sa kaenot-enote, tibaad dai nia aram kun ano an malalaoman. Ipaliwanag na an satong mga pagtiripon pinoponan nin awit asin pamibi, asin sabihon saiya kun paano gigibohon an pagtiripon. Kun angay, imbitaran sia na tumaed saindo tanganing ikahiras nindo saiya an saindong Biblia asin songbook. Imbitaran sia na ipakipag-olay saindo oras na matapos an pagtiripon an ano man na tibaad mga hapot nia.
4 Ikatolo, an pahayag inandam nin marhay. An mga nagrerepresentar kan kongregasyon bilang mga pampublikong espiker naggagamit nin dakol na oras sa pag-andam kan materyal tanganing an mga nagdadangog mapahiro sa pagkamoot asin marahay na mga gibo. Kita gabos nasa irarom nin pangigipit ngonyan, asin an nakarerepreskong mga katotoohan na gikan sa Tataramon nin Dios makatatabang sa sato na makatagal. Siyempre, an pahayag-publiko dai niato mapakikinabangan kun dai kita magtatao nin maingat na atension sa sinasabi. Nagkakaigwa daw kamo kun beses nin kadepisilan sa pagkonsentrar durante kan pahayag? Tibaad makatatabang an pagkua nin haralipot na nota, arog kan ginigibo niato durante kan mga kombension. Sa pag-andam, isipon kun ano an aram na nindo manongod sa tema asin an ano man na hapot na lumataw mapadapit dian. Dangan mangnohon kun paano sinisimbag kan espiker an mga hapot. Siertohon na sundan sa saindong Biblia mantang binabasa asin ipinaliliwanag an kada Kasuratan.
5 An Sosyedad nagtao nin mga pahayag-publiko manongod sa dakol na laen-laen na tema. Sa pakikipagtabangan sa nangengenot na paraataman o sa tugang na iinasignar nia, kinokoordinar kan grupo nin kamagurangan an programa sa Pampublikong Pagtiripon kan kongregasyon tanganing an iinaatubang na mga tema mapanigoan an lokal na mga pangangaipo. Dai pagpalihison an ano man sa mahalagang impormasyon na ini, asin pakosogon an mga bagohan na lubos na makinabang sa serosemanang Pampublikong Pagtiripon kan saindong kongregasyon.