Bagong Programa sa Espesyal na Aldaw nin Asamblea
1 Taano ta maninigo niatong ipahayag na daing ontok an maogmang bareta? Ano an mga kahagadan sa pagigin parahulit kan maogmang bareta? Paano na pati an mga masosopgon magsasadiring boot sa paghiras sa iba kan maogmang bareta? An mga ini asin iba pang nakapupukaw sa isip na mga hapot sisimbagon sa programa sa espesyal na aldaw nin asamblea poon sa Marso, na may temang “Kualipikado Bilang mga Ministro kan Maogmang Bareta.”—2 Cor. 3:5.
2 An nakaparirigon sa boot na mga eksperyensia itatao nin mga hoben na magsasaysay kun paano ninda napaglabanan an pangigipit nin mga kaedad. Tatawan nin mamomoton na pagparigon sa boot an mga magurang manongod sa pangangaipo na sanayon an saindang mga aki bilang mga ministro nin Dios. Kita gabos tatabangan na masabotan an pangangaipo na maghulit, na may mga bendisyon sa sato mismo asin sa mga nagdadangog sa sato.—1 Tim. 4:16.
3 Siertong an bautismo magigin tampok na kabtang kan aldaw na iyan. An siisay man na nagmamawot na pabautismo sa espesyal na aldaw nin asamblea maninigong ipaaram ini nin patienot na marhay sa nangengenot na paraataman tanganing magkaigwa sia nin supisyenteng panahon na iareglo na an kamagurangan repasohon an itinagamang mga hapot sa mga kandidato sa bautismo.
4 An saro pang tampok na kabtang iyo an pangenot na pahayag na itatao kan nagsosongkong espiker. Iyan may temang “Kualipikado Asin Sinangkapan Bilang mga Ministro nin Dios.” Apat na pangenot na probisyon na nagsasangkap sa sato bilang mga ministro an pag-oolayan, asin kabale sa pahayag an nakapakokosog sa pagtubod na mga eksperyensia.
5 Planohon na ngonyan na umatender sa bilog na programa. Siertohon na imbitaran an mga interesado asin inaadalan sa Biblia tangani na makinabang man sinda sa aldaw na ini nin teokratikong pagtotokdo. Paagi kaini makasisierto kita na kita “biyong kualipikado” bilang mga ministro kan maogmang bareta.