Makinabang sa Teokratikong Paadalan sa Pagmiministro Para sa 1996—Kabtang 2
1 Dai nahaloy pagpoon kan Teokratikong Paadalan sa Pagmiministro kan 1943, an saro sa mga sanga kan Sosyedad nagbareta: “An marahayon na areglong ini nagin mapanggana sa halipot na panahon sa pagtabang sa dakol na tugang na lalaki na nag-imahinar na sinda nungkang magigin mga espiker sa publiko na magin mahusay na marhay sa plataporma asin orog na epektibo sa langtad.” Nagpapadagos na magtao an paadalan nin ekselenteng pagpatood, na kaipuhan niato gabos.
2 Babasahon sa Biblia: An mga natatawan nin mga kabtang na pahayag bako sanang iyo an nakikinabang sa paadalan. An totoo, kita gabos igwa nin asignasyon—an semanal na babasahon sa Biblia. Dakol na teksto an nagpapagirumdom sa sato na basahon an Biblia aroaldaw. (Jos. 1:8; Sal. 1:2; Gibo 17:11) An pagbasa sa Biblia mahalaga sa marahay na espirituwal na salud; pinakakakan kaiyan an isip asin puso. Kun babasahon niato an Biblia sa laog nin kisuerra limang minuto kada aldaw, makadudungan kita sa iskedyul na babasahon sa Biblia kan paadalan. Sa katapusan kan taon, nabasa na niato an labing 150 kapitulo kan Tataramon nin Dios.
3 Pahayag na Nagtotokdo: An espiker na nagtatao kan pahayag na nagtotokdo kaipuhan na gumamit nin marahay na mga paagi nin pagtotokdo tangani na makapatalubo nin pagpahalaga ki Jehova, sa saiyang Tataramon, asin sa saiyang organisasyon. Maninigo na an kamagurangan asin ministeryal na lingkod mag-andam na marhay, idoon an tema, asin gibohon na buhay an materyal. (Heb. 4:12) Importante na sunodon kan espiker an itinao sa saiyang oras. Itinatao kan librong “All Scripture” an kadakoldakol na nakaoogmang Makakasuratan na materyal na mapakikinabangan niato sa espirituwal. An librong Proclaimers igwa kan modernong aldaw na kasaysayan kan naheheling na organisasyon ni Jehova asin nagsasaysay nin mga pangyayari sa buhay kan tunay na mga tawo na nagpaheling nin pagtubod, kaigotan, debosyon, asin pagkamoot.
4 Mga Tampok na Kabtang kan Biblia: An mga tugang na lalaki na natatawan kan asignasyon na ini maninigong pumili nin espesipikong mga bersikulo na puedeng iaplikar sa praktikal na paagi. Nagkakaipo ini na basahon an mga kapitulong iinasignar asin magsiyasat tangani na makua an kahulogan nin nagkapirang bersikulo. Sa likod kan Watch Tower Publications Index, yaon an “Scripture Index,” na puedeng makatabang sa paghanap nin impormasyon dapit sa espesipikong mga bersikulo sa Biblia. An mga tugang na igwang kabtang digdi maninigong gumamit nin pagmansay asin likayan an pagdagdag nin bakong konektadong materyal. Dai sinda maninigong mag-andam nin dakol na materyal na dai na makokobrehan sa laog nin anom na minuto.
5 Kita gabos makikinabang sa Teokratikong Paadalan sa Pagmiministro. An lubos na pag-aprobetsar sa probisyon na ini siertong matabang sa sato na an satong “pag-oswag mahayag sa gabos.”—1 Tim. 4:15.