“Saen Gikan an Kuarta?”

NAGHAHANGA an mga nagdadalan kan video kan Watch Tower Society na “Jehovah’s Witnesses​—The Organization Behind the Name.” Naheheling ninda an disente an itsurang mga lalaki asin babae hale sa manlaenlaen na rasa asin pinaghalean, na naghuhuyom asin iribang nagtatrabaho na may pagkaoroyon. Bako sanang an rinibong maogmang trabahador an nakaaapod kan saindang atension kundi pati na an darakulang edipisyo sa opisina prinsipal kan Sosyedad sa Brooklyn asin sa saindang hasyenda sa Wallkill, Nueva York. Ipinaheheling kan video na manonompongan sa laog kan mga edipisyong ini an modernong teknolohiya​—marikason na mga makina sa pag-imprenta asin pagpatos nin mga libro na nagpoprodusir nin minilyon na publikasyon kada bulan, kadakol na manlaenlaen na komputer, asin kadakoldakol na pansuportar na departamento.

Ini nagpapaheling nin dakulaon na pondo. Kaya may mga naghahapot, ‘Saen gikan an kuarta?”

Naghahanga man an mga bisita sa pankinaban na opisina prinsipal kan Sosyedad. Minalaba an saindang liog sa pagtingag sa bagong 30 iskalon na edipisyong erokan, na saro sa dakol na edipisyong iniistaran kan labing 3,000 na boluntaryong ministro na nagtatrabaho duman. An pagbisita sa bagong Sentro nin Edukasyon kan Watchtower na mga 110 kilometros sa amihanan kan Brooklyn nagpapahanga man sa dakol. Itinotogdok pa, mga 1,200 na trabahador an nag-iistar duman. Duwang klase nin mga misyonero an sasanayon duman kada taon asin ipadadara sa saindang mga destino sa ibang nasyon. Hale man sa lugar na iyan na itinatao an pagdirehir sa labing 10,000 na kongregasyon kan Mga Saksi ni Jehova sa Estados Unidos. An dakol na sanga sa bilog na kinaban dai pa sana nahahaloy na nagpahiwas man kan saindang mga pasilidad o ginigibo pa iyan ngonyan. An paggibo kan gabos na pagpunsionar na ini nangangaipo nin dakulang kantidad nin kuarta. An mga tawo naghahapot, “Saen gikan an kuarta?”

An simbag iyo na iyan gikan sa ordinaryong mga indibiduwal na arog kan siisay man sa sato. Sinda mga tawo, sa bilog na kinaban, na nagmamawot na gibohon an gabos nindang makakaya na paoswagon an mahalagang Kristianong gibohon na paghuhulit asin pagtotokdo. An siring na boluntad na espiritu bakong mayo nin arogan.

An Halimbawa na Itinao kan Suanoy na Israel

Kaidtong labing 3,500 na taon na an nakaagi, naglataw an pangangaipo para sa buka an palad na mga kontribusyon. Pinagbotan ni Jehova si Moises na magpatogdok nin tabernakulo, o “tolda nin katiriponan,” na gagamiton sa pagsamba sa Saiya. An disenyong itinao nin Dios nangaipo nin laen-laen na mamahalon na bagay. Ipinagboot ni Jehova: “Kumua kamo sa saindo nin kontribusyon ki Jehova. An lambang may dusay na puso magdara kaiyan bilang kontribusyon ki Jehova.” (Exodo 35:​4-9) Ano an nagin reaksion kan banwaan? An tala nagsasabi sa sato na “sinda nagdaratong, an gabos na pinahiro kan saiyang puso, asin sinda nagdara, an gabos na pinukaw kan saiyang espiritu, nin kontribusyon ki Jehova para sa paggibo sa tolda nin katiriponan asin para sa gabos na paglilingkod dian asin para sa banal na mga gubing.” An “gikan sa boot na mga dolot” na ini luway-luway na duminakulang marhay kaya iyan ‘labi pang gayo kan kinakaipuhan para sa gibohon na ipinagboot ni Jehova na gibohon.’ (Exodo 35:​21-29; 36:​3-5) Kanigoan kadaing kapasloan, buka an palad na espiritu an ipinaheling kan banwaan!

Pakalihis nin mayo pang 500 na taon, nagluwas giraray an pangapodan para sa buka an palad na kontribusyon gikan sa mga Israelita. An kamawotan ni Hadeng David na magtogdok nin permanenteng harong para ki Jehova sa Jerusalem maootob na paagi sa saiyang aking si Salomon. Si David mismo nagtipon asin nagkontribwir nin dakulang kabtang kan kakaipuhanon. Uminayon an iba kan iluwas ni David an pangapodan na magdara nin “regalo para ki Jehova.” An resulta? “An banwaan nag-ogma sa saindang pagtao nin gikan sa boot na mga dolot, huli ta sa bilog na puso na sinda nagtao nin gikan sa boot na mga dolot ki Jehova; asin minsan si David na hade mismo nag-ogma sa dakulang kagayagayahan.” (1 Cronica 22:14; 29:​3-9) An pirak asin bulawan sana magkakakantidad na nin mga $50 bilyones sa presenteng halaga!​—2 Cronica 5:1.

Maririsa niato sa mga halimbawang ini na mayo ni saro na pinirit na magtao. Iyan talagang “gikan sa boot” asin itinao nin “bilog na puso.” Dai maoogma si Jehova kun bakong siring. Kaagid kaiyan, kan lumataw an oportunidad na magkontribwir nin kuarta tanganing tabangan an tikapong mga Kristiano, si apostol Pablo nagsurat na iyan dai dapat na magin “sarong bagay na kinikil.” Sinabi pa nia: “Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.”​—2 Corinto 9:5, 7.

An Pangangaipo Ngonyan

Igwa daw nin pangangaipo para sa mga kontribusyon ngonyan? Igwa nanggad, asin magkakaigwa nin dakol pa mantang nag-aagi an panahon. Taano?

An mga Kristiano tinawan nin espesipikong mga instruksion para sa panahon na ini kan katapusan. Pinagbotan ni Jesus an saiyang mga disipulo: “Kaya paduman kamo asin gumibo kamo nin mga disipulo sa mga tawo kan gabos na nasyon, na bautismohan nindo sinda sa ngaran kan Ama asin kan Aki patin kan banal na espiritu, na tokdoan nindo sinda na otobon an gabos na bagay na ipinagboot ko sa saindo.”​—Mateo 28:​19, 20.

An paggibo kan dakulang pagtotokdo asin paghuhulit na ini mantang orog kitang naghaharani sa katapusan kan “pagtatapos kan palakaw nin mga bagay” nangangaipo nin dakol na panahon asin pondo. Taano? Huli sa gabos na kalabot sa pagdara kan mensahe kan Kahadean nin Dios “sagkod sa kaporoporohi kan daga.” (Gibo 1:8) Bakong arog kan mga Judio kan enot na siglo, an kadaklan na tawo dai tatao sa Kasuratan. Sa katunayan, dakol na nag-eerok sa daga an bako nganing pamilyar sa Biblia asin dai iyan minimidbid na Tataramon nin Dios. An mga parahulit dapat na sanayon asin ipadara sa hararayong kadagaan. (Roma 10:​13-15) Asin isip-isipa kun pirang lenguahe an kalabot! An mga hinuhulitan kaipuhan na magkaigwa nin mga Biblia asin publikasyon na basado sa Biblia na babasahon asin pag-aadalan sa saindang sadiring lenguahe. An sistematikong pakaabot sa gabos asin progresibong pagdara sa sainda sa espirituwal na pagkamaygurang tangani na matabangan ninda an iba pa nangangaipo nin dakulaon na pag-organisar.​—2 Timoteo 2:2.

Si Jesus nagsabi na an “maogmang bareta kan kahadean” dapat ngunang ‘ihulit sa bilog na ineerokan na daga para sa pagpatotoo sa gabos na nasyon; dangan madatong an katapusan.’ (Mateo 24:14) Kaya ngonyan na an panahon na idusay an gabos niatong makakaya tanganing mahaman an mahalagang gibohon na iyan. Mayo nang mas marahay na mapaggagamitan kan satong mga pondo bago mawaran nin ano man na praktikal na halaga an materyal na kayamanan.​—Ezequiel 7:19; Lucas 16:9.

Saen Napaduduman an Kuarta?

An Watch Tower Society nagpupublikar nin mga literatura sa Biblia sa labing 230 tataramon, patin man sa Braille para sa mga buta asin mga video sa pagtaram paagi sa senyas para sa mga bongog. Iyan nangangaipo nin mga grupo nin mga paratradusir asin parabasa sa kada tataramon. Haros dai na kayang isip-isipon an paggibo kaini gabos, nangorogna para sa magasin na Torrengbantayan, na ipinupublikar kada bulan sa 121 tataramon asin durungan an 101 kaiyan. Pero kaipuhan iyan tanganing an mga tawo sa bilog na daga magkaigwa asin makabasa kan parehong impormasyon. Kada taon naglalangkaw an presyo kan papel asin iba pang materyales na ginagamit sa pagprodusir kan mensahe kan Kahadean na inimprenta o nasa mga rekording sa audio o video. An siring na mga gastos kaipuhan na mabayadan paagi sa paggamit nin mga donasyon hale sa mga tugang.

An paghuhulit asin pagtotokdo ginigibo sa mga teritoryo na nalalakopan nin labing 75,000 na kongregasyon nin Mga Saksi ni Jehova sa bilog na kinaban. Tanganing pagkasararoon asin pakosogon sinda, an sinanay na nagbibiaheng mga paraataman nagsosongko sa kada kongregasyon nin mga duwang beses kada taon. An mga asamblea igwa man nin mahalagang kabtang sa pagtotokdo. Darakulang pasilidad an kaipuhan na arkilahon para sa mga kombension, na nakapakokosog na marhay sa pagtubod. An saindong mga kontribusyon ginagamit man para sa mga katuyohan na ini.

Mantang an mga asamblea sa pankagabsan ginigibo sana nin tolong beses kada taon, an lokal na mga kongregasyon nagtitiripon para sa limang semanal na pagtiripon. (Ikomparar an Exodo 34:​23, 24.) An pag-abot kan mga bagohan na naghihimate sa maogmang bareta nangahulogan kan dagdag na rinibong bagong kongregasyon kada taon. Sa tabang kan minilyon na dolyar na ipinauutang paagi sa Sosyedad, ginatos na bagong Kingdom Hall an itinotogdok kada taon, asin an dakol na iba pa hinihirahay asin pinahihiwas. Minsan ngani ini pinaiitok na pondo na paorootrong ginagamit, an pangangaipo padagos na nag-oorog.

An sarong lugar na igwa nin dai pang kaagid na pag-oswag yaon sa mga nasyon sa Sirangan na Europa na sakop kan dating Unyon Sobyet. Kanigoan kagayagaya kan progresibong mga bareta na nabuksan na an gibohon sa mga lugar na ini! Ngonyan nagpapadara nin mga misyonero sa dakol sa mga nasyon na ini. May tinindog na bagong mga sanga sa nagkapirang kadagaan, na nagpapadakol sa boluntaryong mga ministro sa pambilog na kinaban na pamilyang Bethel na magin labing 15,000. Siempre, kaipuhan na bumakal o magtogdok nin mga edipisyo nin sanga na iistaran ninda. An saindong mga kontribusyon nakatatabang na mahipnoan an pangangaipo.

An gabos na gibohon na ini naririsa ni Satanas asin kan saiyang mga demonyo. Ginigibo ninda an gabos nindang makakaya na sudyaon an mga paghihingoa kan maimbod na mga lingkod ni Jehova o tawan sinda nin mga problema. (Kapahayagan 12:17) Nangangahulogan ini nin nagdadakol na pakikilaban sa legal tanganing protehiran an mga diretso kan banwaan nin Dios na maghulit asin mamuhay kaoyon kan saiyang matanos na mga pagboot. Dugang pa, an mga danyos nin guerra sa palakaw nin mga bagay ni Satanas, siring man an natural na mga kalamidad, nangangahulogan na parateng kaipuhan an mga ayuda para sa satong nagsasakit na mga tugang na lalaki asin babae asin iba pang kaiba ninda. An saindong mga kontribusyon nakatatabang na ikatao an mahalagang tabang na ini.

Babalosan Kamo ni Jehova

An buka an palad na paggamit kan satong panahon asin mga pondo sa pagpaoswag kan gibohon kan Kagurangnan nagtatao nin dakulang mga bendisyon. Taano? Huli ta an Dios, na iyo an talagang kagsadiri kan gabos na bagay, babalosan kita. An Talinhaga 11:25 nagsasabi: “An matinaong kalag mismong patatabaon, asin an saro na sueltong nagbabaribi sa iba mismo man na sueltong mababaribian.” Si Jehova tunay na naoogma kun ginigibo niato an satong kabtang na paoswagon an pagsamba sa saiya. (Hebreo 13:​15, 16) Sia nanuga sa suanoy na mga Israelita na matao kan mga kontribusyon na hinahagad sa irarom kan tipan nin Pagboot: “‘Tabi baloa nindo ako sa bagay na ini,’ sabi ni Jehova nin mga hukbo, ‘kun baga dai ko bukasan sa saindo an mga gaha kan kalangitan asin ulaan ko kamo nin bendisyon sagkod na mayo na nin kulang.’” (Malaquias 3:10) An espirituwal na prosperidad na nakakamtan ngonyan kan mga lingkod ni Jehova ebidensia na inootob nin Dios an saiyang panuga.

An dakulang gibohon na ini na pagpahayag sa gabos kan aldaw nin kaligtasan asin pagtabang sa mga sadiosan an puso na makaduman sa dalan na pasiring sa buhay dai magpapadagos sagkod lamang. (Mateo 7:14; 2 Corinto 6:2) Alagad an gabos na kabilang sa “ibang karnero” kan Kagurangnan dapat na tiponon. (Juan 10:16) Kinakaipuhan nanggad na atubangon an angat na iyan ngonyan! Asin magigin maogma nanggad an kada saro sa sato, sa pagsalingoy hale sa bagong kinaban na iyan nin katanosan, na magsabi, ‘Nagkaigwa ako nin lubos na kabtang sa pangultimong pagtipon na iyan’!​—2 Pedro 3:​13.

[Kahon sa pahina 30, 31]

Kun Paano an iba Nagdodonar sa Gibohon na Paghuhulit kan Kahadean

MGA KONTRIBUSYON SA PAMBILOG NA KINABAN NA GIBOHON: An dakol nagtatagama o nagbabadyet nin kantidad na ibinubugtak ninda sa mga kahon nin kontribusyon na may nakasurat: “Mga Kontribusyon Para sa Pambilog na Kinaban na Gibohon kan Sosyedad​—Mateo 24:14.” Kada bulan ipinadadara kan mga kongregasyon an kantidad na ini magsalang sa pankinaban na opisina prinsipal sa Brooklyn, Nueva York, o sa lokal na sangang opisina.

MGA REGALO: An boluntad na mga donasyon na kuarta puedeng direktang ipadara sa Watch Tower Bible and Tract Society of the Philippines, Inc., P.O. Box 2044, 1099 Manila, o sa opisina kan Sosyedad na naglilingkod sa saindong nasyon. An mga alahas o iba pang mahalagang bagay puede man na idonar. Sarong halipot na surat na nagsasabing iyan sarong direktang regalo an maninigong iiba sa mga kontribusyon na ini.

AREGLO SA KONDISYONAL NA DONASYON: An kuarta puedeng itao sa Watch Tower Society tanganing ipagkatiwala iyan sagkod na magadan an nagdonar, na may kondisyon na kun magkaigwa nin personal na pangangaipo, iyan ibabalik sa nagdonar.

SEGURO: An Watch Tower Society puedeng gibohon na benepisyaryo nin polisa sa seguro sa buhay o nin plano sa pagretiro/pension. An Sosyedad maninigong paisihon kan ano man na siring na areglo.

MGA DEPOSITO SA BANGKO: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala sa o bayadan sa Watch Tower Society pagkagadan kan nagdeposito, kaoyon sa lokal na mga kahagadan sa bangko. An Sosyedad maninigong paisihon kan ano man na siring na areglo.

MGA AKSION ASIN BONO: An mga aksion asin bono puedeng idonar sa Watch Tower Society magsalang bilang direktang regalo o sa irarom nin sarong areglo na paagi kaiyan an ganansia padagos na ibabayad sa nagdonar.

DAGA ASIN HARONG: An ikapababakal na daga asin harong puedeng idonar sa Watch Tower Society magsalang paagi sa pagtao nin direktang regalo o paagi sa pagreserba nin sarong maiistaran kan nagdonar, na puedeng magpadagos na mag-istar dian sagkod na sia nabubuhay. Maninigong paaramon nin saro an Sosyedad bago ibalyo sa ngaran kan Sosyedad an ano man na daga asin harong.

MGA TESTAMENTO ASIN IPINAGKATIWALA: An pagsadiri o kuarta puedeng ipamana sa Watch Tower Society paagi sa sarong testamento na ginibo sa legal na paagi, o an Sosyedad puedeng gibohon na benepisyaryo nin sarong kasundoan sa ipinagkatiwala. An sarong ipinagkatiwala na napakikinabangan nin sarong relihiosong organisasyon puedeng magtao nin nagkapirang bentaha sa pagbuhis. Sarong kopya kan testamento o kasundoan sa ipinagkatiwala an maninigong ipadara sa Sosyedad.

PLINANONG PAGTAO: An Sosyedad nag-andam nin sarong Ingles na brochure na may titulong “Planned Giving.” Makatatabang an impormasyon na ini sa mga taga-Estados Unidos na nagpaplanong magtao nin espesyal na regalo sa Sosyedad ngonyan o magwalat nin pamana pagkagadan. Nangorognang totoo iyan kun may minamawot sindang gibohon na pampamilyang pasohan o pagplano kan ipamamanang mga rogaring mantang naggagamit nin mga benepisyo sa buhis tanganing mainaan an gastos sa regalo o pamana.

Para sa dugang na impormasyon mapadapit sa arin man sa mga bagay na nasambit, sumurat sa Treasurer’s Office, Watch Tower Bible and Tract Society of the Philippines, Inc., P.O. Box 2044, 1099 Manila, o sa opisina kan Sosyedad na naglilingkod sa saindong nasyon.