Taano ta Magtatao ki Jehova?
MANTANG mainiton an saldang sa sadit na banwaan nin Sidon sa Sarepta, an sarong babaeng balo nagduduko tanganing mamurot nin mga bala. Kaipuhan niang magmakot tanganing maluto nia an dikit na pagkakan—na posibleng iyo an ultimong pagkakan nia asin kan saiyang hoben na aking lalaki. Nagmaigot sia tanganing sia asin an saiyang aki mabuhay sa halawig na tigmara asin gutom, asin namugtak sa miserableng situwasyon na ini. Sinda nagugutom.
Sarong lalaki an nagdolok. An saiyang ngaran Elias, asin dai nahaloy nasabotan kan balo na sia propeta ni Jehova. Garo baga may bareta na sia manongod sa Dios na ini. Si Jehova laen man ki Baal, na an maringis, maraot na pagsamba lakop sa saiyang daga nin Sidon. Kaya kan makiinom sa saiya si Elias, galaga siang tumabang. Tibaad naghona sia na paagi sa paggibo kaiyan magkakamit sia nin pabor ki Jehova. (Mateo 10:41, 42) Alagad ta labi pa dian an hinagad ni Elias—dikit na pagkakan. Ipinaliwanag nia na an yaon sa saiya igo na sana para sa sarong ultimong pagkakan. Pero, nag-insister si Elias, na inaasegurar sia na si Jehova matao sa saiya nin kakanon sa milagrosong paagi sagkod na matapos an tigmara. Ano an ginibo nia? An Biblia nagsasabi: “Kaya sia naghale asin ginibo an sono sa isinabi ni Elias.” (1 Hade 17:10-15) Ilinaladawan kan simpleng mga tataramon na ini an sarong akto nin dakulang pagtubod—dakulaon, sa katunayan, kaya inomaw ni Jesu-Cristo an babaeng balo na iyan pakalihis nin haros sangribong taon!—Lucas 4:25, 26.
Minsan siring, tibaad garo makalalawi na kadakol kan hahagadon ni Jehova sa sarong babae na tikapong marhay. Partikularmenteng totoo ini kun kokonsideraron niato an sarong pamibi kaidto nin sarong prominenteng marhay na lalaki. An pagtipon ni Hadeng David nin mga kontribusyon na gagamiton kan saiyang aking si Salomon sa pagtogdok kan templo nakapukaw nin dakulang pagigin buka nin palad. Sa modernong mga termino, an ikinontribwir na mga regalo nagkakantidad nin binilyon na dolyar! Pero, si David nagsabi sa pamibi ki Jehova: “Siisay ako asin siisay an sakong banwaan, na kami magkaigwa nin kakayahan na magtao nin gikan sa boot na mga dolot na arog kaini? Huli ta an gabos hale sa saimo, asin hale sa saimong sadiring kamot kami nagtao sa saimo.” (1 Cronica 29:14) Siring kan sabi ni David, an gabos sadiri ni Jehova. Kaya kun kita nagtatao sa ikaooswag kan dalisay na pagsamba, itinatao ta sana ki Jehova an dati nang sadiri nia. (Salmo 50:10) Sa siring, minalataw an hapot, Enot taano ta boot ni Jehova na kita magtao?
Sarong Mahalagang Marhay na Kabtang kan Tunay na Pagsamba
An pinakasimpleng simbag iyo na kan enot na mga panahon an pagtao ginibo ni Jehova na magin mahalagang marhay na kabtang nin dalisay na pagsamba. An fiel na tawong si Abel iinatang ki Jehova an nagkapira sa saiyang mahalagang marhay na mga hayop. An mga patriarkang sinda Noe, Abraham, Isaac, Jacob, asin Job nagtao man nin kaparehong mga dolot.—Genesis 4:4; 8:20; 12:7; 26:25; 31:54; Job 1:5.
Ipinagboot kan Ley Mosaiko asin kinontrol pa ngani an pagtao nin mga kontribusyon ki Jehova. Halimbawa, an gabos na Israelita pinagbotan na magtao nin tinagba, o idonar an ikasampulong kabtang kan ani kan daga asin kan mga ogbon kan saindang mga hayop. (Bilang 18:25-28) An ibang mga kontribusyon dai man kinontrol nin estriktong gayo. Halimbawa, hinagad sa kada Israelita na itao ki Jehova an enot na mga bunga kan saiyang mga hayop asin ani. (Exodo 22:29, 30; 23:19) Pero, itinogot kan Ley sa kada indibiduwal na iyo an magdeterminar kun gurano kadakol na kabtang kan saiyang enot na bunga an itatao, basta an pinakamarahay an saiyang itatao. Yaon man sa probisyon kan Ley an pagtaong pasasalamat asin mga pagdolot nin promesa, na biyong boluntad. (Levitico 7:15, 16) Pinarigon ni Jehova an boot kan saiyang banwaan na magtao sono sa sokol kan pagbendisyon nia sa sainda. (Deuteronomio 16:17) Siring kan nangyari sa pagtogdok kan tabernakulo asin kan huri kan templo, itinao kan lambang saro an itinutulod sa saiya kan saiyang puso na itao. (Exodo 35:21; 1 Cronica 29:9) Sierto nanggad na an siring na boluntad na mga kontribusyon nakapaogmang marhay ki Jehova!
Sa irarom kan “ley kan Cristo,” an gabos na pagtao dapat na boluntad. (Galacia 6:2; 2 Corinto 9:7) Dai iyan nangahulogan na an mga parasunod ni Cristo uminontok sa pagtao o mas dikit na an saindang itinao. Kabaliktaran! Mantang si Jesus asin an saiyang mga apostol naghuhulit sa Israel, an sarong grupo nin mga babae sinundan sinda asin pinaglingkodan sinda gikan sa sadiri nindang mga rogaring. (Lucas 8:1-3) Si apostol Pablo nakaresibi man nin mga regalo na nakasuportar sa saiyang pagmimisyonero, asin pinarigon man nia an boot kan ibang kongregasyon na tumao nin mga pondo sa iba kun igwa nin mga pangangaipo. (2 Corinto 8:14; Filipos 1:3-5) An namamahalang grupo sa Jerusalem nag-asignar nin responsableng mga lalaki tanganing siertohon na an ikinontribwir na mga pondo ikinadidistribwir sa mga nangangaipo. (Gibo 6:2-4) Malinaw nanggad, minansay kan enot na mga Kristiano bilang pribilehio an pagsuportar sa dalisay na pagsamba sa siring na mga paagi.
Pero, tibaad isip-isipon niato kun taano man nanggad ta ginigibo ni Jehova an pagtao na magin kabtang kan pagsamba sa saiya. Horophoropa an apat na dahelan.
Kun Taano ta Nagtatao Kita
Enot, ginigibo ni Jehova an pagtao na magin kabtang kan tunay na pagsamba huli ta an paggibo kaiyan ikararahay niato. Idinodoon kaiyan an satong pag-apresyar sa karahayan nin Dios. Halimbawa, kun an sarong aki bumakal o tumao nin regalo sa magurang, taano an magurang ta naoogmang marhay? An regalo daw nakapaninigo sa sarong grabeng pangangaipo na dai kutana napanigoan kan magurang kun mayo kaiyan? Posibleng dai. Imbes, naoogma an magurang na maheling an aki na pinatatalubo an mapag-apresyar asin matinaong espiritu. Sa kaagid na mga dahelan pinaririgon man ni Jehova an satong boot na magtao asin naoogma sia kun kita nagtatao. Ini an paagi nin pagpaheling niato sa saiya na talagang inaapresyar niato an gabos niang daing sagkod na kabootan asin an pagigin buka kan saiyang palad para sa sato. Sia an paratao kan “lambang marahay na balaog asin lambang sangkap na regalo,” kaya dai kita mauubosan nin mga dahelan na pasalamatan sia. (Santiago 1:17) Orog sa gabos, itinao ni Jehova an saiyang sadiring namomotan na Aki, na tinogotan siang magadan tanganing kita mabuhay sagkod lamang. (Juan 3:16) Mapasasalamatan daw niato sia nin igo?
Ikaduwa, kun inuugale niato na magtao, kita kun siring nakanonood na arogon si Jehova asin an saiyang Aki, si Jesu-Cristo, sa pinakamahalagang bagay. Si Jehova daing pagliwatliwat na nagtatao, danay na buka an palad. Siring sa sinasabi kan Biblia, sia nagtatao sa sato nin “buhay asin hinangos asin gabos na bagay.” (Gibo 17:25) Tibaad tama sanang pasalamatan niato sia sa kada paghangos ta, sa kada kagat nin pagkakan na ikinaoogma ta, sa kada maogma asin nakakokontentong oras sa buhay. (Gibo 14:17) Si Jesus, arog kan saiyang Ama, nagpaheling nin espiritu nin pagkamatinao. Daing pag-imot na itinao nia an saiyang sadiri. Aram daw nindo na kan si Jesus magmilagro, ginibo nia iyan na may nawara sa saiya mismo? Bako sanang sarong beses na sinasabi sa sato kan Kasuratan na kan paomayan nia an mga naghehelang, may kapangyarihan na ‘luminuwas sa saiya.’ (Lucas 6:19; 8:45, 46) Buka na marhay an palad ni Jesus kaya itinao pa ngani nia an saiyang sadiring kalag, an saiyang buhay, sagkod sa kagadanan mismo.—Isaias 53:12.
Kaya kun kita nagtatao, baga man kan satong buhay, satong kosog, o kan satong mga rogaring, inaarog niato si Jehova asin pinagagayagaya an saiyang puso. (Talinhaga 27:11; Efeso 5:1) Sinusunod ta man an sangkap na modelo para sa paggawe nin tawo na iwinalat sa sato ni Jesu-Cristo.—1 Pedro 2:21.
Ikatolo, an pagtao nagpapanigo sa tunay asin mahalagang mga pangangaipo. Totoo, pasil sanang panigoan ni Jehova an mga pangangaipo para sa intereses kan Kahadean na dai kaipuhan an satong tabang, kun paanong kaya niang iareglo na magkurahaw an mga gapo imbes na kita an gamiton sa paghuhulit kan tataramon. (Lucas 19:40) Alagad pinagmarahay nia na tawan kita nin dignidad paagi sa mga pribilehiong ini. Kaya kun nagtatao kita kan satong mga rogaring sa pagpaoswag sa intereses kan Kahadean, yaon sa sato an dakulang satispaksion sa pakaaram na kita igwang tunay na kabtang sa pinakamahalagang gibohon na nagpapadagos sa kinaban na ini.—Mateo 24:14.
Dai na kaipuhan pang sabihon na nagkakaipo nin kuarta tanganing masustentohan an pambilog na kinaban na gibohon kan Mga Saksi ni Jehova. Durante kan 1995 taon nin paglilingkod, an Sosyedad naggasto nin haros $60 milyon para sa pag-asikaso sana sa mga espesyal payunir, misyonero, asin nagbibiaheng paraataman sa saindang mga destino nin paglilingkod sa langtad. Minsan siring, iyan medyo sadit na gastos kun ikokomparar sa pagtogdok asin pagpadalagan nin mga sangang opisina asin imprentahan sa bilog na kinaban. Pero, iyan gabos nagin posible paagi sa boluntad na mga kontribusyon!
Sa pankagabsan dai iniisip kan banwaan ni Jehova na kun sinda mismo bakong mayaman, puedeng pabayaan na sana ninda na an iba an magdara kan pasan. An siring na kaisipan puedeng gumiya sa sato na mawaran kan aspektong ini kan satong pagsamba. Sono ki apostol Pablo, an mga Kristiano sa Macedonia nag-aagi nin “grabeng kadukhaan.” Pero, sinda “nakimaherak” na tawan nin pribilehiong magtao. Asin an itinao ninda, na pinatunayan ni Pablo, “labi pa sa saindang talagang kakayahan”!—2 Corinto 8:1-4.
Ikaapat, ginibo ni Jehova an pagtao na magin kabtang kan tunay na pagsamba huli ta an pagtao matabang sa sato na magin maogma. Si Jesus mismo nagsabi: “Igwang orog na kaogmahan sa pagtao kisa sa pag-ako.” (Gibo 20:35) Iyan an pagkadisenyo sa sato ni Jehova. Iyan saro pang dahelan kun taano ta namamatean niato na gurano man an itao niato sa saiya, nungka tang matitimbangan an pag-apresyar na namamatean niato sa satong puso para sa saiya. Pero, nakaoogma na si Jehova dai naglalaom nin labi sa kaya niatong itao. Makakokompiar kita na sia naoogma kun magayagaya niatong itinatao an makakaya niato!—2 Corinto 8:12; 9:7.
An mga Bendisyon Bunga nin Pagpaheling nin Matinaong Espiritu
Sa pagbalik sa satong naenot na halimbawa, imahinara na an babaeng balo sa Sarepta nangatanosan na may iba na puedeng mag-asikaso sa kinakaipuhan na pagkakan ni Elias. Kanigoan na bendisyon an nalipasan kutana nia!
Daing duwa-duwa na binebendisyonan ni Jehova an mga nagpapaheling nin matinaong espiritu. (Talinhaga 11:25) An babaeng balo sa Sarepta dai nagtios huli sa pagtao kan sa paghona nia iyo na an saiyang ultimong pagkakan. Binalosan sia ni Jehova nin milagro. Siring sa ipinanuga ni Elias, an saiyang mga lalagan nin harina asin lana dai naubosan sagkod na matapos an tigmara. Alagad nag-ako sia nin mas dakula pa nganing balos. Kan maghelang asin magadan an saiyang aking lalaki, si Elias, na lalaki kan tunay na Dios, binuhay sia liwat. Idto sierto nanggad na nakapakosog sa saiya sa espirituwal!—1 Hade 17:16-24.
Ngonyan dai kita naglalaom na bendisyonan nin mga milagro. (1 Corinto 13:8) Alagad talagang inaasegurar kita ni Jehova na sususteniran nia an mga naglilingkod sa saiya nin bilog na kalag. (Mateo 6:33) Kaya puede kitang magin arog kan babaeng balo sa Sarepta sa bagay na iyan, na bulaos na nagtatao, na may kompiansang aatamanon kita ni Jehova. Siring man, puede tang kamtan an darakulang espirituwal na balos. Kun an satong pagtao kabtang nin regular na rutina, imbes na bihira, bigla na sana, tatabangan kita kaiyan na papagdanayon na simple an satong mata asin nakasentro sa intereses kan Kahadean, siring sa irinekomendar ni Jesus. (Lucas 11:34; ikomparar an 1 Corinto 16:1, 2.) Tatabangan man kita kaiyan na makamateng mas dayupot ki Jehova asin ki Jesus bilang saindang mga katabang. (1 Corinto 3:9) Asin paooswagon kaiyan an buka an palad, matinaong espiritu na dati nang tanda kan mga parasamba ki Jehova sa bilog na kinaban.
[Kahon sa pahina 31]
MGA PAAGING PINIPILI NIN IBA NA MAGTAO
MGA KONTRIBUSYON SA PAMBILOG NA KINABAN NA GIBOHON
An dakol nagtatagama o nagbabadyet nin kantidad na ibinubugtak ninda sa mga kahon nin kontribusyon na may nakasurat: “Mga Kontribusyon Para sa Pambilog na Kinaban na Gibohon kan Sosyedad—Mateo 24:14.” Kada bulan ipinadadara kan mga kongregasyon an kantidad na ini magsalang sa pankinaban na opisina prinsipal sa Brooklyn, Nueva York, o sa lokal na sangang opisina.
An boluntad na mga donasyon na kuarta puede man na direktang ipadara sa Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201-2483, o sa opisina kan Sosyedad na naglilingkod sa saindong nasyon. An mga alahas o iba pang mahalagang bagay puede man na idonar. An sarong halipot na surat na nagsasabing iyan sarong direktang regalo maninigong iiba sa mga kontribusyon na ini.
AREGLO SA KONDISYONAL NA DONASYON
An kuarta puedeng itao sa Watch Tower Society tanganing ipagkatiwala iyan sagkod na magadan an nagdonar, na may kondisyon na kun magkaigwa nin personal na pangangaipo, iyan ibabalik sa nagdonar. Para sa dugang na impormasyon, sumurat tabi sa Treasurer’s Office sa adres na sinabi sa enotan.
PLINANONG PAGTAO
Dugang pa sa direktang mga regalo na kuarta asin kondisyonal na mga donasyon na kuarta, igwa nin iba pang mga paagi nin pagtao para sa kapakinabangan kan paglilingkod sa Kahadean sa bilog na kinaban. Kabale digdi an:
Seguro: An Watch Tower Society puedeng gibohon na benepisyaryo nin polisa sa seguro sa buhay o nin plano sa pagretiro/pension. An Sosyedad maninigong paisihon kan ano man na siring na areglo.
Mga Deposito sa Bangko: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala sa o bayadan sa Watch Tower Society pagkagadan kan nagdeposito, kaoyon sa lokal na mga kahagadan sa bangko. An Sosyedad maninigong paisihon kan ano man na siring na mga areglo.
Mga Aksion Asin Bono: An mga aksion asin bono puedeng idonar sa Watch Tower Society magsalang bilang direktang regalo o sa irarom nin sarong areglo na paagi kaiyan an ganansia padagos na ibabayad sa nagdonar.
Daga Asin Harong: An ikapababakal na daga asin harong puedeng idonar sa Watch Tower Society magsalang paagi sa pagtao nin direktang regalo o paagi sa pagreserba nin sarong maiistaran kan nagdonar, na puedeng magpadagos na mag-istar dian sagkod na sia nabubuhay. Maninigong paaramon nin saro an Sosyedad bago ibalyo sa ngaran kan Sosyedad an ano man na daga asin harong.
Mga Testamento Asin Ipinagkatiwala: An pagsadiri o kuarta puedeng ipamana sa Watch Tower Society paagi sa sarong testamento na ginibo sa legal na paagi, o an Sosyedad puedeng gibohon na benepisyaryo nin sarong kasundoan sa ipinagkatiwala. An sarong ipinagkatiwala na napakikinabangan nin sarong relihiosong organisasyon puedeng magtao nin nagkapirang bentaha sa pagbuhis. An sarong kopya kan testamento o kasundoan sa ipinagkatiwala maninigong ipadara sa Sosyedad.
An Sosyedad nag-andam nin sarong Ingles na brochure na may titulong Planned Giving. Makatatabang an impormasyon na ini sa mga taga-Estados Unidos na nagpaplanong magtao nin espesyal na regalo sa Sosyedad ngonyan o magwalat nin pamana pagkagadan. Nangorognang totoo iyan kun may minamawot sindang gibohon na pampamilyang pasohan o pagplano kan ipamamanang mga rogaring mantang naggagamit nin mga benepisyo sa buhis tanganing mainaan an gastos sa regalo o pamana.
Para sa dugang na impormasyon mapadapit sa arin man sa mga bagay na nasambit, sumurat sa Watch Tower, P.O. Box 2044, 1099 Manila, o sa opisina kan Sosyedad na naglilingkod sa saindong nasyon.