An Tataramon nin Dios Nagtatao nin Giya
1 “Nabubuhay kita sa sarong kinaban na kadakoldakol kan problema asin kakadikit nanggad kan solusyon. Minilyon an danay na nagugutom. Nagdadakol an nagigin adikto sa droga. Padakol nang padakol na pamilya an nagsusuruhay. An incesto asin kadahasan sa laog nin pamilya perming nababareta. An aire na satong hinahangos asin an tubig na satong iniinom luway-luway na nahihilo. Mientras tanto, padakol nang padakol sa sato an nabibiktima nin krimen.”
2 Siring kaiyan an pagpopoon kan librong The Bible—God’s Word or Man’s? An introduksion kaiyan orog pa nganing napapanahon ngonyan kisa kan ipublikar an libro pitong taon na an nakaagi. Kaipuhan na maaraman nin mga tawo na an Tataramon nin Dios nagtatao nin giya asin solusyon sa gabos na problema na nagpapasakit sa sainda. Hihingoahon niatong tabangan an mga tawo ngonyan na Disyembre paagi sa pag-alok sa sainda kan New World Translation asin kan librong The Bible—God’s Word or Man’s? Siempre, an pagwalat nin literatura kapinonan sana. Dapat kitang gumibo nin mga pagdalaw liwat na may katuyohan na makapoon nin pag-adal sa Biblia. Inaasegurar an tabang kun gigibohon niato an siring na paghihingoa. (Mat. 28:19, 20) Uya an nagkapirang isinusuherir na pag-atubang:
3 Kun makanompong kamo nin sarong gurang, puede nindong probaran an pagdolok na ini:
◼ “May hapot po ako: Kan kamo hoben pa, paano po trinatar nin mga tawo sa komunidad an kada saro? [Pasimbagon.] Laen nang marhay an mga bagay ngonyan, bako daw po? Ano sa paghona nindo an dahelan? [Pasimbagon.] An totoo naheheling na niato an kaotoban kan sarong hula sa Biblia. [Basahon an 2 Timoteo 3:1-5.] Apuera kaini, nanunuga an Biblia nin sarong mas marahay na kinaban sa harani nang ngapit. Sa dahelan na iyan pinaririgon niamo an gabos na basahon an Biblia. Nariparo daw po nindo kun gurano kalinaw kan lenguahe sa Bibliang ini, an New World Translation, na binabasa ko?” Ipaliwanag na iyan isinurat sa modernong Ingles. Ipaheling an librong The Bible—God’s Word or Man’s? asin itokdo an kapitulo 10, na nagpapaliwanag kan saro pang hula na naheling niatong naotob. Ialok an Biblia asin an libro.
4 Kun dumalaw liwat kamo sa sarong gurang na napasakamotan nindo kan Biblia asin kan libro, puede nindong sabihon:
◼ “Kan nakaagi po niatong pag-olay, uminoyon kita na an modernong sosyedad nagruro na kun ikokomparar sa klase nin buhay pira pa sanang taon an nakaagi. Minsan siring, boot ko pong ipaheling sa saindo na nanunuga an Biblia nin sarong mas marahay na kinaban sa ngapit. [Basahon an Kapahayagan 21:3, 4.] Maninigo kaining parigonon an satong boot na siyasaton kun ano pa an sinasabi kan Biblia.” Buksan an librong God’s Word sa kapitulo 14 asin basahon an parapo 3-4. Mag-alok nin mayong bayad na pag-adal sa Biblia sa harong.
5 Kun sarong hoben an makaolay nindo, puede nindong sabihon:
◼ “Boot kong hapoton ka: Bilang sarong hoben, namamatean mo daw na may dahelan kang magin mapaglaom sa marahay dapit sa ngapit? Ano an kamugtakan kan ngapit para sa saimo? [Pasimbagon.] Marahay sana ta igwa nin tunay na dahelan na magin mapaglaom sa marahay dapit sa ngapit. [Basahon an Salmo 37:10, 11.] Huling an mga tawo may laen-laen na punto-de-vista dapit sa Biblia, ipinublikar niamo an librong ini, The Bible—God’s Word or Man’s? Mangnoha an mga dahelan na itinatao kaiyan kun taano ta dapat basahon an Biblia. [Basahon an parapo 16-17 sa pahina 10-11.] Oras na makombensir kita na tunay an Biblia, magkakaigwa kita nin seguradong paglaom para sa ngapit. Naoogma akong iwalat sa saimo an kopya kan librong ini sa sadit na kontribusyon.”
6 Kun dumalaw liwat kamo tangani na kaolayon an sarong hoben na nag-ako kan librong “God’s Word,” puede kamong pumoon paagi sa pagsabi:
◼ “Inaapresyar ko na madangog kun gurano ka kanahahadit dapit sa ngapit. Natatandaan mo na ipinaheling ko sa saimo an sarong teksto sa Biblia na nanunuga sa sato nin sarong maogma asin tiwasay na ngapit. Uya an saro pa. [Basahon an Kapahayagan 21:3, 4.] An librong iwinalat ko sa saimo nagtatao nin nakakokombensir na prueba na an Biblia Tataramon nin Dios, bakong nin tawo. Mangnoha kun paano ini maninigong makaapektar sa sato. [Basahon an parapo 1-2 sa pahina 184-5.] Kun boot mo, naoogma akong ipakipag-adal sa saimo an Biblia na mayo nin bayad.” Kun akoon an pag-adal, hapoton an indibiduwal kun igwa sia nin kopya kan Biblia. Kun mayo pa sia, ialok an New World Translation.
7 An saro na dai aram kun saen madolok para sa giya tangani na makapanggana sa mga problema sa buhay puedeng maghimate sa pagdolok na ini:
◼ “Nabubuhay kita sa panahon na haros gabos napapaatubang sa magabat na mga problema. Dakol an minadolok sa gabos na klase nin parakonseho para sa giya. Saen daw sa paghona nindo makakukua kita nin marahay na sadol na talagang mapakikinabangan niato? [Pasimbagon.] Ipinaheheling kan Biblia na nangangaipo kita nin giya.” Basahon an Jeremias 10:23. Buksan an The Bible—God’s Word or Man’s? sa pahina 187 asin basahon an parapo 9. “An librong ini matabang sa saindo na masabotan kun paano, sa pamamahala kan Kahadean nin Dios, hahaleon an gabos niatong problema.” Ialok an libro.
8 Kun sa enot na pagsongko nag-olay kamo dapit sa pangangaipo nin tawo para sa giya, puede nindong ipadagos an pag-orolay sa pagdalaw liwat paagi sa pagsabi:
◼ “Kan enot kitang mag-olay, nag-oyon kita na kaipuhan niato an giya na hale sa Dios kun boot niatong makapanggana sa mga problema sa buhay. Manongod dian, iniisip ko na pahahalagahan nindo an pantapos na mga komento sa libro na iwinalat ko sa saindo. [Basahon an parapo 12-13 sa pahina 189 sa librong God’s Word.] Naoogma akong alokan kamo nin mayong bayad na kurso nin pag-adal sa Biblia sa harong, asin andam akong idemonstrar iyan sa saindo ngonyan mismo.”
9 Bebendisyonan ni Jehova an satong mga paghihingoa mantang tinatabangan niato an mga gurang asin siring man an mga hoben na apresyaron an halaga kan Tataramon nin Dios asin an giya kaiyan sa satong buhay.—Sal. 119:105.