Mga Kadaklan an Idinadagdag
1 Siring kan enot na siglo, makangangalas an pagtalubo sa Kristianong kongregasyon ngonyan. (Gibo 2:41; 4:4) Kan nakaaging taon, 366,579 bagong disipulo an nabautismohan, na an promedyo labing 1,000 kada aldaw! Labing sarong milyon an nabautismohan kan nakaaging tolong taon. Tunay nanggad, padagos na idinadagdag ni Jehova an mga kadaklan nin nagtutubod.—Gibo 5:14.
2 An dakol na bagohan nangangaipo nin tabang asin pagsasanay gikan sa mga makosog an pagtubod. (Roma 15:1) Kabilang sa enot na mga Kristiano an nagkapira na, maski pakalihis nin mga taon pakabautismo sa sainda, dai ‘nakapadagos sa pagkamaygurang.’ (Heb. 5:12; 6:1) Iyan an dahelan kun taano ta, sa saiyang surat sa mga Hebreo, itinampok ni Pablo an mga bagay na nangangaipo nin atension tanganing tumalubo sa espirituwal an mga Kristiano. Ano an mga ini, asin paano ikatatao an kaipuhan na tabang?
3 Pagkaigwa nin Marahay na Ugale sa Pag-adal: Kaoyon sa instruksion ni Pablo, kalabot sa pagigin marahay na estudyante an aktibong pakanood, pag-otro, asin paggamit kan “matagas na kakanon” na itinatao kan organisasyon ni Jehova. (Heb. 5:13, 14; helingon an Agosto 15, 1993 na Torrengbantayan, pahina 12-17.) Paagi sa paghiras sa mga bagong nagtutubod kan mahalagang marhay na mga tampok nin katotoohan na napag-araman nindo paagi sa personal na pagsiyasat, puede nindo sindang animaron na magkaigwa nin marahay na ugale sa pag-adal. Tibaad paminsanminsan puede nindong agdahon an sarong bagohan na umayon sa saindo sa saindong personal o pampamilyang pag-adal.
4 Pag-atender nin Regular sa mga Pagtiripon: An saindong fiel na halimbawa asin mamomoton na mga tataramon nin pamparigon sa boot matabang sa bagong mga miembro kan kongregasyon na likayan “an kaugalean” nin nagkapira na pagpalta sa Kristianong mga pagtiripon. (Heb. 10:24, 25) Tabangan sindang masabotan na an mga pagtiripon iyo an saindang espirituwal na kapotan pasiring sa kongregasyon. Boluntad sa boot na ipamate sa sainda na sinda inaako bilang kabtang kan satong asosasyon nin magturugang.
5 Pagdolok ki Jehova na May Kompiansa: Tangani na mapangganahan an mga kaluyahan sa laman asin mga depekto sa personalidad, dapat na makiolay kita ki Jehova paagi sa pamibi. Kaipuhan na manodan kan mga bagohan na paagi sa pagngayongayo ki Jehova para sa tabang, siring sa isinadol ni Pablo, dai sinda kaipuhan na magduwaduwa. (Heb. 4:15, 16; 10:22) An pagsaysay kan saindong personal na mga eksperyensia mapadapit digdi mapakosog sa kompiansa nin sarong bagohan na dinadangog ni Jehova an odok sa pusong mga pamibi.
6 Pagtagama nin Panahon Para sa Ministeryo: Ipinaheling man ni Pablo na kun kita ‘danay na nagdodolot sa Dios nin atang nin pag-omaw,’ iyan nakapakokosog sa espirituwal. (Heb. 13:15) Puede daw nindong agdahon an sarong bagong parahayag na umiba sa saindo sa saindong semanal na mga areglo sa paglilingkod sa langtad? Tibaad puedeng andamon nindong duwa an saindong mga pag-atubang o pag-olayan an sarong kabtang kan ministeryo na dai pa naprobaran kan mas bagong parahayag.
7 An pagmamaigot niato mismo na sanayon asin dagkahon an bagong mga miembro kan kongregasyon matabang sa sainda na mapatalubo an makosog na pagtubod na kaipuhan sa ‘ikapagdadanay na buhay kan saindang kalag.’—Heb. 3:12, 13; 10:39.