Taano ta Ginigibo Ninda Iyan?
1 Ihinula manongod ki Cristo na ‘hahalonon sia kan kaigotan para sa harong nin Dios.’ (Sal. 69:9) An kaigotan ni Jesus para sa tunay na pagsamba ki Jehova pinahiro sia na enoton an ministeryo. (Luc. 4:43; Juan 18:37) An kaigotan man sanang ini nababanaag ngonyan sa ministeryo kan Mga Saksi ni Jehova. Kan nakaaging taon nin paglilingkod, an promedyong 645,509 sa bilog na kinaban nakikabtang sa paglilingkod bilang payunir kada bulan. Huli sa satong pagdusay sa Dios, an kada saro sa sato maninigong mapagngayongayong konsideraron kun baga makapaglilingkod kita bilang auxiliary o regular payunir.—Sal. 110:3; Ecl. 12:1; Roma 12:1.
2 An dakol sa materyalistikong kinaban na ini nasasakitan na masabotan kun taano an siisay man ta magmamahigos na marhay sa ministeryo na mayo nin inaakong ano man na mga pakinabang na kuarta o pagkaprominente. Taano ta ginigibo ninda iyan? Aram kan mga payunir na naggigibo sinda nin nagliligtas-buhay na trabaho. Pinahihiro nin pagkamoot ki Jehova asin sa saindang kapwa, nakamamate sinda nin personal na obligasyon na tumabang sa pagligtas nin mga buhay. (Roma 1:14-16; 1 Tim. 2:4; 4:16) An sarong mag-agom na payunir nagsabi: “Taano kami ta nagpapayunir? May ikapangangatanosan daw kami sa atubangan ni Jehova kun dai kami nagpayunir?”
3 An saro pang tugang na babae nagsurat kaini dapit sa saiyang desisyon na pumoon nang magpayunir: “Kami mag-agom nagplano na mamuhay sa sasaro sanang entrada, na nangahulogan nin pagbaya sa gabos na dai kaipuhan. Pero, mayaman kaming binendisyonan ni Jehova, na nungkang pinababayaan kami. . . . Nanompongan ko an tunay na dahelan sa buhay—an pagtabang sa mga nangangaipo na makaaram na si Jehova bakong harayo sa mga naghahanap sa saiya.” Kontento an mga payunir sa mga pangangaipo sa buhay mantang odok nindang hinihingoang magkaigwa nin espirituwal na mga kayamanan na magdadanay sagkod lamang.—1 Tim. 6:8, 18, 19.
4 Kun itinotogot kan saindong personal na mga kamugtakan, taano ta dai umiba sa ginatos na ribong payunir sa bilog na kinaban asin mamatean an saindang kaparehong kagayagayahan?