Magpaheling nin Paggalang sa Lugar nin Pagsamba ki Jehova
1 Kun kita mga bisita sa harong nin saro, nagpapaheling kita nin paggalang sa rogaring kan tawong iyan, na dai naggigibo nin ano man na makadadanyar kaiyan, asin dai niato inaabala an aregladong rutina kan harong. Maninigo na orog pang totoo ini kun kita mga bisita ni Jehova! Dapat na aram niato kun paano kita magawe sa saiyang harong. (Sal. 15:1; 1 Tim. 3:15) Baga man ginigibo an satong Kristianong pagtiripon sa Kingdom Hall, sa pribadong harong, o sa sarong pampublikong pasilidad, an dakulang mayoriya sa sato pirmeng nagpapaheling nin paggalang sa satong lugar nin pagsamba na garo baga iyan harong ni Jehova, na an “dignidad halangkaw kisa sa daga asin langit.”—Sal. 148:13.
2 Minsan siring, nagkokomento an nagbibiaheng mga paraataman asin an iba na an nagkapirang tugang dai nagpapaheling nin paggalang sa mga pagtiripon paagi sa pagigin maribok o paghiro na garo baga bakong importante an impormasyon na iinaatubang. An nagkapirang adulto nag-oorolay na dai man kaipuhan sa agihan, sala paglaog, kasilyasan, o sa luwas kan Kingdom Hall mantang may pagtiripon. Kun binabayaan na asikasohon nin sarong dakula nang aki an sarong sadit na aki, kun beses nagpopoon na magkawat an duwa asin kakadikit an napapakinabangan sa programa. An nagkapirang hoben naheheling sa luwas kan Kingdom Hall pakatapos nin mga pagtiripon, na nagkakarawat, sobra kariribok, na garo baga nagkukurukaratehan pa ngani. Sa ibang situwasyon nadidisturbo ninda an mga kataed o nakaoolang sa trapiko sa paradahan o tinampo.
3 Kun Paano Malilikayan an Pagigin Daing Galang: Huling pinahahalagahan an dignidad asin pagigin sagrado kan satong pagsamba, daing duwa-duwa na habo niatong istorbohon an iba paagi sa paghinghing, pagkakan, pagngutanguta nin gum, pagkorumoskumos nin mga papel, pagparaduman sa kasilyasan na dai man kaipuhan, o ugale nang pag-abot nin huri sa mga pagtiripon. An magalang asin mapag-apresyar na mga magurang dai tinotogotan an saindang mga aki na atian an alpombra, takop kan tukawan, o mga lanob kan Kingdom Hall o kan harong na ginigibohan kan pag-adal sa libro. Asin daing duwa-duwa na kita gabos minaoyon na mayo nanggad nin lugar para sa ano man na klase nin makasosopog na gawe-gawe, rungaw na orolay, o bastos na sorobahan sa satong mga pagtiripon.—Efe. 5:4.
4 Kun pirme niatong gigirumdomon an katuyohan kan satong Kristianong mga pagtiripon, sisiertohon niato na kita asin an satong mga aki nagpapaheling nin angay na paggalang sa pagsamba ki Jehova sa lugar na satong ‘piniling tindogan.’—Sal. 84:10.