Sarong Bagong Kagamitan na Matabang sa mga Tawo na Manodan an mga Kahagadan nin Dios
“AN SIMPLE, direkta, asin maboot na paagi kaiyan mabunga nin labi pa sa mga linalaoman. An mga tema iinatubang sa simple asin nakaoogmang paagi na an siisay man na sinsero, nagsisiyasat na tawo mapahihirong sumabi, ‘An Dios tunay nanggad na yaon sa saindo.’” (1 Corinto 14:25) Siring kaiyan an sinabi nin sarong Saksi ni Jehova na taga-Thailand kan ilinaladawan an bagong brosyur na Ano an Kahagadan sa Sato nin Dios? Ilinuwas iyan kan Watch Tower Society sa “Mga Mensahero nin Diosnon na Katoninongan” na Pandistritong mga Kombension durante kan 1996/97.
An 32 na pahina, kompleto sa kolor na brosyur na ini dinisenyo bilang sarong kurso sa pag-adal sa Biblia. Kinokobrehan kaiyan an pundamental na mga katokdoan kan Biblia. An ginamit na tataramon simple asin diretso sa punto, na ipinaliliwanag nin malinaw an kahagadan sa sato nin Dios. An mga nagbabasa dai madedepisilan sa pagsabot kaiyan. Paano daw kamo makondukta nin pag-adal sa Biblia sa bagong brosyur na ini?
Gamiton an mga hapot. Igwa nin mga hapot sa kapinonan kan kada leksion. Sa laog kan parentesis pakatapos kan kada hapot, makukua nindo an mga numero kan mga parapo kun saen manonompongan an mga simbag. An mga hapot na ini puedeng gamiton na pantabang sa pagtokdo kapwa bilang patienot na pagkonsiderar asin bilang repaso. Halimbawa, sa kapinonan nin sarong pag-adal sa Biblia sa harong, puede nindong hapoton an estudyante kan mga hapot tanganing maaraman an saiyang mga komento. Imbes na itanos tolos-tolos an ano man na salang mga simbag, puede nindong ipadagos an pag-adal. Sa katapusan kan leksion, puede nindong balikan an mga hapot tanganing aramon kun kaya na iyan na simbagon kan estudyante na sono sa Biblia.
Helingon an mga teksto. Sa kada leksion, an haralipot na pahayag dapit sa mga katotoohan sa Biblia may kaibang nagsusuportar na mga teksto. Mantang an kadaklan kan mga teksto sitado, bakong kotado, mahalaga na parigonon an boot kan estudyante na helingon an mga tekstong ini sa saiyang sadiring Biblia. Kaipuhan niang basahon asin horophoropon an Tataramon nin Dios bago nia iyan ikaaplikar sa saiyang buhay.—Josue 1:8.
Itampok an mga retrato. An brosyur naggamit nin kadakol na retrato asin ipininta—labing 50 ilustrasyon gabos-gabos. An mga ini itinao bako sana na makaengganyar sa pagheling kundi siring man bilang dugang na pantabang sa pagtotokdo. Halimbawa, an huring duwang leksion (sarong pahina an kada leksion, sa magkaatubang na pahina) may titulong “Pagtabang sa Iba na Gumibo kan Kabotan nin Dios” asin “An Saindong Desisyon na Maglingkod sa Dios.” An mga retrato sa bilog na duwang pahina pasunodsunod na ipinaheheling an espirituwal na pag-oswag kan sarong tawo, na ipinaheheling na sia nagpapatotoo nin impormal, nakikikabtang sa pagharongharong, naggigibo nin pagdusay, asin sa katapustapusi nagpapabautismo. Paagi sa pagdirehir sa atension kan estudyante sa mga retratong ini, tinatabangan nindo sia na maheling an mga aksion na kaipuhan na gibohon tanganing maglingkod sa Dios.
Kumusta kun an interesadong tawo daing gayo tataong bumasa o dai ngani tataong bumasa? Ginigibo kan Sosyedad na makua an bagong brosyur na ini sa audiocassette sa nagkapirang tataramon. An cassette igwa kan materyal kan brosyur patin kan dakol na sitadong teksto. Iyan nakarekord siring sa minasunod: An enot na hapot binabasa, na sinusundan kan parapo (o mga parapo) na minasimbag kaiyan, kaiba an nagkapirang sitadong teksto. Dangan binabasa an sunod na hapot, na sinusundan kan materyal asin mga teksto na minasimbag kaiyan, asin padagos na. An estudyante puedeng maghinanyog sa rekording mantang sia nag-aandam para sa pag-adal. Puede man na gamiton an cassette kun nagkokondukta kan pag-adal.
An mga presente sa kombension galagang gamiton an bagong brosyur na ini sa saindang ministeryo sa langtad. Halimbawa, pirang aldaw sana pakatapos na maresibi an brosyur, an duwang payunir (bilog na panahon na mga ebanghelisador) na taga-Estados Unidos nakapasakamot kaiyan sa hoben na mag-agom na dati na nindang sinosongko. Kan helingon kan mag-agom an mga laog, an leksion na “Mga Gibo na Ikinaoongis nin Dios” nakaapod kan saindang atension. “Kaidto pa ako tinokdoan na an Dios nungkang naoongis—sia perming namomoot,” an sabi kan hoben na babae. “Ini an enot kong babasahon.” Kan an duwang payunir bumalik kan suminunod na semana, an hoben na babae nagsabi: “Binasa ko an bagong brosyur. Masakit na marhay na gibohon an gabos na bagay na maninigo ming gibohon. Si Jehova dai naoogma sa samo—bako kaming kasal. Alagad nagdesisyon na kami. Ginibo na niamo an mga areglo na magpakasal sa sunod na Biernes.” Kinukugos an mag-agom na payunir, sinabi pa ninda: “Naghahagad kami nin dispensasyon sa dai mi pagkaigwa nin regular na pag-adal, alagad an desisyon na ini nakapaginhawang marhay sa samo.”
Tunay nanggad, gamiton an bagong brosyur na Kahagadan. Ini sarong marahay na kagamitan sa pagtabang sa iba na manodan an mga kahagadan nin Dios.
[Mga retrato sa pahina 17]
Paano nindo gagamiton an bagong brosyur?