Ano an Sasabihon Nindo sa Sarong Judio?
1 Kan enot na siglo, dakol sa “mga aki ni Israel” an naghimate na may pag-apresyar sa paghuhulit ni Jesus asin kan saiyang mga apostol. (Gibo 10:36) Kun paanong totoo kaidto, dakol na sinserong Judio ngonyan an bilog na pusong nag-aako kan katotoohan—bako lang sa Israel kundi pati sa Rusya, sa Estados Unidos, asin sa iba pang mga nasyon. Gusto daw nindong magin orog na mapanggana sa pagpapatotoo sa mga Judio? An minasunod na mga suhestion makatatabang sa saindo na makapagtao nin mataktikang patotoo kapwa sa relihioso asin sekular na mga Judio.
2 Pagpapatotoo sa Relihiosong mga Judio: Maninigo na marealisar na an relihiosong mga Judio parateng mas interesado sa pag-otob sa mga tradisyon kan mga rabi kisa pagtao nin kahulogan sa espesipikong mga doktrina. Tunay nanggad, sa pankagabsan minamansay ninda na an tradisyon igwa nin autoridad na kapareho kan Kasuratan. Huli kaini, sinda talagang dai man interesadong pag-olayan an hararom na mga tema sa Biblia. Sinda may inklinasyon man na isipon na an Biblia sarong libro nin Kristiano. Sa dahelan na iyan, parateng pinakamarahay na gamiton an mga terminong “an Hebreong Kasuratan,” “an Tora,” o “an Kasuratan,” kun sinasambit an Biblia. An sarong ekselenteng publikasyon na inandam espesyalmente para sa mga Judio iyo an brosyur na Will There Ever Be a World Without War? Iyan makukua sana sa Ingles.
3 Anong mga tema an puedeng pagkainteresan kan relihiosong mga Judio? Bueno, sinda nagtutubod na saro sana an Dios, na odok na interesado sa tawo. Naniniwala man sinda na an Dios talagang nag-iinterbenir sa gibo-gibo nin tawo. Puede nindong gamiton an mga puntong ini sa pag-establisar nin puntong pagkakaoyonan. Dugang pa, an kadaklan na Judio nakakaaram na marhay kan pagdusa kan saindang mga kahimanwa durante kan Guerra Mundial II. Sinda nag-iisip kun taano ta tinogotan nin Dios an siring na inhustisya asin kun noarin matatapos an karatan. Kita nasasangkapan na marhay sa pagsimbag sa siring na mga hapot, na sinasambit, halimbawa, an naeksperyensiahan kan satong mga tugang durante kan Holocaust.
4 Siempre, tanganing malikayan na maanggot an kagharong, pinakamarahay na sa pag-oolay dai nguna tolos pagsambiton kun siisay an Mesiyas. Imbes, puede nindong ipakipag-olay an nagin papel ni Moises sa kasaysayan kan Israel asin hapoton an kagharong kun naniniwala sia na mahalaga pa ngonyan an mga katokdoan ni Moises. Kun garo baga angay na pag-olayan kun siisay an Mesiyas, puedeng basahon nguna nindo an Deuteronomio 18:15, na nagsasabi: “Sarong propeta hale mismo sa tahaw mo, hale sa saimong mga tugang na lalaki, na siring sa sakuya, an papatindogon ni Jehova na saimong Dios para sa saimo—sa saiya kamo maninigong maghinanyog.” Hapoton an kagharong kun siisay an nasa isip ni Moises kan magtaram sia manongod sa sarong propeta na siring sa saiya. Dangan pag-olayan an pirang punto na yaon sa brosyur na World Without War, sa pahina 14, parapo 17 asin 18.
5 Laen an Punto de Vista kan Sekular na mga Judio: Bakong gabos na nagpapamidbid na sia Judio inaako an mga katokdoan nin Judaismo. Dakol na Judio an may kinabanon na punto de vista. Sinda mas interesado sa pagpaoswag nin iba man na karakter nin Judio, kaiba an kultura, tradisyon, asin edukasyon kaiyan, kisa pag-otob kan relihion na Judio. An nagkapirang sekular na Judio mga agnostiko—an pira ateista pa ngani. Sa primero, kakadikit an mahihimo paagi sa dakol na pagkotar sa Hebreong Kasuratan. Magigin mas kapakipakinabang kun gibohon an pakikipag-olay na arog kan pakikipag-olay nindo sa sarong tawo na bakong relihioso. Halimbawa, puede nindong ipaliwanag kun paano an Biblia praktikal sa satong kaaldawan. Kun an kagharong dai naniniwala na an Biblia ipinasabong, makatatabang an nagkapirang punto sa brosyur na World Without War, partikularmente an yaon sa kabtang kan pahina 3 na may titulong “The Bible—Inspired by God?”
6 Kun nagpapatotoo sa sarong Judio, puede nindong sabihon:
◼ “An kadaklan sa sato nag-agi na kan mamondong eksperyensia na magadanan nin sarong namomotan. Ano daw sa paghona nindo an nangyayari sa sato kun kita magadan?” Pasimbagon. Dangan itokdo an kagharong sa kahon na may titulong “Death and the Soul—What Are They?” sa pahina 22 kan brosyur na World Without War. Ikinokomparar kan yaon sa kahon an sinasabi kan Kasuratan manongod sa buhay pagkagadan sa itinotokdo kan mga rabi. Dangan buksan sa parapo 17 sa pahina 23, asin ipaheling na oyon sa Kasuratan, an mga gadan bubuhayon liwat sa sarong paraisong daga. Ialok an brosyur. Sa pag-andam para sa pagdalaw liwat, puede nindong sambiton na an patriarkang si Job marigon na nagtubod sa paglaom na pagkabuhay liwat. Sambiton an sitadong mga teksto sa poro kan parapo 17, asin ialok an pagdalaw liwat tanganing pag-olayan iyan.
7 Nakasurat sa libro nin Mateo, Marcos, Lucas, Juan, asin Gibo an mga eksperyensia kan mga Judio na naghinanyog asin isinagibo an katotoohan. Pinapagdadanay pang bukas ni Jehova an dalan pasiring sa buhay na daing katapusan. Dakol na sinserong Judio an puede pang makanood manongod ki Jehova, an tunay na Dios, tanganing sinda man puedeng mabuhay sagkod lamang sa bagong kinaban nin Dios.—Miq. 4:1-4.