Madonong na Gamiton an Satong mga Babasahon

¹ Durante kan Setyembre asin Oktubre ngonyan na taon, nagkaigwa nin espesyal na mga miting sa bilog na Pilipinas kaiba an kamagurangan asin ministeryal na mga lingkod tangani na pag-olayan an sarong bagong areglo para sa sinimplipikar na pagdistribwir nin mga babasahon na ipaootob sa Enero 10, 2000. Kasunod kan mga miting na ini, pakatapos kan Pag-adal sa Torrengbantayan para sa semana nin Nobyembre 1, binasa an sarong surat sa gabos na kongregasyon tangani na pag-olayan an mga hapot mapadapit sa bagong areglong ini. Dangan, durante kan semana nin Nobyembre 8, nagkaigwa nin sarong espesyal na Pagtiripon sa Paglilingkod sa gabos na kongregasyon tangani na ipaheling kun paano gigibohon an satong paghuhulit sa irarom kan bagong areglo. Naseseguro mi na an gabos preparado na ngonyan na ponan an bagong areglong ini sa Enero 10, pakatapos tolos kan satong ultimong pandistritong kombension.

² Huling iaalok niato an satong mga literatura asin magasin na daing hinahagad na depinidong kantidad sa publiko, mahalagang marhay na gumamit kita nin pakamansay sa pagdistribwir kan satong mga publikasyon. Padagos niatong pupukawon an interes paagi sa paggamit kan saro sa mga introduksion sa librong Reasoning. Kun mayong ipinaheheling na interes, dai na kaipuhan na ialok an babasahon. Habo niatong sayangon an ano man na babasahon niato paagi sa pag-alok kaiyan sa mga mayong interes. Alagad kun may ipinaheheling na interes asin an kagharong minaoyon na basahon an babasahon, iyan puedeng ialok. Boot niatong madonong na gamiton an satong mga babasahon.

³ An minasunod nagkapirang komento na puede nindong sabihon pakapahelingan kan babasahon: “Kun ikaoogma nindo an pagbasa kan publikasyon na ini, maoogma akong iwalat iyan sa saindo.” Posibleng marhay na an kagharong maghapot: “Gurano iyan?” Puede kamong sumimbag: “Dai kami nagnenegosyo. Dai mi ipinapabakal an babasahon na ini. An gibohon niamo boluntaryong ginigibo sa 233 na kadagaan sa bilog na kinaban tangani na tabangan an mga tawo na manodan an dalan pasiring sa buhay na daing katapusan. Kun gusto nindong magdonar para sa gibohon na ini, maoogma akong akoon iyan.”

⁴ Sa nagkapirang kamugtakan, an tema manongod sa mga donasyon para sa satong pambilog na kinaban na gibohon tibaad alangan na ipakipag-olay. Halimbawa, tibaad ihapot nin interesadong kagharong: “Ano itinatao nindo iyan nin libre?” Puede kitang sumimbag: “Kun boot nindong basahon an publikasyon asin gusto nindong magkaigwa kaiyan, iyo, saindo na iyan. Gusto kong sumongko liwat sa masunod na semana tangani na trataron an napag-olayan niato asin sabihon sa saindo an dakol pa manongod sa samong pambilog na kinaban na gibohon.” Sa sunod na pagdalaw puedeng ipatalastas sa kagharong kun paano ginagastohan an satong gibohon.

⁵ O tibaad tolos-tolos na akoon kan kagharong an babasahon asin magsimbag, “Mabalos po.” Puede kamong magsimbag paagi sa pagsabing: “Mayong ano man. Aram kong magugustohan nindo iyan. Dakol an nag-iisip-isip kun paano ginagastohan an gibohon na ini, mantang ginigibo niamo iyan sa bilog na kinaban. An dakol na nag-aako kan samong mga publikasyon nagpahayag nin apresasyon sa saindang nanonodan asin boluntad na nagtao nin sadit na donasyon tangani na magin posible an dugang pang pagdistribwir. Kun ginigibo iyan nin mga tawo, naoogma kaming akoon iyan.”

⁶ Malinaw na bako niatong katuyohan na magdistribwir nin mga babasahon minsan kiisay na sana. Boot niato na an mga babasahon makatabang sa sinserong mga tawo na makanood nin orog pa dapit sa mga katuyohan ni Jehova. Sayang na iwalat an mga babasahon sa mga tawo na dai nagpapahalaga sa espirituwal na mga bagay. (Heb. 12:16) Paano niato maaaraman kun may ipinaheheling na interes? Kun an saro gustong makipag-olay sa saindo, ini marahay na tanda. Kun sia nag-aatento kun kamo nagtataram, o nagpapahayag kan saiyang opinyon, o naghahapot, iyan nagpapaheling nin interes. Kun sia nakikipag-olay sa saindo sa maboot, magalang na paagi, ini nagsusuherir nin maboot na disposisyon. An pagsubaybay mantang binabasa nindo an Biblia nagpaparisa nin paggalang sa Tataramon nin Dios. Kun naoobserbaran nindo an siring na mga ebidensia nin sinserong interes, posibleng marhay na an saro babasahon asin aapresyaron an babasahon na saiyang naako.

⁷ An ano man na mga kontribusyon na naresibi hale sa publiko maninigong ibugtak sa kahon sa kontribusyon sa Kingdom Hall na may markang “Contributions for the Society’s Worldwide Work.​​—Matthew 24:14.” Inaapresyar niato an siring na mga kontribusyon, alagad an totoo, an siring na mga kontribusyon hale sa publiko dai magigin supisyente na mabayadan an gabos na gastos na kalabot. Kun siring, siisay ngonyan an may pangenot na paninimbagan na sustentohan an pambilog na kinaban na gibohon, na kabale an paggibo, pagpaktora, asin pagdistribwir nin mga literatura asin magasin? An banwaan mismo ni Jehova an nagsusustento sa pambilog na kinaban na gibohon. Sa siring, poon sa Enero, kita gabos kaipuhan na magin mapagrisa asin sistematiko sa pagkontribwir. An dakol mas gustong magkontribwir sa panahon na kinukua ninda an saindang mga literatura asin magasin sa counter sa Kingdom Hall, huli ta paagi kaini sinda napagigirumdom na an mga babasahon may gastos an paggibo asin an totoo kabtang kan pambilog na kinaban na paghuhulit.

⁸ Minsan ngani an mga kontribusyon gikan sa boot kaidto pa, an areglong ini nagtataong lugar sa indibiduwal na inisyatiba asin maatom na atension tangani na mabayadan an mga gastos kan organisasyon ni Jehova na dinidirehiran kan espiritu. Ngonyan an kada saro sa sato may dagdag na moral na paninimbagan asin pribilehio na tawan nin onra si Jehova paagi sa satong mahahalagang bagay. (Tal. 3:9) An paagi kan satong paghimate sa paggiya kan espiritu ni Jehova mantang kita nagkokontribwir mapabanaag kan satong nadugangan na pakaaram na ibinibilang kita ni Jehova na mapagtitiwalaan.​—1 Cor. 4:​1, 2.

⁹ An pagliwat na ini sa satong paagi nin paghuhulit nagtatao nin dugang pang ebidensia sa mga tawo na “kita bakong mga paratinda kan tataramon nin Dios.” (2 Cor. 2:17) Pinatutunayan man kaiyan na kita laen nanggad asin suhay sa kinaban.​—Juan 17:14.

¹⁰ Kompiado kita na an mga nag-aapresyar sa mahal na marhay na katotoohan kan Tataramon nin Dios asin sa halaga kan mga probisyon kan Sosyedad, kabale an paggibo kan satong mga publikasyon, padagos na mamomotibar gikan sa puso na matinaong magkontribwir para sa gibohon na ini sagkod sa katapusan kan sistemang ini. (2 Cor. 9:​6-14) Makapagtitiwala kita nin lubos ki Jehova, na nakaaaram na sia “makakagibo nin labi kaorog sa gabos na bagay na satong hinahagad o naiisip.” (Efe. 3:20) Minsan siring, tanganing mag-ako kan lubos na bendisyon ni Jehova, siertohon niato na ginigibo niato an satong kabtang paagi sa madonong na paggamit kan satong mga babasahon asin paagi sa ‘pagdara kan gabos na ikasampulong kabtang sa tambobong.’ (Mal. 3:10) Bendisyonan logod ni Jehova an satong pinagsararong mga paghihingoa na gibohon ini sa maabot na taon.