Gamiton nin Epektibo an Saindong Panahon sa Ministeryo
1 Igwa nanggad nin dakol pang gigibohon sa satong ministeryo, asin nainaan na an panahon na natatada. (Juan 4:35; 1 Cor. 7:29) Paagi sa marahay na pag-organisar asin patienot na pagplano, magagamit niato nin epektibo an panahon na iniskedyul niato para sa ministeryo.
2 Magin Andam: Bago kamo magpasiring sa pagtiripon bago maglingkod sa langtad, siertohon na igwa kamo kan mga literatura na kakaipuhanon nindo asin andam na sa isip nindo an saindong presentasyon. Kun matapos na an pagtiripon paagi sa pamibi, magpasiring tolos sa teritoryo. Ini mataong lugar sa saindo asin sa mga naglilingkod kaiba nindo na magibo an pinakadakol na mapupuede sa panahon sa paglilingkod sa langtad.
3 Kun kamo inasignaran na mamayo sa pagtiripon bago maglingkod sa langtad, pumoon nin tama sa oras. Pagdanayon na halipot an pagtiripon—na dai masobra sa 10 sagkod 15 minutos. Bago nindo pahaleon an grupo, siertohon na aram nin lambang saro kun saen sia maghuhulit asin kun siisay an makakaibanan nia.
4 Mantang Nasa Ministeryo: Oras na matapos an pagtiripon bago maglingkod sa langtad, dai na maghaloy pa nin dai man kaipuhan, kundi pumoon nang magpasiring sa teritoryo. Kun inaasahan nindo na kaipuhan nindong humale sa teritoryo nin mas amay, tibaad ikaareglo nindo an sadiri nindong malulunadan tanganing dai kaipuhanon kan natatada pa sa grupo na humale nin amay. Kun kaiba nin grupo, magin makonsiderasyon sa iba na tibaad naghahalat na matapos kamo sa sarong pakikipag-olay. Puedeng kalabot dian an mataktikang pagbaya sa sarong tawo na parapakidiskutir o pag-areglo na dalawon liwat an sarong interesado.—Mat. 10:11.
5 Kun nagdadalaw liwat, malilikayan nindo an dai kaipuhan na pagbiahe paagi sa pagdalaw liwat sa mga yaon sa sarong lugar bago magpasiring sa iba. Tibaad posible na apodan sa telepono an nagkapirang indibiduwal tanganing siertohon na yaon sinda sa harong. (Tal. 21:5) Kun inaasahan nindo na magigin halawig an pagdalaw, puede nindong iareglo na an mga kaiba nindo sa grupo maghulit sa kaharaning lugar o magdalaw liwat sa iba.
6 Nabubuhay kita sa panahon nin dakulang espirituwal na pag-ani. (Mat. 9:37, 38) Madali nang matapos an gibohon. Kun siring, maninigo na an satong pagmawot iyo na gamiton nin epektibo an satong panahon mantang nasa ministeryo.