Sarong Libro na Dapat na Basahon
“Dai dapat na seryosohon an Biblia.” Iyan an sabi nin sarong propesor sa unibersidad sa sarong prangkang hoben na babae.
“Ano nabasa na nindo an Biblia?” an hapot kan hoben na babae.
Nabigla, napiritan na admitiron kan propesor na dai pa.
“Paano kamo makapahahayag nin marigon na opinyon manongod sa sarong libro na dai pa nindo noarin man nabasa?”
May punto an hoben na babae. Nagdesisyon an propesor na basahon an Biblia dangan bumilog nin opinyon manongod dian.
AN Biblia, na kompuesto nin 66 na surat, ilinadawan bilang “posibleng an pinakamaimpluwensiang koleksion nin mga libro sa kasaysayan nin tawo.”1 Sa katunayan, naimpluwensiahan kaiyan an nagkapira sa nakalalabi sa gabos na gibo nin arte, literatura, asin musika sa kinaban. Dakula an epekto kaiyan sa hurisprudensia. Irinukyaw iyan huli sa literaryong estilo kaiyan asin halangkaw an pagheling dian nin dakol na tawong edukado nanggad. Partikularmenteng hararom an epekto kaiyan sa buhay nin mga tawo na nasa gabos na grado nin sosyedad. Pinukaw kaiyan sa dakol na nagbabasa dian an pambihirang kaimbodan. An iba ngani andam na mameligrong magadan tangani sanang mabasa iyan.
Kadungan kaiyan, may pagduda manongod sa Biblia. May mga tawo na may nakatudok sa isip na mga opinyon manongod dian minsan dai pa ninda noarin man nabasa iyan nin personal. Tibaad rinerekonoser ninda an literaryo o historikong halaga kaiyan, alagad iniisip-isip ninda: Paano magkakaigwa nin koneksion sa presenteng kinaban na ini an sarong libro na isinurat kaidtong rinibo nang taon an nakaagi? Nabubuhay kita sa “panahon nin impormasyon.” An pinakabagong impormasyon manongod sa presenteng mga nangyayari asin sa teknolohiya madalion na makua. Yaon sana an “ekspertong” sadol manongod sa haros gabos na problema sa buhay sa presente. Talaga daw na an Biblia igwa nin impormasyon na praktikal ngonyan?
Hinihingoa kan brosyur na ini na simbagon an siring na mga hapot. Dai iyan dinisenyo na ipirit sa saindo an relihiosong mga punto de vista o paniniwala, kundi an intension kaiyan ipaheling na an maimpluwensia sa kasaysayan na librong ini, an Biblia, maninigo nindong estudyaran. An sarong report na ipinublikar kan 1994 nagsabi na an nagkapirang edukador may marigon na paniniwala na an Biblia nagin nang permanenteng kabtang kan kultura sa Solnopan kaya “an siisay man, may pagtubod o mayong pagtubod, na bakong pamilyar sa mga tokdo asin kasaysayan sa Biblia magigin daing inadalan sa kultura.”2
Tibaad, pakabasaha kan ipinublikar digdi, maoyon kamo na—baga man relihioso o bako an sarong tawo—minsan paano an Biblia sarong libro na dapat na basahon.
[Kahon/Ritrato sa pahina 3]
“An katotoohan utang ko an sakong pagkamit nin kaliwanagan sa pakabasa nin sarong libro.—Sarong libro? Iyo, asin iyan sarong suanoy nang simpleng libro, simple sana arog kan naturalesa, asin arog man kaiyan kanatural . . . Asin an ngaran kan librong ini dai sanang arte na an libro, an Biblia.”—Heinrich Heine, parasurat na Aleman kan ika-19 siglo.3