Kun Paano Makakapuon nin Pakikipag-ulay Gamit an mga Tract

Puon kan Enero 2018, an cover kan Workbook sa Pagtiripon na Pamumuhay Asin Ministeryo nagtatampok nin sampol na pakikipag-ulay. Dinagka kita na magpokus sa pakikipag-ulay sa mga tawo imbes na basta ialok sa sainda an sarong publikasyon. Para tabangan an mga parahayag na mai-adjust an saindang presentasyon, an mga video sa sampol na pakikipag-ulay nagpapahiling kun paano makakapuon nin pag-uulay gamit sana an Bibliya. Pero, buot daw sabihon kaiyan dai na kita dapat gumamit nin mga publikasyon pag naghaharong-harong? Dai man. Bilang halimbawa, an mga tract puwedeng magin epektibong paagi para makapuon nin pag-uulay. Puwede tang gibuhon an minasunod na paagi pag ginagamit an arin man sa mga tract:

1. Gamiton an hapot na may pagpipilian na simbag na nasa cover.

2. Ipahiling an simbag kan Bibliya gamit an (mga) teksto sa itaas kan ikaduwang pahina. Kun may oras pa, basahon asin pag-ulayan an pirang impormasyon sa laog kan tract.

3. Itao an tract sa kagharong, dangan dagkahon siyang basahon an iba pang impormasyon kaiyan sa ibang pagkakataon.

4. Bago maghali, ipahiling an “Pag-isipan” na hapot dangan sabihon na ipapahiling nindo an simbag kan Bibliya sa pagbalik nindo.

Sa pagbalik mo, pag-ulayan an simbag dangan magwalat nin saro pang hapot na sisimbagon sa sunod. Puwede kang pumili nin sarong hapot hali sa satong website o hali sa publikasyon na isinusuherir sa likod na pahina. Sa angay na pagkakataon, iintrodusir an brosyur na Maogmang Bareta Hale sa Dios! o iba pang publikasyon na pinag-aadalan hali sa Toolbox sa Pagtutukdo.